Read luo 2 Samuel 20 Bible Online

2 Samuel 20 - luo bible

2 Samuel 20

¹ To ne nitie ja-Benjamin moro kanyo ma achach, ma nyinge Sheba wuod Bikri. Nogoyo tung’ kowacho niya, “Waonge wat gi Daudi! Ok wan libamba achiel gi wuod Jesse. Wan jo-Israel, wadoguru dala.”

²Omiyo jo-Israel duto noweyo Daudi kendo ne giluwo Sheba wuod Bikri. To jo-Juda nomedo kowo ruodhgi gi chuny achiel, ka gia Jordan nyaka Jerusalem.

³ Kane Daudi ochopo e ode Jerusalem, nokawo monde apar ma noweyo ka rito dala, mi noketogi e ot moro machielo, kama ne gibedo kiritogie. Nomiyogi chiemo, to ne ok oriwore kodgi kendo. Kamano noloronigi nyaka chieng’ thogi, ka gidak mana ka mond liete.

⁴Daudi nonyiso Amasa niya, “Chok jo-Juda duto kanyakla, ibigo ira kapok ndalo adek orumo.”

⁵Mi Amasa nodhi choko jo-Juda. To nodeko, mi kinde ma nomiye okadho.

⁶Eka Daudi nowacho ni Abishai niya, “Koro Sheba wuod Bikri biro hinyowa moloyo Absalom. Omiyo, dhiyo gi jolwenja, ilawe, nimar dipo ka odonjo e mier mochiel gohinga, kendo dotony moa e lweta.”

⁷Abishai nowuok Jerusalem, kotelo ni Joab gi jo-Kereth gi jo-Peleth, kod thwondi duto, mondo gilaw Sheba wuod Bikri.

⁸Kane gichopo e lwanda maduong’ man Gibeon, ne gipo ka giromo gi Amasa. Noyudo ka Joab orwakore gi lep lweny, ka en gi ligangla ei olalo, moliero e okanda mane otueyo e nungone. Nosudo machiegni, kopando gima odwaro timo.

⁹Nomoso Amasa, kopenje niya, “In nadi, omera?” Eka nomako yie tik Amasa gi lwete ma korachwich mondo onyodhe.

¹⁰To Amasa ne ok odewo ligangla mane ni e lwet Joab. Gikanyono Joab nochwowo bund iye dichiel mak onwoyo, mi jamb iye noo piny, motho. Eka Joab gi Abishai owadgi nomedo lawo Sheba wuod Bikri.

¹¹To ng’at achiel kuom jolwenj Joab nochung’ but ringre Amasa, kawacho niya, “Ji duto moyie Joab, kendo modok kor Daudi, mondo oluw bang’ Joab.”

¹²To ringre Amasa noriere e dier yo, kochadhore gi remo, kendo ji duto mane luwo yorno ne chung’ ka ng’iye. Kane ng’atno oneno ni ji chung’ kanyo, nogolo ringre Amasa oko e yo, moketo tenge, kendo nobolo law kuome.

¹³Kane osegole e yo, ji duto noluwo bang’ Joab, ka gilawo Sheba wuod Bikri.

¹⁴Sheba nolimo dhout Israel duto nyaka nochopo Abel-beth-maaka, kendo jo-Bikri duto nochokore ire, modonjo kode e dalano.

¹⁵Bang’e Joab nobiro gi joge duto, mi gilawo Sheba e Abel-beth-maaka. Ne gigingo pith maduong’ but dala, eka ne gichako kunyo ohinga mondo osienyre.

¹⁶To dhako moro mariek mane nie dalano, nokok matek niya, “Uwinjo! Nyisuru Joab obi ka, mondo alos kode.”

¹⁷Joab nosudo machiegni mi dhakono nopenje ni, “In e Joab?” Nodwoko ni, “E an.” Eka dhakono nowachone niya, “Ruoth winj wechena.” Joab nodwoke ni, “Wachi.”

¹⁸Mi dhakono nowachone niya, “E ndalo machon ji ne biro Abel mondo ong’adnigie rieko. Kamano ne giwacho weche mathagogi.

¹⁹Dalawani en achiel kuom mier mabeyo kendo mokue moloyo e Israel, to koro in idwaro ketho dala maduong’ kama e Israel. Marang’o idwaro ketho jo-Ruoth Nyasaye?”

²⁰Joab nodwoke niya, “Ooyo, ok adwar tiekogi kata ketho gimoro!

²¹Ok en kamano, to ng’at moro miluongo ni Sheba wuod Bikri, modak e piny gode mag Efraim, ema osepiem gi ruoth Daudi. Omiyo goluru mana ng’atno kende, eka abiro weyo dalani.” Dhakono nowacho ni Joab niya, “Ber! Wabiro dironi wiye gi ewi ohinga.”

²²Eka dhakono nodhi ir jodalano duto, moloso kodgi gi rieko. Mi ne ging’ado wi Sheba wuod Bikri, kendo gidiro ni Joab. Omiyo Joab nogoyo tung’, kendo joge noweyo dalano, modok miechgi. To Joab nodok Jerusalem ir ruoth.

²³Koro Joab ne jatend jolweny duto, to Benaya wuod Jehoyada ne jatend jolweny mowuok ma jo-Kereth gi jo-Peleth.

²⁴Adoram ne jarit joma nichuno gi thwon mondo oti. To Jehoshafat wuod Ahilud ne jachan weche.

²⁵Sheva ne jagoro, kendo Zadok gi Abiathar ne jodolo.

²⁶To Ira ja-Jair bende ne jadolo mar Daudi.