Read luo 2 Samuel 5 Bible Online

2 Samuel 5 - luo bible

2 Samuel 5

¹Dhout Israel duto nobiro Hebron ir Daudi, mi giwachone niya, “Ng’e ni wan mana remo achiel kodi.

²E ndalo ruodhwa mokadho, kane Saulo pod ruodhwa, in ema nitelo ni jo-Israel e lwenjegi duto, kendo Ruoth Nyasaye nowachoni niya, ‘Inibed jakwadh joga Israel, kendo in ema nibed ruodhgi.’ ”

³Jodong Israel duto nobiro Hebron ir Daudi, kendo ne gitimo kode singruok kuno e nyim Ruoth Nyasaye, mi giwire gi mo mondo obed ruodh jo-Israel.

⁴ Daudi ne jahigni piero adek ka nochako tich ruoth, kendo nobedo ruoth kuom higni piero ang’wen.

⁵Nobedo ruodh jo-Juda kuom higni abiriyo kodak Hebron, kendo nobedo ruodh jo-Israel duto kaachiel gi jo-Juda kuom higni piero adek gadek kodak Jerusalem.

⁶ Ruoth Daudi nodhi Jerusalem gi joge mondo oked gi jo-Jebus ma weg pinyno. To jo-Jebusgo ne paro ni Daudi ok nyal donjo e dalagi, omiyo ne giwachone niya, “Ok nidonj ka, nikech kata mana muofni gi rang’onde oromo geng’ou!”

⁷To kata kamano Daudi nokawo Sayun, dala mochiel gi ohinga, ma tinde iluongo ni Dala Daudi.

⁸Chieng’no Daudi nowacho niya, “Ng’ama dwaro loyo jo-Jebus, to mondo oidh gi aora motucho got, kendo oneg rang’onde gi muofni ma chunya osin-go kande.” Mano emomiyo iwacho ni, “Muofni gi rang’onde kik donj e Hekalu.”

⁹Bang’e Daudi nodak e dala mochiel gi ohingano, mi noluonge ni Dala Daudi. Nomedo gero udi moluore, chakre ohinga mar Milo, ka dok ka iye.

¹⁰Duong’ mar Daudi koro nomedore ahinya, nikech Ruoth Nyasaye Manyalo Gik Moko Duto ne ni kode.

¹¹Hiram ruodh Turo nooro joote ir Daudi gi yiend Sida, kaachiel gi jopa bao kod jogedo mag kite, mi jogo nogero ni Daudi ot.

¹²Koro Daudi nong’eyo ni Ruoth Nyasaye osekete ruodh Israel, kendo osetego lochne ahinya, mondo oguedhgo joge Israel.

¹³Kane Daudi osea Hebron, modhi odak Jerusalem, nomedo mon moko, ma nonywologo yawuowi gi nyiri

¹⁴Nying yawuote ma nonywolo Jerusalem e magi: Shamua gi Shobab gi Nathan gi Solomon,

¹⁵gi Ibhar gi Elishua gi Nefeg gi Jafia

¹⁶gi Elishama gi Eliada kod Elifelet.

¹⁷Kane jo-Filistia owinjo ni osewir Daudi mondo obed ruodh Israel, ne gibiro kar rombgi mondo gimonje. To kane Daudi owinjo kamano, nolor modhi e dala mochiel gi ohinga cha.

¹⁸Kane jo-Filistia ochopo, ne giyaro ni lweny e paw holo mar Refaim.

¹⁹Daudi nopenjo Ruoth Nyasaye wach niya, “Kadhi kedo gi jo-Filistia, nichiwgi e lweta koso?” Ruoth Nyasaye nodwoke niya, “Dhiyo; nachiwgi e lweti.”

²⁰Mi Daudi nodhi Baal-perizim, momonjogi, kendo oloyogi. Eka nowacho niya, “Ruoth Nyasaye osemwomore kuom wasikwa, mana kaka aora mwomo genge.” Mano emomiyo nochak kanyo ni Baal-perizim, (tiende ni, Ruoddh mwomruok.)

²¹Jo-Filistia noringo moweyo nyisechegi kanyo, mi Daudi kod joge nokawogi.

²²Chieng’ machielo jo-Filistia noduogo kendo mochako oyaro ni lweny e paw holo mar Refaim.

²³Daudi nochako openjo Ruoth Nyasaye wach, mi Ruoth Nyasaye nodwoke niya, “Kik ichomgi tir, to ng’ad yo ka ng’egi mondo imonjgi kama omanyore gi yien maboyo ka.

²⁴Kiwinjo mutni ewi yien, ka mutni mag ji mawuotho, to ireti, nimar asetelo nyimi, mondo adhi alo jolweny mag jo-Filistia.”

²⁵Daudi notimo kaka Ruoth Nyasaye nochike mi nonego jo-Filistia chakre Geba nyaka Gezer.