Read luo 2 Samuel 7 Bible Online

2 Samuel 7 - luo bible

2 Samuel 7

¹Kane ruoth osechako dak e ode ma nogero, kendo Ruoth Nyasaye omiye kue e kinde gi wasike duto ma nolwore koni gi koni,

²nowacho ni Nathan janabi niya, “Koro an adak e ot moger maber gi yiend sida, to Sanduk mar Nyasaye odak mana e hema.”

³Nathan nodwoko ruoth niya, “Tim duto midwaro, nikech Ruoth Nyasaye ni kodi.”

⁴To gotienono, wach Ruoth Nyasaye nobiro ni Nathan niya,

⁵“Dhiyo, inyis Daudi jatichna ni Ruoth Nyasaye owacho kama: ‘In digerna ot ma mondo adagie adier?

⁶Chakre ndalo mane agoloe jo-Israel e piny Misri, nyaka chil kawuono, pok adak e ot, to asebet ka adak e hema.

⁷Kuonde duto ma nawuothoe gi jo-Israel duto, ne ok apenjo achiel kuom jobura ma naketo mondo obed jokwadh joga Israel gimomiyo ok gigerona ot mar yiend sida.’

⁸Bende nyis Daudi ni Ruoth Nyasaye Manyalo Gik Moko duto owacho kama: ‘Ne agoli e lek, kuma nikwayoe rombe, mondo ibed jatend joga Israel.

⁹Asebet kodi kuonde duto midhiye, kendo asetiekoni wasiki duto. Koro abiro miyo nyingi bedo gi huma maduong’, ka humb joma dongo mag piny,

¹⁰kendo abiro miyo joga Israel pinygi giwegi. Anagurgi kuno, kendo ginidagie ma ok othaggi kendo, kaka chon,

¹¹chakre ndalo mane aketoe jobura mondo oritgi, to anamiyi kue e kindi gi wasiki duto. To bende awacho ni anaguedh dhoodi mondo osiki.

¹² Kisetho, minindo e liel gi kwereni, to anaket achiel kuom yawuoti kari, kendo anagur lochne obed motegno.

¹³En ema nogerna ot, kendo anager lochne osik nyaka chieng’.

¹⁴ Anabed wuon mare, kendo enobed wuoda, koketho, to anachwade kaka wuon nyathi chwado nyathine,

¹⁵to ok nagol herana kuome, kaka nagolo kuom Saulo, ma nariembo mondo oweni thuolo.

¹⁶ Dhoodi gi lochni ogur matek e nyima, kendo lochni nosik nyaka chieng’.’ ”

¹⁷Nathan nonyiso ruoth Daudi weche duto ma nofwenyne,

¹⁸mi ruoth nodhi e nyim Ruoth Nyasaye, mobet piny. Nowacho niya, “A Ruoth Nyasaye, an ng’a, koso dhooda en ang’o momiyo isemiya duong’ ma kama?

¹⁹To gima isetimona pod in ikwano ka gima tin, nimar bende isewacho ni dhooda nosik kuom ndalo mang’eny, kendo isenyisa kaka tienge mabiro nochal.

²⁰A Ruoth Nyasaye, ang’o ma damed wachoni, to ing’eya oko gi iye?

²¹Isemiya ng’eyo gik madongo misetimogi, mana nikech singruokni, kendo nikech mano ema idwaro.

²²A Ruoth Nyasaye, in ema iduong’, kendo pok wawinjo ni nitie nyasaye moro machal kodi. Onge nyasaye moro mak mana in.

²³ Ere oganda moro e piny, machalo gi jogi Israel? Bende nitie jopiny moro mane isedhi miwaro e tich misumba, miloko jogi? Ere oganda moro, misetimonigi gik madongo malich, kimiyogo nyingi duong? Koso ere oganda machielo misereso, kigolo Misri mondo obed jogi iwuon, kendo kiriembonigi ogendini mamoko gi nyisechegi mondo oweni thuolo?

²⁴Niwalo jogi Israel mondo obed jogi nyaka chieng’, kendo in, a Ruoth Nyasaye, ema isedoko Nyasachgi.

²⁵To koro, Ruoth Nyasaye, mi singruok misetimona kaachiel gi dhooda obed gi teko nyaka chieng’, mi ichop gima isewacho.

²⁶Nyingi mondo oyud duong’ nyaka chieng’ ka ji wacho niya, ‘Ruoth Nyasaye Manyalo Gik Moko Duto en Nyasach Israel.’ Kamano dhooda nodongi e nyimi,

²⁷nimar in, Ruoth Nyasaye Manyalo Gik Moko Duto en Nyasach Israel, ema isenyisa wach ni ibiro dongo oda. Kuom mano asebedo gi chir mondo alem kama e nyimi.

²⁸A Ruoth Nyasaye, in e Nyasaye adier. Wecheni gin adier, kendo isesingorina maber kama.

²⁹Emomiyo koro, A Ruoth Nyasaye, yie iguedh dhooda mondo osik e nyimi nyaka chieng’. In Ruoth Nyasaye ema isesingori kamano, omiyo dhooda noyud gueth nyaka chieng’.”