Read luo 2 Samuel 23 Bible Online

2 Samuel 23 - luo bible

2 Samuel 23

¹Koro magi e weche mogik mag Daudi wuod Jesse, ng’at momi duong’. Adier, Ruoth mowir mane Nyasach Jakobo oyiero, kendo mane jachuog wende mamit e Israel, nowacho kama:

²“Roho mar Ruoth Nyasaye ema miya weche mawacho, kendo wachne nie dhoga.

³Nyasach Jakobo, lwanda mar Israel, oseloso, kowacho niya, ‘Ka ruoth rito ji gi bura makare, nikech oluoro Nyasaye,

⁴To lochne chalo gi ler mar wang’chieng’, mopilore gokinyi ka boche polo onge, kendo mamiyo lum loth bang’ koth.’

⁵Donge kamano e kaka oda obet e nyim Nyasaye, nikech osetimo koda singruok mosiko, mochan kare, kendo ma ok nyal lokore? Oseguedho gik moko ma konya, kendo ma adwaro.

⁶To joma ok oluoro Nyasaye, chalo gi kudho moke, ma ok nyal choki gi lwedo.

⁷Ng’at manyalo dwarogi nyaka konyre gi nyinyo, kata gi bond tong’. Eka bang’e owang’gi chutho gi mach.”

⁸Koro thuondi mane Daudi nigo e ndalone e magi: Josheb-bashebeth ja-Takemon ne jatend thuondi adek madongo. En ema nonego ji mia aboro gi tong’, odiechieng’ achiel.

⁹Ng’at mane luwe ne Eleazar wuod Dodo, ja-Ahohi. Ne en gi Daudi Pas-Damin, kama ne jo-Filistia ochokoree ni lweny. Jo-Israel noringo

¹⁰to en nochung’ kanyo, monego jo-Filistia nyaka bade nojony, mi ligangla nomoko e lwete, kendo Ruoth Nyasaye nomiyogi loch maduong’ chieng’ono. Kane jolweny oduogo ir Eleazar bang’ ringo, koro ne odong’nigi mana dedo joma otho.

¹¹Ng’at mar adek ne Shama wuod Agee ja-Harar. Jo-Filistia nochokore Lehi, kama ne nitie puoth ng’or moro. Jolweny moko duto noringo jo-Filistia,

¹²en to nodong’ e puodhono, korite, kendo nonego jo-Filistiago. Kamano Ruoth Nyasaye nomiyogi loch maduong’.

¹³Chieng’ moro kane oyudo jolweny mag jo-Filistia ojot e holo mar Refaim, e kinde mar keyo, ji adek kuom thuondi piero adek madongo kande nodhi ir Daudi e holo mar Adulaim.

¹⁴Kindego Daudi ne nie rogo, to jolweny mag jo-Filistia nosekawo Bethlehem.

¹⁵Daudi noomo chunye ka siso omake, mowacho niya, “Mad ng’ato kelna pi soko man but ranga Bethlehem, mondo amodhi!”

¹⁶Eka thwondi adekgo nomwomo oganda lweny mar jo-Filistia. Ne gidhi omo pi sokono, mi gikelo ni Daudi. To nodagi modho pigno, moole piny ka misango ni Ruoth Nyasaye,

¹⁷kowacho niya, “Ruoth Nyasaye mondo orita kik amodh pigni, nikech ochalo mana remb jogo mane odhi ome, koyie wito ngimagi.” Mano emomiyo Daudi notamore modhe. Gik ma kamago ema thuondi adekgo ne timo.

¹⁸Abishai owadgi Joab, wuod Zeruya, ema ne jatend thwondi piero adekgo. Nonego ji mia adek gi tong’ mi nobedo ng’at marahuma kuom thuondigo.

¹⁹Ne en rahuma moloyo kuomgi, mobedo jatendgi, to kata kamano, ne ok ochopo e rang’iny mar ji adek kande.

²⁰Benaya wuod Jehoyada, thwon Kabzeel marahuma, notimo timbe thwon mang’eny. Bende nonego thwond Moab ariyo. Chieng’ moro kane kodh pe osechue, nolor e bur, monego sibuor kanyo.

²¹Bende en ema nonego ja-Misri marabet. Ja-Misrino ne nigi tong’, to Benaya nodhine gi odunga. Noyudho tong’ e lwet ja-Misrino, monegego.

²²Timbe machal kamago ema Benaya wuod Jehoyada oyudogo huma, kaachiel gi thwondi piero adek kande.

²³Ne en rahuma moloyo ji piero adekgo, to kata kamano, ne ok ochopo e rang’iny mag thuondi adek madongo kande. Daudi nokete jatend joge mag lweny mane rito ngimane.

²⁴Asahel owadgi Joab ne achiel kuom ji piero adekgo. Jomoko ne gin: Elhanan wuod Dodo ja-Bethlehem,

²⁵kod Shama gi Elika jo-Harod,

²⁶gi Helez ja-Palti, gi Ira wuod Ikesh ja-Tekoa,

²⁷gi Abiezer ja-Anathoth, gi Sibekai ja-Husha,

²⁸gi Zalmon ja-Ahohi, kod Maharai

²⁹gi Itai wuod Ribai ja-Gibea e piny Benjamin,

³⁰gi Benaya ja-Pirathon gi Hidai ja-Gaash, piny aore,

³¹gi Abialbon ja-Arbath, gi Azmoth ja-Bahurim,

³²gi Eliaba ja Shalbon, gi Hashem ja-Gizon kod Jonathan

³³wuod Shama, gi Ahiam wuod Sharar, jo-Harar,

³⁴gi Elifelet wuod Ahasbai ja-Maaka, gi Eliam wuod Ahithofel ja-Gilo,

³⁵gi Hezro ja-Karmel, gi Paarai ja-Arbi,

³⁶gi Igal wuod Nathan ja-Zoba, gi Bani ja-Gad

³⁷gi Zelek ja-Amon, gi Naharai ja-Beeroth, mane jating’ gilweny mag Joab wuod Zeruya,

³⁸kod Ira gi Gareb, jo-Ithri,

³⁹kod Uria ja-Hiti. Duto ne gin ji piero adek gariyo.