Read luo 1 Ruodhi 1 Bible Online

1 Ruodhi 1 - luo bible

1 Ruodhi 1

¹Ruoth Daudi koro noseti, kendo hike ne oniang’, ma kata ne oume gi lep nindo, to pod ne ok onyal yudo liet.

²Emomiyo jotichne ne owachone niya, “Yie mondo wadwarni nyako manyalo tiyoni kendo riti. Bende nonind buti mondo iyud liet.”

³Omiyo ne gidwaro nyako ma jaber e piny Israel duto, nyaka ne giyudo Abishag nyar Shunam, mi ne gikele ir ruoth.

⁴Nyakono ne jaber ahinya, norito ruoth kotiyone, to ruoth ne ok riwre kode.

⁵ Adonija wuod Hagith nochako kawore, kaparo ni nobed ruoth. Nong’iewo geche lweny, gi joidh farese kod gi ji piero abich mane telo nyime.

⁶Nyaka oa e tinne wuon mare ne pok otale. Adonija ne wuod Daudi mane jalup’ Absalom, kendo ne en gi chia kaka owadgino.

⁷Noloso gi Joab wuod Zeruya, kod Abiathar jadolo, mi jogo nodokne, kendo ne gikonye.

⁸To Zadok jadolo, gi Nathan janabi, gi Shimei, gi Rei, kod thuondi mag Daudi ne ok odokne.

⁹Adonija noyang’o rombe gi rwedhi kod dhok machwe, kotimogo misango but lwanda mar Zoheleth man but En-rogel. Nogwelo owetene duto ma yawuot ruoth, kod jodong Juda duto,

¹⁰to ne ok ogwelo Nathan janabi, gi Benaya kod thuondi kande, kata Solomon owadgi bende ne ok ogwelo.

¹¹ Eka Nathan nowacho ni Bathsheba min Solomon niya, “Donge isewinjo ni Adonija wuod Hagith osebedo ruoth, to ruodhwa Daudi ok ong’eyo?

¹²To koro yiena mondo ang’adni rieko minyalo resogo ngimani gi ngima Solomon wuodi.

¹³Dhi ir ruoth Daudi, kendo penje niya, ‘Ruodha, donge isesingorina ni Solomon wuoda ema nobed ruoth kari, kendo nobed e kom duong’ni? Ka en kamano, to ang’o momiyo Adonija osebedo ruoth?’

¹⁴To ka pod iwuoyo gi ruoth kamano, to anadonj bang’i, mondo asir weche miwachogo.”

¹⁵Omiyo Bathsheba nodonjo e od ruoth. Ndalogo Daudi noseti ahinya, kendo Abishag nyar Shunam ne tiyone.

¹⁶Bathsheba nolung’ore ni ruoth, ka miye duong’ mi ruoth nopenje gima odwaro.

¹⁷En to nodwoke niya, “Ruodha, nisingorina e nying Ruoth Nyasaye ma Nyasachi ni Solomon wuoda ema nobed ruoth kari, kobet e kom duong’ mari.

¹⁸To koro Adonija osebet ruoth kakia.

¹⁹Osetimo misango gi ruedhi, kod dhok machwe, gi rombe mathoth, kendo osegwelo yawuot ruoth duto, kod Abiathar jadolo, gi Joab jatend jolweny. To ok ogwelo Solomon wuodi.

²⁰Koro ruodha, jo-Israel rito wachni mondo inyisgi ng’at ma nobed ruoth kari.

²¹Ka ok itimo kamano, to wan gii Solomon wuoda wanane masira kisetho.”

²²Kane Bathsheba pod wuoyo gi ruoth, Nathan janabi nodonjo, mi onyis ruoth ni Nathan janabi dwaro nene.

²³Nochopo ir ruoth, mogoyo chonge piny, kokulorene nyaka e lowo.

²⁴Eka nopenjo Ruoth niya, “Isewacho ni Adonija ema nobed ruoth kari, kendo nobed e kom duong’ni?

²⁵Osedhi mwalo moyang’o ruedhi gi dhok machwe kod rombe mogundho. Osegwelo yawuot ruoth duto, kaachiel gi Joab jatend jolweny kod Abiathar jadolo, kendo koro gibet piny kode, ka gichiemo kendo gimetho. Giwacho niya, ‘Ruoth Adonija mondo odag aming’a!’

²⁶To an gi Zadok jadolo, gi Benaya wuod Jehoyada, kod Solomon wuodi, ne ok ogwelowa.

²⁷In ema iyienigi mondo gitim kamano koso, mak inyisowa ng’ama nobed ruoth kari?”

²⁸Ruoth Daudi nodwoko niya, “Luongna Bathsheba obi ka.” Mi nobiro mochung’ e nyim Ruoth.

²⁹Eka ruoth nokuong’ore kowacho niya, “Adier gi nying Ruoth Nyasaye ma Nyasach Israel, mosereso ngimana e masiche duto,

³⁰ne akuong’ora ni Solomon wuodi ema nobed ruoth bang’a e kom duong’na. Kawuono eka abiro chopo gima nakuong’ora.”

³¹Bathsheba nogoyo chonge piny, mokulore nyaka e lowo, komiyo ruoth duong’, mi nowacho niya, “Ruodha, mondo idag nyaka chieng’.”

³²Eka ruoth Daudi nowacho niya, “Luongnauru Zadok jadolo, gi Nathan janabi, kod Benaya wuod Jehoyada, jobi ira.” Mi ne gibiro e nyime. Nowachonigi niya,

³³“Dhiuru gi askechena, uket Solomon wuoda e kanja, kendo ukowe nyaka Gihon,

³⁴kama Zadok jadolo gi Nathan janabi biro wiree gi mo, mondo obed ruodh Israel. Bang’e ugo tung’, kendo ukog niya, ‘Ruoth Solomon mondo odag aming’a!’

³⁵Eka uluw bang’e, kuduoge ka, mondo obed e kom duong’na, nikech asekete ruoth kara, kendo aseyiere mondo obed jatend jo-Israel gi jo-Juda.”

³⁶Benaya wuod Jehoyada nodwoko Ruoth niya, “Obed kamano! Ruoth Nyasaye ma Nyasachi mondo oyie otimre kamano.

³⁷Ruoth Nyasaye mondo obed gi Solomon kaka ne en kodi, kendo lochne obed maduong’ moloyo mari.”

³⁸Eka Zadok jadolo, gi Nathan janabi, kod Benaya wuod Jehoyada, kaachiel gi jo-Kereth kod jo-Peleth, nomiyo Solomon oidho kanyna mar ruoth Daudi, mi ne gilor ka gikowe nyaka Gihon.

³⁹Zadok jadolo nokawo tung’ mar mo mane ogolo e Hemb Nyasaye, mowirogo Solomon kuno. Eka ne gigoyo tung’, kendo ji duto nokok niya, “Ruoth Solomon mondo odag aming’a!”

⁴⁰Bang’e ji duto noluwe ka giduoge; ne gigoyo asili, kendo ne gimor gi mor maduong’, mi piny noyiengni nikech koko margi.

⁴¹Adonija gi welo duto mane ni kode nowinjo kokono, ka noyudo gitieko chiemo. Joab to ka nowinjo tung’ ka ywak, nopenjo niya, “Ere gimomiyo dala otimo mahu?”

⁴²Kane Joab pod loso, Jonathan wuod Abiathar jadolo nochopo. Adonija nokone ni, “Donji! In ng’ama ber, kendo ageno ni ikelo wach maber!”

⁴³Jonathan nodwoke niya, “Ok kamano. Ruodhwa Daudi oseketo Solomon ruoth.

⁴⁴Nooro Zadok jadolo, gi Nathan janabi, kod Benaya wuod Jehoyada, kaachiel gi jo-Kereth gi jo-Peleth, mondo okow Solomon koidho kanyna mar ruoth,

⁴⁵kendo Zadok jadolo gi Nathan janabi, josewire gi mo but soko Gihon, mondo obed ruoth. Koro gisea kuro gi ilo; emomiyo dala otimo mahu kendo mano e koko musewinjo.

⁴⁶Solomon koro obet e kom ruoth.

⁴⁷To moloyo, jodong ruoth bende nobiro mopako ruodhwa Daudi, ka giwacho niya, ‘Nyasachi mondo omi nying Solomon obed gi huma moloyo nyingi, kendo omi lochne duong’ moloyo mari.’ Mi ruoth Daudi nokulore e kitandane,

⁴⁸mowacho ni, ‘Apako Ruoth Nyasaye ma Nyasach Israel, moseyiena mondo ane wuoda kobet e kom duong’na kawuono.’ ”

⁴⁹Eka luoro nomako wend Adonija duto, mi gia malo, kendo ng’ato ka ng’ato nodok dalane.

⁵⁰Adonija bende noluoro Solomon, mi nodhi, momako tunge mag kendo-mar-misango.

⁵¹Nonyis Solomon niya, “Adonija oluori; omiyo osemako tunge mag kendo-mar-misango, kowacho niya, ‘Ruoth Solomon mondo okuong’rena ni ok nonega.’ ”

⁵²Solomon nowacho ni, “Ka timbene nonyiswa ni en ng’ama kare, to onge kata yie wiye achiel ma nolwar piny. To ka noyud kuome ketho moro, to nonege!”

⁵³Eka ruoth Solomon nooro wach, kendo ne gigole oko e kendo-mar-misango. Nobiro, mokulore ni ruoth, mi ruoth nowachone ni, “Dog dalani.”