Read luo 2 Samuel 4 Bible Online

2 Samuel 4 - luo bible

2 Samuel 4

¹Kane Ishbosheth wuod Saulo owinjo ni oseneg Abner, ka ni Hebron, chunye noa, kendo jo-Israel duto nobwok.

²To Ishbosheth ne nigi jotend mony ariyo, achiel ne nyinge Baana, to machielo Rekab. Ne gin yawuot Rimon ja-Beeroth, ma ja-Benjamin,

³nimar jo-Beeroth noseringo modhi Gitaim, mi gibedo jodak kuno nyaka chil kawuono.

⁴ Jonathan wuod saulo ne nigi wuode moro mane tiende ong’ol. Ne en jahigni abich kane wach tho Saulo gi Jonathan okel oa Jezreel, mi japite noting’e moringo kode. To kane oyudo japidino reto mondo otony, nyathi nogore piny mohinyore, kendo nodoko rang’ol. Nyinge ne Mefibosheth.

⁵Rekab kod Baana, ma yawuot Rimon ja-Beeroth, nodhi mochopo e od Ishbosheth godiechieng’ ka piny oore, mi giyudo koyueyo chieng’ makech.

⁶Dhako ma jarit dhoot noyudo obet ka piedho ngano, to nochako nur nyaka nindo otere, mi Rekab gi Baana owadgi nolidho, modonjo e ot.

⁷Kane gichopo e ot mane Ishbosheth nindoe, ne gigoye, motho kendo ging’ado wiye oko. Ne gikawo wiye, mi giwuothogo otieno tulu, ka giluwo yo madhi e holo mar aora Jordan.

⁸Ne gikelo wi Ishbosheth Hebron, ni Daudi, mi giwachone niya, “Ruoth, wakeloni wi Ishbosheth wuod Saulo, jasiki, mane dwaro negi. Tinendeni Ruoth Nyasaye osechuloni kuor kuom Saulo, kendo kuom kothe.”

⁹To Daudi nodwoko Rekab gi Baana owadgi niya, “Gi nying Ruoth Nyasaye mosereso ngimana e masiche duto,

¹⁰ kane ng’at moro obiro Ziklag mokona ni Saulo osetho, koparo ni okelona wach maber, namake, manege. Mano e pok ma namiye kuom wach ma nokelo.

¹¹To koro nadi, ka joma richo osenego ng’at makare e ode owuon, kendo mana e kitandane? Donge owinjore achulnu kuor kuom remo musechuero, mondo ua e piny?”

¹²Mi Daudi nogolo chik, kendo joge nonego jogo. Ne ging’ado luetegi kod tiendegi oko, mi giliero e yath but yawo man Hebron. To wi Ishbosheth ne gikawo, mi giyiko Hebron, e liend Abner.