Read luo 2 Samuel 8 Bible Online

2 Samuel 8 - luo bible

2 Samuel 8

¹Bang’e Daudi noloyo jo-Filistia mi gibedo moboch, kendo nomayogi Metheg-ama, dalagi.

²Noloyo jo-Moab bende, kendo nochikogi mondo ginind piny, ka giriedo. Eka nopogogi gi tol e migepe adek. Nogolo chik mondo oneg migepe ariyo to migawo achiel mondo odong’. Bang’ mano jo-Moab nobedo e bwo loch Daudi, kendo ne gigolone osuru.

³Bende Daudi noloyo Hadadezer wuod Rehob, ma ruodh Zoba, e kinde mane ruodhno dhiyo chungoe rapar mar lochne e lweny but aora Yufrate.

⁴Daudi nomako joidh farese alufu achiel gi mia abiriyo, kod jolweny moko alufu piero ariyo. Nong’ado odond farese duto mag geche lweny moweyo mana farese mia achiel.

⁵To kane jo-Aram moa Damaski obiro mondo okony Hadadezer ruodh Zoba, Daudi nonego ji alufu piero ariyo kuomgi.

⁶Noketo askeche ma jorit e piny jo-Aramgo, mi ne gibedo e bwo lochne, kendo ne gigolone osuru. Kuonde duto mane Daudi dhiye, Ruoth Nyasaye ne miye locho.

⁷Noyako gi lweny mag dhahabu mane jorit Hadadezer oting’o, mokelo Jerusalem.

⁸Bende noyako mula mogundho Beta kod Berothai, ma miech Hadadezer.

⁹Kane Tou, ruodh Hamath, owinjo ni ruoth Daudi oseloyo lweny mag Hadadezer,

¹⁰nooro Joram wuode ire, mondo omose, kendo opake kuom loyo Hadadezer, nimar Hadadezer ne jasik Tou. Joram nokelo gik moko mag fedha, gi mag dhahabu, kod mag mula.

¹¹Magi bende ruoth Daudi nochiwo ni Ruoth Nyasaye kaka nosechiwo fedha gi dhahabu ma noseyako

¹²kuom jo Edom gi jo-Moab gi jo-Amon gi jo-Filistia kod jo-Amalek, ma noseloyo. Gik moko ma noyako kuom Hadedazer wuod Rehob, ma ruodh Zoba, bende nochiwo ni Ruoth Nyasaye.

¹³ Kamano nying Daudi noyudo huma. Kane Daudi oduogo, nonego jo-Edom alufu apar gaboro e holo kado.

¹⁴Bang’e noketo askeche ma jorit e piny Edom, kendo jo-Edom duto nobet e bwo lochne. Kuonde duto mane Daudi dhiye, Ruoth Nyasaye ne miye locho.

¹⁵Daudi nobedo ruodh Israel duto, morito piny gi kue, kong’ado bura kare ni joge duto.

¹⁶Joab wuod Zeruya ne jatend jolweny, to Jehoshafat wuod Ahilud ne jachan weche.

¹⁷Zadok wuod Ahitub, kod Ahimelek wuod Abiathar ne jodolo. Seraya to ne jagoro.

¹⁸Benaya wuod Jehoyada ne jatend jo-Kereth kod jo-Peleth. Yawuot Daudi bende ne jodolo.