Read luo 2 Samuel 16 Bible Online

2 Samuel 16 - luo bible

2 Samuel 16

¹ Noyudo Daudi oselor matin koa ewi got, eka Ziba jatich Mefibosheth noromone, ka nigi kenje ariyo moting’o makati mia ariyo, gi tombo mia achiel mag olemb mzabibu motwo, kod olembe moko mia achiel gi divai e ndede mar pien.

²Ruoth nopenjo Ziba niya, “Marang’o ikelo gigi?” Ziba nodwoke niya, “Akelo kenje mondo jood ruoth oidhi, kendo makati gi olembe mondo jolweny ocham, to divai mondo joma nong’no ohewo e thim omadhi.”

³ Ruoth nomedo penje ni, “To wuod ruodhi ni kanye?” Ziba nodwoke niya, “Odong’ Jerusalem, nikech nowacho ni, ‘Tinende jo-Israel biro dwokona loch wuora.’ ”

⁴Eka ruoth nowacho ni Ziba niya, “Gik moko duto mag Mefibosheth koro amiyi.” Ziba nodwoke ni, “Erokamano ruoth. Mad isik kigena kamano.”

⁵Kane Daudi ochopo Bahurim, ng’at moro ma nyinge Shimei wuod Gera, ma ja dhood Saulo, nowuok, mokuong’e alanda.

⁶Nobayo Daudi gi joge duto gi kite, kata obedo ni jolweny duto, kaachiel gi thwondi nolworo ruoth koni gi koni.

⁷Weche mane Shimei okuong’o e magi: “Aye, in dhand remo, ng’ama achach!

⁸Ruoth Nyasaye osechuloni kuor, nikech nichuero remb joka Saulo, ma nikawo lochne. Ruoth Nyasaye osemiyo Absalom wuodi loch. Koro masira osenwang’i, nimar in dhand remo.”

⁹Abishai wuod Zeruya nowacho ni ruoth niya, “Marang’o iweyo guok mothoni kuong’i? Yiena mondo adhi ang’ad wiye oko.”

¹⁰To ruoth nowacho niya, “Ang’o ma chandou koda, un yawuot Zeruya? We mondo okuong’a akuong’a. Ka Ruoth Nyasaye ema ochike mondo okuong’a to onge ng’ama nyalo penje gimomiyo otimo kamano.”

¹¹Eka nomedo wacho ni Abishai kod joge duto niya, “Uneno ka wuoda manywolo ema dwaro nega. To ka kamano, koro ja-Benjaminni to didwar nega machal nadi! Weye okuong’a akuong’a kamano, nikech ruoth Nyasaye ema osechike.

¹²Dipo nono ka Ruoth Nyasaye oneno chandruokna, motimona ber kar kuong’ mikuong’agono.”

¹³Daudi gi joge nodhi nyime gi wuodhgi, to Shimei ne wuotho e kor got komanyore gi Daudi, kokuong’e kendo obaye gi kite, kendo oguetho.

¹⁴Daudi gi joge duto nochopo e aora Jordan kool mi ne giyueyo kanyo.

¹⁵To Absalom gi jo-Israel duto nodonjo Jerusalem kaachiel gi Ahithofel.

¹⁶Hushai ja-Arki ma osiep Daudi nosudo ir Absalom, mowachone niya, “Ruoth, mondo idag aming’a!”

¹⁷Absalom to nopenje niya, “Ma e kaka inyisogo ni ihero Daudi osiepni? Marang’o ne ok idhi kode?”

¹⁸Hushai nodwoke niya, “Ooyo, ng’at ma Ruoth Nyasaye kod oganda man kae, gi jo-Israel duto oyiero ema an ng’ate, kendo anasikgo.

¹⁹Ere ng’ama chielo kendo ma datine, mak mana wuod ruoth? Kaka natiyo ni wuoru e kaka in bende natini.”

²⁰Absalom nowacho ni Ahithofel niya, “Ng’adnwae rieko; ere gima onego watim?”

²¹Ahithofel nodwoke ni, “Dhi iriwri gi mond wuoru, ma noweyo mondo oritne dala. Bang’e jo-Israel duto biro winjo ni isetimo tim makuero momiyo wuoru ojok kodi. Mano biro jiwo chuny jogo duto ma luwi.”

²² Jo-Absalom nieyie gi wachno mi ne giguro ni Absalom hema ewi ot malo, kendo Absalom nodonjo, moriwore gi mond wuon mare, mana ka jo-Israel duto neno.

²³E ndalogo rieko mane Ahithofel ng’ado ne chalo mana gi rieko mane ng’ato yudo kopenjo Nyasaye wach. Daudi kod Absalom bende ne kwano rieko mar Ahithofel kamano.