Read luo 1 Ruodhi 11 Bible Online

1 Ruodhi 11 - luo bible

1 Ruodhi 11

¹ Ruoth Solomon nohero nyi pinje mamoko mang’eny. Nokendo nyar Farao, gi nyi Amon, gi nyi Edom, gi nyi Sidon, kod nyi Hiti.

² To Ruoth Nyasaye nosewuoyo ni jo-Israel kuom ogendnigo niya, “Kik ukend nyigi, to gin bende kik uyienigi mondo gikend nyiu, nikech adier ginilok chunyu mondo ulam nyisechegi.” To kata kamano Solomon nohero mon-go ahinya.

³Ne en gi mon mia abiriyo ma nyi ruodhi, kod mon mamoko mia adek.

⁴To kane oseti, mondego noloko chunye, molamo nyiseche mamoko, kendo chunye ne ok ni kare gi Ruoth Nyasaye kaka chuny Daudi wuon mare ne ni kare.

⁵Solomon ne lamo Ashtoreth, nyasaye ma dhako mar jo-Sidon, kod Milkom, nyasach jo-Amon.

⁶Notimo gik ma Ruoth Nyasaye okwero, kendo ne ok ohero Ruoth Nyasaye chutho kaka Daudi wuon mare nohero.

⁷Nogero ut lemo ni Kemosh, nyasach jo-Moab, kendo ni Molek, nyasach jo-Amon, ewi got yo wuok chieng’ mar Jerusalem.

⁸Kamano e kaka notimo ni mondene duto ma nyi pinje mamoko, mane wang’o ubani kendo timo misengni ni nyisechegi.

⁹Koro Ruoth Nyasaye nokecho gi Solomon, nikech chunye nosea kuom Ruoth Nyasaye ma Nyasach Israel mane ofwenyorene diriyo,

¹⁰mochike ni kik olam nyiseche mamoko, to ne ok orito chik Ruoth Nyasaye.

¹¹Emomiyo Ruoth Nyasaye nowacho ni Solomon niya, “Ok iserito singruokna gi buchena kaka nachiki, omiyo abiro golo loch kuomi, mi ami achiel kuom jotichni.

¹²Ok abi timo kamano e ndaloni, nikech pod aparo Daudi wuoru, to anagol loch e lwet wuodi.

¹³Kata kamano ok anagole duto, to anawene dhoot achiel, nikech ahero Daudi jatichna, kendo nikech dala Jerusalem ma aseyiero.”

¹⁴Eka Ruoth Nyasaye nomiyo Hadad ja-Edom obedo jasik Solomon; ne en ja dhood gi ruodh Edom.

¹⁵Hadad notony e kinde mane Daudi ni Edom. Ndalogo ema Joab jaduong’ oganda lweny odhi yikoe joma osetho, kendo ne ginego chwo duto Edom.

¹⁶Joab gi jo-Isarel duto nodong’ kuno kuom dueche auchiel, nyaka ne gitieko chwo duto Edom.

¹⁷Kane Hadad pod rawera, noringo odhi nyaka Misri, gi jo-Edom moko ma jotich wuon mare.

¹⁸Ne giwuok Midian, mi gibiro Paran, ir ruoth Farao, mi ruoth Farao nomiye ot, gi chiemo, kod lowo.

¹⁹Koro Hadad noyudo ng’wono maduong’ ahinya kuom Farao, mi Farao nomiye yuore ma nyamin Tapenes ma mikache mondo obed chiege.

²⁰Chiege, ma nyamin Tapenesno, nonywolone wuowi miluongo ni Genubath, ma Tapenes nopidho e od Farao; nobedo e od ruoth kaachiel gi yawuot Farao.

²¹To kane Hadad owinjo e Misri ni Daudi osetho, kendo Joab jaduong’ oganda lweny bende osetho, nokwayo Farao niya, “Weya adog thurwa.”

²²Farao nopenje ni, “Ang’o moremi kuoma ka, momiyo idwaro dok thuru?” Nodwoke niya, “Onge gimoro, to weya aweya mondo adhi.” Kamano e kaka Hadad nodoko jasik jo-Israel, mi othagogi. Nobedo ruodh Edom.

²³Nyasaye nomiyo Razon wuod Eliada bende obedo jasik Solomon. Jali noseringo moweyo ruodhe Hadadezer ma ruodh Zoba,

²⁴kendo kane Daudi osekawo Zoba, Razon nochoko mony, mobet jatendgi. Eka nokawo dalano.

²⁵Ne en jasik Israel ndalo duto mag Solomon.

²⁶Jatich Solomon moro bende nopiem kode. Ne ne Jeroboam wuod Nebat, ja-Efraim ma ja-Zareda. Nying min mare ne Zerua, ma chi liel.

²⁷Gima nokelo piem e ma: Noyudo Solomon gero Milo, kendo dino kuonde mopodho manie kor ohinga mar dala Daudi wuon mare.

²⁸Jeroboam ne ng’at maratego, kendo kane Solomon oneno ni ojatich matek, nokete jarit jotich duto michuno mar dhood Josef.

²⁹Chieng’ moro ka Jeroboam ne wuok Jerusalem, Ahija janabi, ma ja-Shilo noromo kode e yo. Ji ariyogo ne nie pap kendgi, to noyudo ka Ahija orwako law manyien.

³⁰Ahija nomako lawe manyienno, moyiecho kidienje apar gariyo.

³¹Nowacho ni Jeroboam niya, “Kaw kidienje apar obed magi nimar Ruoth Nyasaye ma Nyasach Israel owacho niya, ‘Winji, achiegni golo loch e lwet Solomon. Abiro miyi dhoudi apar,

³²to Solomon nodong’ gi dhoot achiel, mana nikechh ahero Daudi jatichna, kendo nikech Jerusalem dala maseyiero kuom dhoudi duto mag Israel.

³³Abiro golo loch kuome nikech oseweya, molamo Ashtoreth, nyasaye madhako mar jo-Sidon, gi Kemosh nyasach jo-Moab, kod Milkom nyasach jo-Amon, ka ok oluw yorena mondo otim gik malong’ona, kata rito chikena gi buchena kaka Daudi wuon mare notimo.

³⁴Kata kamano ok abi golo loch duto e lwete, to enosik jatelo ndalo duto mag ngimane, mana nikech ahero Daudi jatichna ma nayiero. En jal ma norito chikena gi buchena.

³⁵To abiro golo loch e lwet wuode, mi amiyi dhoudi apar.

³⁶Wuode to abiro miyo dhoot achiel, mondo Daudi jatichna obed gi taya maliel e nyima e Jerusalem, dala maseyiero mondo aketie nyinga.

³⁷To abiro kawi, mondo ibed ruodh Israel kaka chunyi dwaro.

³⁸Kiwinjo wechena duto, kendo kiwuotho e yorena, mi itimo gima long’ona, kirito chikena kod buchena kaka Daudi jatichna notimo, eka nabed kodi, kendo nagur dhoodi mosiko, kaka naguro dhood Daudi; kendo anamiyi piny Israel.

³⁹Kamano e kaka anasand koth Daudi, to ok nyaka chieng’.’ ”

⁴⁰Mano emomiyo Solomon ne dwaro nego Jeroboam, to Jeroboam noringo, modhi Misri ir Shishak ruodh Misri, kendo nodak kuno nyaka Solomon notho.

⁴¹Weche moko mag Solomon, gi timbene duto, kod riekone ondik e Kitap Timbe mag Solomon.

⁴²Kinde mane Solomon obedo ruodh Israel duto kodak Jerusalem noromo higni piero ang’wen.

⁴³Solomon notho, moyike e dala Daudi wuon mare. Rehoboam wuode nodoko ruoth kare.