Read luo 1 Ruodhi 12 Bible Online

1 Ruodhi 12 - luo bible

1 Ruodhi 12

¹Rehoboam nodhi Shekem, nikech jo-Israel duto nosechokore kuno mondo okete ruoth.

²To kane Jeroboam wuod Nebat owinjo wachno, noduogo oa Misri, nikech ne pod en Misri kuma nodhiye koringo ruoth Solomon.

³Ne gioro ne wach mondo obi Shekem, mi nobiro gi jo-Israel duto. Eka ne giwacho ni Rehoboam niya,

⁴“Wuoru miyowa ting’ mapek, emomiyo in koro ng’ad ting’ mapek mane oketo kuomwa, eka wanatini.”

⁵Nodwokogi ni, “Doguru mondi kuom ndalo adek, eka uduog ira.” Mi ne gidok.

⁶Ruoth Rehoboam noporo wach gi jodongo ma yande ng’ado rieko ni Solomon wuon mare ka pod ngima, kowachonigi niya, “Nyisauru gima dadwok jogo.”

⁷Ne gidwoke niya, “Yie ibed jatichgi kawuono, kidwokogi gi weche mabeyo, eka gibiro bedo jotichni ndalo duto.”

⁸To Rehoboam nodagi rieko mane jodongo ong’adone, mi noporo wach gi yawuowi ma mbesene mane ni kode,

⁹kopenjogi niya, “Ere kaka dadwok joma osekwaya mondo ang’adnigi ting’ mapek mane wuora oketo kuomgi?”

¹⁰Ne gidwoke niya, “Dwok joma okwayi mondo ing’adnigi ting’ mapek mane wuoru omiyogi, kiwachonigi kama: ‘Lith lweta matung’ duong’ moloyo nungo wuora.

¹¹Wuora ero nomiyou ting’ mapek, an to abiro medou moloyo. Wuora nochwadou gi del, an to abiro chwadou gi thomoni.’ ”

¹²Chieng’ mar adek, Jeroboam gi oganda nobiro ir ruoth Rehoboam, kaka nochikogi mondo gidog ire.

¹³Ruoth nodwokogi kager. Noweyo rieko mane jodongo ong’adone,

¹⁴to noluwo rieko mbesene, kowacho niya, “Wuora nomiyou ting’ mapek, an to abiro medou moloyo. Wuora nochwadou gi del, an to abiro chwadou gi thomoni.”

¹⁵Kamano ruoth ne ok odewo ji. To Ruoth Nyasaye ema nomiyo gigo otimore kamano, mondo ochop singruok mane omiyo Ahija ja-Shilo owacho ni Jeroboam wuod Nebat.

¹⁶ Kane jo-Israel oneno ni ruoth ok odewogi, ne gidwoke niya, “Waonge wat gi Daudi! Ok wan libamba achiel gi wuod Jesse! Wadoguru dala, wan jo-Israel. Un oganda Daudi, koro rituru mana dhoodu.”

¹⁷Mi jo-Israel nodok miechgi.

¹⁸Ruoth Rehoboam nooro Adoram mane jarit jogo michuno mondo oti githwon, to jo-Israel duto nogoye gi kite nyaka otho. Kuom mano, ruoth Rehoboam noidho gache piyopiyo, moringo nyaka Jerusalem mondo otony.

¹⁹Chakre chieng’no, joi-Israel osebet ka dagi loch dhood Daudi nyaka chil kawuono.

²⁰Kane jo-Israel duto owinjo ni Jeroboam oseduogo, ne giluonge e chokruok mi gikete ruodh Israel duto. Onge joma nodok ni Rehoboam kod jood Daudi mak mana jo-Juda kende, gi jo-Israel mane odak e dier jo-Juda.

²¹Kane Rehoboam ochopo Jerusalem, nochoko jolweny moyier alufu mia achiel gi piero aboro (180,000) kuom jo-Juda duto gi jo-Benjamin. Ne gidhi kedo gi jo-Israel, mondo gidwok loch ni Rehoboam wuod Solomon.

²²To wach Nyasaye nobiro ni Shemaya ng’at Nyasaye niya,

²³“Wuo kod Rehoboam wuod Solomon ruodh Juda, gi dhoodgi duto, gi jo-Benjamin, kod joge duto, kiwachonigi ni,

²⁴Ruoth Nyasaye owacho kama, ‘Kik udhi uked gi oweteu ma jo-Israel, to ng’ato ka ng’ato mondo odog dala, nikech gima timoreni oa kuoma.’ ” Ne giwinjo wach Ruoth Nyasaye, mi gidok miechgi kaka Ruoth Nyasaye nowacho.

²⁵Jeroboam nogero Shekem e piny gode mag Efraim, modak kuno. Bang’e noa kanyo, modhi ogero Penuel.

²⁶Jeroboam ne paro niya,

²⁷“Ka pod jogi dhi Jerusalem e Hekalu mar Ruoth Nyasaye, to chunygi biro dok ir Rehoboam ma ruodhgi, ma ruodh Juda, kendo loch biro dok ni dhood Daudi. Gininega, kendo ginidog ni Rehoboam ruodh Juda.”

²⁸ Omiyo ruoth Jeroboam noporo wach, moloso nyiruedhi ariyo mag dhahabu. Eka nowacho ni ji niya, “Un jo-Israel, usedhi Jerusalem moromo. Koro neuru nyisecheu mane ogolou e piny Misri!”

²⁹Noketo nyarwath achiel Bethel, yo milambo mar piny Israel, to machielo noketo Dan, yo nyandwat.

³⁰Wachni nomiyo jo-Israel obedo joketho, nikech ji moko ne dhi lamo nyarwath man Bethel, to ji moko ne dhi Dan.

³¹Nogero ut liswa e hembko mane oseloso moketoe jodolo moa e dhoudi duto, kata mane ok nyikwa Lawi.

³² Jeroboam nogolo chik mondo otim sawo due apar gabich, due mar aboro, machal gi sawo mane jo-Juda timo, kendo notimo misango ni nyiruedhi mane oloso Bethel. Nogolo jodolo matiyo e hembko mane oseloso, moketo Bethel.

³³Chieng’ due apar gabich, due mar aboro, due mane oseyiero, nosudo e dho kendo-mar-misango mane oseloso Bethel, motimo sawo ni jo-Israel kendo owang’o misango e kendono.