Read luo 2 Samuel 19 Bible Online

2 Samuel 19 - luo bible

2 Samuel 19

¹Nonyis Joab ni ruoth ywak malit nikech Absalom,

²kendo mor mar odiechieng’no nolokore mana ywak kuom jolweny duto, kane giwinjo ni ruoth okuyo nikech wuode.

³Chieng’ono jolweny nodok Mahanaim ka lidho mana kaka joma olo e lweny dwogo alucha ka wigi okuot.

⁴Noyudo ruoth ogeng’o wang’e kendo ywak gi dwol maduong’ niya, “Yaye Absalom wuoda! Absalom wuoda, wuoda!”

⁵To Joab nodonjo ei ot ir ruoth, mowachone niya, “Kawuono jogi osereso ngimani, kaachiel gi ngima yawuoti gi nyigi kod mondi, to ikuodo wigi,

⁶nikech ihero jogo mochayi, to ichayo jogo moheri. Tinendeni isemiyo ji ong’eyo ni ok ikwan jotend lweny gi jolwenji ka gimoro, nimar aneno ni kada Absalom bed mangima kawuono, to wan duto watho, to dibedo mamor!

⁷Omiyo wuogi, iho chuny jogi, nikech an gi adiera e nying Ruoth Nyasaye ni ka ok itimo kamano, to onge kata ng’at achiel ma ang’ nobed kodi otienoni, kendo mano dibedni masira maduong’ moloyo masiche duto miseneno nyaka ia e nyathi.”

⁸Mi ruoth nowuok mobet e kome e dhorangach, kendo kane onyis ji ni ruoth obet kanyo, ne gibiro e nyime giduto. To noyudo ka jo-Israel oseringo.

⁹Koko maduong’ ne nitie e dhout Israel duto, ka ji penjore niya, “Ruoth Daudi noresowa e lwet wasikwa, kendo e lwet jo-Filistia, to koro oseringo oa e pinywa nikech Absalom nopiem kode.

¹⁰To Absalom mane wawiro mondo obed ruodhwa koro osetho e lweny. Marang’o waling’ aling’a ma ok wachan kaka wanyalo duogo ruoth?”

¹¹Ruoth nowinjo wach jo-Israel, omiyo nooro wach ni Zadok gi Abiathar ma jadolo, kowachonigi ni mondo gipenj jodong Juda niya, “Marang’o un ema dubi achien kuom dwoka e dala?

¹²Un e jowetena, kendo un e remba. Marang’o un ema dudong’ achien kuom dwoka e dala?

¹³Wachuru ni Amasa bende ni, ‘Donge ing’eyo ni in kod an wan remo achiel? Nyasaye mondo okweda ka ok aketi jatend jolweny kar Joab.’ ”

¹⁴Kamano noloko chuny jo-Juda duto, mi ne gibet gi chuny achiel, kendo ne giorone wach niya, “Duogi kaachiel gi jogi duto.”

¹⁵Omiyo ruoth noduogo nyaka aora Jordan, monwang’o ka jo-Juda osechokore Gilgal mondo oromne, kendo okele loka Jordan.

¹⁶ Shimei wuod Gera, ja-Benjamin ma Bahurim, nobiro piyopiyo kod jo-Juda mondo orom ni ruoth Daudi.

¹⁷Jo-Benjamin alufu achiel bende nobiro kode. Ziba jatich joka Saulo kod yawuote apar gabich gi wasumbni piero ariyo, noreto, mokwongo ni ruoth chopo Jordan,

¹⁸mondo gikonye ng’ado aora gi joode, kendo gitimne gimoro amora modwaro. Kane ruoth oikore ng’ado aora, Shimei wuod Gera nogoyo chonge piny, mokulorene nyaka e lowo,

¹⁹kowacho niya, “Ruoth, kik ikwana ka jaketho, kata paro tim achach ma natimo chieng’ ma niwuok Jerusalem cha. Kik ikan wachno e chunyi,

²⁰nikech ayie ni aseketho, emomiyo an e ng’at mokuongo kuom dhood Josef mobiro romoni kawuono.”

²¹Abishai wuod Zeruya nowacho niya, “Donge owinjore Shimei tho kuom kuong’o ruoth mowir ma Ruoth Nyasaye oyiero?”

²²To Daudi nodwoke niya, “Ang’o machandou koda, un yawuot Zeruya, momiyo udoko wasika tinendeni? Uparo ni bende dineg ng’ato e Israel kawuono adier? To kawuono eka ang’eyo ni kare an ruodh Israel!”

²³Mi nosingore ni Shimei, kowacho niya, “Ok nonegi.”

²⁴ Mefibosheth nyakwar Saulo nobiro romo ni ruoth. To ne pok olwoko tiende, kata golo yie tike, kata mana lwoko lepe chakre chieng’ mane ruoth owuokie, nyaka chieng’ mane oduogoe koselocho.

²⁵Kane Mefibosheth ochopo koa Jerusalem, mondo orom ni ruoth, ruoth nopenje niya, “Mefibosheth, marang’o ne ok idhi koda?”

²⁶En to nodwoke niya, “Ruoth, jatichna nowuonda. Kaka ing’eyo ni an rang’ol, nadwaro gawo kanyna mondo aidh adhi kodi,

²⁷to jatichnano nothuwa kodi, omiyo naluoro biro. To ruoth ichalo kaka malaika mar Nyasaye, emomiyo tim gima ineno ni ber,

²⁸nikech joodwa duto nowinjore gi tho e lweti, to kata kamano niyiera mondo abed achiel kuom joma chiemo kodi. Koro ere gima chielo ma damed kwayi?”

²⁹Ruoth nowachone niya, “Asewinjo wachni, kendo koro aneno ni mondo upogru gi Ziba mwandu mane amiye.”

³⁰To Mefibosheth nowacho ni ruoth niya, “Ruoth, kaka koro iseduogo gi kue, we mondo Ziba okawgi duto.”

³¹ Barzilai ja-Gilead bende nosebiro koa Rogelim, kokowo ruoth nyaka aora Jordan.

³²Ne en ng’at moti ahinya, ma jahigni piero aboro. En ema nokonyo ruoth gi chiemo, e kinde mane ruoth ni Mahanaim, nikech ne en jamoko.

³³Ruoth nowachone niya, “Bi wadhi kodi loka cha, kendo anapidhi, kidak koda Jerusalem.”

³⁴To Barzilai nodwoke ni, “Ruoth, an ng’at moseti. Ere kaka dadhi kodi Jerusalem?

³⁵Koro an jahigni piero aboro. Iparo ni pod nitie gimoro manyalo miya mor? Koso awinjon dhath gima achamo kata mar gima amadho? Iparo ni wende chwo kata wende mon pod nyalo miya ilo? Ooyo ruoth, ok owinjore amedni ting’ kayiem.

³⁶Ere gimomiyo dimiya pok ma kama? Abiro ng’ado kodi aora Jordan kende,

³⁷bang’e iyiena adog dalana, mondo oyika kuma liend wuora gi mama nitie. To Kimham wuoda eri. Yie mondo idhi kode, kendo irite kaka idwaro.”

³⁸Ruoth noyiene, ka dwoke niya, “Kara, Kimham nyalo dhi koda. Anatimne kaka idwaro, kendo gimoro amora midwaro kuoma, anatimni.”

³⁹Ji duto nong’ado aora Jordan, to ruoth nodong’, ka goyo ni Barzilai oriti. Nonyodhe kendo oguedhe, eka Barzilai nodok dalane.

⁴⁰Bang’e ruoth nong’ado aora, modhi nyaka Gilgal, ka jo-Juda duto kowe, kaachiel gi jo-Israel moko. Kimham bende nodhi kode.

⁴¹Eka jo-Israel duto nobiro ir ruoth, mi gipenje niya, “Marang’o owetewa ma jo-Juda okawi ling’ling’ kendo okowi loka Jordan kaachiel gi joodi gi jolwenji duto?”

⁴²To jo-Juda duto nodwoko jo-Israel niya, “Ne watimo kamano nikech wan wat ruoth machiegni moloyo. Marang’o iu wang’ gi wachni? Bende uwinjo ni ruoth osemiyowa gimoro wachamo? Koso uparo ni osemiyowa mich moro?”

⁴³Jo-Israel nodwoko jo-Juda kendo niya, “Wan dhoudi apar e piny Daudi, omiyo owinjore wabed kode moloyo un! Marang’o ujarowa? Donge wan ema ne wakwongo paro wach duogo ruoth?” To kata kamano weche jo-Juda ne ger moloyo weche jo-Israel.