Read luo 2 Samuel 17 Bible Online

2 Samuel 17 - luo bible

2 Samuel 17

¹Ahithofel nowacho ni Absalom niya, “Yiena ayier ji alufu apar gariyo, mondo alawgo Daudi gotienoni.

²Abiro juke kool, kendo ka chunye onyosore, mi anamiye kihondko maduong’, kendo ji duto man kode noringi. To naneg mana ruoth kende,

³eka anadwok ji duto iri, ka dhako midwoko ir chwore. Kinego ng’at achiel kende to ji duto nobed gi kue.”

⁴Wachno ne ber ni Absalom gi jodong Israel duto.

⁵To kata kamano, Absalom nowacho niya, “Luong Hushai ja-Arki, mondo wawinj wachne bende.”

⁶Kane Hushai obiro ir Absalom, Absalom nonyise rieko mane Ahithofel oseng’ado, nopenje niya, “Dwatim gima owachono koso? Ka ok kamano, to in mondo ing’adnwa rieko.”

⁷Hushai nodwoko Absalom niya, “Rieko ma Ahithofel ong’adono kawuono ok ber.

⁸Ing’eyo ni wuoru gi joge gin joma rateke, kendo koro giger mana ka ondiek moma nyithinde. To bende wuoru en jalweny mariek; Ang’ nonind mana kar kende, mopogore gi joge.

⁹Kata sani, koro osepondo e bugo moro kata kamoro machielo. Omiyo ka jowa moko oneg mana e chakruok lweny, to ng’ato ang’ata mowinjo biro wacho ni masira osemako joma luwo Absalom.

¹⁰Mi kata ng’at ma jachir, kendo mager ka sibuor, nokirni, nikech jo-Israel duto ong’eyo ni wuoru en thwon, kendo joma ni kode jochir.

¹¹An to ang’ado rieko ni mondo ichok jo-Israel duto kanyakla, chakre Dan nyaka Beer-sheba, joma thoth ka kuoyo ma e dhonam. Kendo in iwuon itelnigi e lweny.

¹²Kamano wanajuke kamoro amora ma entie. Wanamwomre kuome, kendo wanamok kuome ka tho momoko e lum. Wananege, kendo onge ng’at achiel kuom joge duto ma notony.

¹³Kata kapo ni odonjo e dala moro, to jo-Israel duto nokel tonde, mi giniywa udi duto ma e dalano nyaka aora, ma kata kidi matin ok nodong’ kanyo.”

¹⁴Mi Absalom gi jo-Israel duto nowacho niya, “Rieko mar Hushai ja-Arki ber moloyo rieko mar Ahithofel.” To mano notimore nikech Ruoth Nyasaye nosechano mondo okel masira ni Absalom, komiyo rieko mar Ahithofel bedo kayiem nono.

¹⁵Eka Hushai nonyiso Zadok gi Abiathar ma jadolo rieko mane Ahithofel ong’ado ni Absalom gi jodong Israel, kod rieko mane en owuon ong’ado.

¹⁶Bang’e nomedo wacho niya, “Koro oruru wach piyo, kunyiso Daudi ni, gotienoni kik obwor kar yoro aora manie thim, to oidh loka piyo, nimar dipo ka onege gi joge duto.”

¹⁷Noyudo Jonathan gi Ahimaaz jobet En-rogel ka rito wach, nikech ne ok owinjore mondo gidonj Jerusalem, nimar dipo ka ng’ato onegogi. To nyako moro ma jatich ema ne dhi En-rogel pile nyisogi gik matimore, eka ne gitero ni Daudi wach.

¹⁸To kata kamano rawera moro nonenogi, monyiso Absalom. Omiyo ji ariyogo nowuok ayuka, modhi e dala ng’at moro Bahurim. Ne gidonjo e soko ng’atno mane ni e laru.

¹⁹Chi ng’atno nokawo par, moumogo dho soko, eka nomoyoe cham nondo kik gimoro nen.

²⁰Kane jotich Absalom ochopo e dalano, ne gipenjo dhakono niya, “Ere Ahimaaz gi Jonathan?” Dhakono nodwpokogi niya, “Giseidho loka aora.” Jotich Absalom nodwarogi, to ne gitamogi nwang’o, mi gidok Jerusalem.

²¹Kane gisedhi, ji ariyogo nowuok e soko, motero ni Daudi wach niya, “A malo, ing’ad aora piyo nimar Ahithofel oseng’ado rieko ma ditieki!”

²²Omiyo Daudi kod joge nong’ado aora Jordan, mi kane piny oru, ne onge kata ng’at achiel mane pok ong’ado aora.

²³Kane Ahithofel oneno ni Absalom ok oluwo rieko ma nong’adone, noidho kanje, modok thurgi nyaka dalane. Nolamo gige ni joode, mi nodere, motho. Ne giyike but wuon mare.

²⁴Kane Absalom gi jo-Israel duto oidho loka aora Jordan, noyudo ka Daudi osechopo Mahanaim.

²⁵Absalom noseketo Amasa mondo obed jatend jolweny kar Joab. Amasa ne wuod ja-Ishmael ma nyinge Ithra, ma nokendo Abigail nyar Nahash, ma nyamin Zeruya ma min Joab.

²⁶Absalom gi jo-Israel nojot e piny Gilead.

²⁷Kane Daudi ochopo Mahanaim, Shobi wuod Nahash, ja-Amon ma Raba, gi Makir wuod Amiel ja-Lodebar, kod Barzilai ja-Gilead ma Rogelim, ne jobiro ire.

²⁸Ne gikelo kitendni, gi tewni gi agulni, kod ngano ghi shairi gi mogo gi chamb aloida gi oganda gi ng’or,

²⁹kod mor kich gi chak mopoto, gi rombe, kod mo mabuo, mondo Daudi gi joge ocham, nimar ne ging’eyo ni midenyo gi riyo koro omakogi e thim, kendo giol.