Read luo 1 Ruodhi 10 Bible Online

1 Ruodhi 10 - luo bible

1 Ruodhi 10

¹ Kane ruoth madhako ma Sheba owinjo humb Solomon korka nying Ruoth Nyasaye, nobiro mondo oteme gi penj mang’eny matek.

²Nobiro Jerusalem gi oganda maduong’ ahinya, kod ngamia moting’o gik mang’ue ng’ar, gi dhahabu mogundho, kod kite mabeyo ma nengogi tek. Ka nobiro ir Solomon, nopenje duto mane nie chunye.

³To Solomon nodwoko penjone duto, maonge moro mane otame dwoko.

⁴Kane ruoth madhako mar Sheba oneno riekone duto, gi ot ma nosegero,

⁵gi chiemb ode, gi jotichne, gi rwakruokgi, gi jolos divai mage, kod misengni ma notimo e Od Ruoth Nyasaye, dhoge nomoko.

⁶Nowacho ni ruoth niya, “Kara humb timbeni gi riekoni ma nawinjo e pinya en adier!

⁷Kane pok abiro mi anenogi gi wang’a, ne ok anyal yie ni gin adier. To koro aneno ni nonyisa mana dir wach, ni mar riekoni kod mwanduni oloyo huma ma nawinjo.

⁸Mondi kod jotichni johawi mawinjo riekoni ndalo duto!

⁹Apako Ruoth ma Nyasachi moheri, kendo oketi ruodh Israel. Ruoth Nyasaye oseketi ruoth ni mondo ing’ad bura kare.”

¹⁰Eka nomiyo ruoth Solomon dhahabu moromo kilo alufu abiriyo, kod kite ma nengogi tek. Solomon ne ok ochako oyudo gik mang’ue ng’ar ma dirom gi mago mane ruoth madhako mar Sheba omiye.

¹¹To bende yiedhi mag Hiram mane dhi Ofir omo dhahabu, ne kelo yiend almug mang’eny,, gi kite ma nengogi tek.

¹²Yien-go ruoth nolosogo sirni mag Od Ruoth Nyasaye, gi mag ode owuon, kod thumbe nyatiti gi nyigwerni mane jower wergo e Hekalu. Yiend almug machal kamago pok okel kata pok one nyaka chil kawuono.

¹³Ruoth Solomon nomiyo ruoth madhako mar Sheba gimoro amora ma nokwayo, komedogi kuom mago ma nosemiye kuom herone. Eka ruodh Sheba nodok e pinye kaachiel gi jotichne.

¹⁴Pek mar dhahabu mane ikelo ni Solomon higa ka higa ne romo kilo alufu piero ariyo gadek,

¹⁵ka ok okwano mago mane wuok e osuch joohala, kendo kuom ruodhi duto mag piny Arabia, kendo kuom jorit piny.

¹⁶Ruoth Solomon nochuogo kuodi mia ariyo, kendo kuot ka kuot nobaw gi dhahabu moromo kilo abiriyo.

¹⁷Nochuogo bende okumbni mia adek, kendo okumba ka okumba nobaw gi dhahabu moromo kilo ariyo. Magi duto ruoth noketoe Od Bungu mar Lebanon.

¹⁸Bende noloso kom duong’ mang’ongo mar lak liech, mobawo gi dhahabu maler.

¹⁹Kom duong’no ne nigi raidhi man gi kuonde minyono auchiel. Ka toke ne nitie nyaroya mar dhahabu, to sibuoche ariyo mag dhahabu nochung’ e bath bede kom koni gi koni,

²⁰kendo sibuoche apar gariyo moko nochung’ moro ka moro e dir raidhi koni gi koni. Onge piny moro ma noselosie kom ruoth machal gi mano.

²¹Kikombe duto mag Solomon nolos gi dhahabu, kendo gik moko duto mikonyruokgo e Od Bungu mar Lebanon bende nolos gi dhahabu maler. Onge gimoro mane olos gi fedha, nikech fedha ne ok kwan ka gimoro e ndalo mag Solomon.

²²Ruoth Solomon ne nigi yiedhi mane kwang’ e nam, kaachiel gi yiedhi mag Hiram. Ne gidongo, machal gi mago mane dhi Tarshish. Bang’ higni adek adek, yiedhigo ne kelo dhahabu gi fedha, gi lak liech, gii ong’eche kod bimbe.

²³Kamano Ruoth Solomon noloyo ruodhi duto mag piny gi mwandu kendo gi rieko.

²⁴Piny duto ne biro ir Solomon mondo owinj rieko mane Nyasaye omiye.

²⁵Higa ka higa, ng’ato ka ng’ato ne kelone chiwo mag gik molos gi fedha gi dhahabu, kaachiel gi lewni, kod gilwenje, gi gik mang’we ng’ar, gi farese kod nyumbu.

²⁶ Solomon nochako ong’iewo geche mag lweny kod farese. Ne en gi geche alufu achiel gi mia ang’wen. Kod farese alufu apar gariyo, ma moko noketo e miech geche, to moko ne en go Jerusalem.

²⁷ Solomon nomiyo fedha obedo mang’eny ka kuoyo e Jerusalem, kendo yiend sida bende ne ng’eny ka ng’owo ma e pap.

²⁸ Ne oomo farese Misri gi Koah, kuma johala mage ne ng’iewogie kuom nengo moketi.

²⁹Gari achiel ning’iewo Misri gi kilo abiriyo mag fedha, to faras achiel nengone noromo kilo ariyo, kendo johala mag ruoth ne terogi ni ruodhi duto mag jo-Hiti gi mag jo-Aram.