Read luo 1 Ruodhi 16 Bible Online

1 Ruodhi 16 - luo bible

1 Ruodhi 16

¹Ruoth Nyasaye nomiyo Jehu wuod Hanani owacho ni Baasha niya,

²“Ne amiyi duong’ kagoli e buru, kendo naketi jatend joga Israel, to eka iluwo timbe Jeroboam, kendo imiyo joga Israel obedo joketho, ka gimiya mirima nikech richogi.

³Emomiyo abiro yweyi oko, kaachiel gi jodhoodi, kendo anami odi bed kaka od Jeroboam wuod Nebat.

⁴Jodhood Baasha ma otho e dala guogi nocham; to mago ma otho oko, winy nocham.”

⁵Weche moko mag Baasha, kaachiel gi tekone, kod timbene duto, ondik e Kitap Weche mag Ndalo mag Ruodhi mag Israel.

⁶Koro Baasha notho moyike Tirza, eka Ela ma wuode nodoko ruoth kare.

⁷To Ruoth Nyasaye nosemiyo Jehu ma wuod Hanani owuoyo kuom Baasha gi dhoode nikech Baasha notimo gik ma Ruoth Nyasaye okwero. Baasha nomiyo Ruoth Nyasaye mirima gi timbene mane chalo gi timbe mag dhood Jeroboam, kendo nikech notieko dhoodno.

⁸E higa mar piero ariyo gauchiel mar loch asa ruodh Juda, Ela wuod Baasha nodoko ruodh Israel, mi norito piny kuom higni ariyo kodak Tirza.

⁹To Zimri, ma achiel kuom jotend geche mag lweny nojame, mokedo kode. E higa mar piero ariyo gabiriyo mar loch Asa ruodh Juda, kane oyudo Ela omer Tirza e od Arza mane jarit od ruoth,

¹⁰Zimri nodonjo, monege, kendo okawo lochne.

¹¹Kane Zimri osedoko ruoth, nonego jodhood Baasha duto, ma ok oweyo kata ng’ama dichwo achiel kuom wedene, kata osiepene.

¹²Kamano Zimri notieko dhood Baasha duto, kaka Ruoth Nyasaye nomiyo Jehu janabi owacho.

¹³Mano notimore nikech richo duto mag Baasha gi mag Ela wuode, ma ne gimiyo jo-Israel otimo, ka gimiyogo Ruoth Nyasaye ma Nyasach Israel mirima nikech nyiseche manono.

¹⁴Koro weche moko mag Ela, gi timbene duto, ondik e Kitap weche mag Ndalo mag Ruodhi mag Israel.

¹⁵Zimri nobet ruoth kuom ndalo abiriyo e higa mar piero ariyo gabiriyo mar loch Asa ruodh Israel, kodak Tirza. Nonwang’o ka jolweny ojot but Gibethon, dala jo-Filistia.

¹⁶Jolweny mane ojotgo nowinjo kiwacho ni, “Zimri osejamo ruoth, monego.” Emomiyo jo-Isarel duto mane nie kar jot noketo Omri ma jatend lweny mondo obed ruodh Israel chieng’no.

¹⁷Eka Omri, kaachiel gi jo-Israel duto, nowuok Gibethon, mi gidhi gilworo Tirza.

¹⁸To kane Zimri oneno ni dala osekaw, nodonjo e od ruoth, mochwinyo mach kuom odno, motho kanyo.

¹⁹Mano notimore nikech notimo gik mane Ruoth Nyasaye okwero, koluwo timbe Jeroboam, kendo nikech nomiyo jo-Israel obedo joricho.

²⁰Koro weche moko mag Zimri, gi timbene mag andhoga, ondiki e Kitap Weche mag Ndalo mag ruodhi mag Israel.

²¹Eka jo-Israel nopogore diriyo. Jomoko noluwo Tibni wuod Ginath, ka gidwaro kete ruoth, to jomoko noluwo Omri.

²²To joma noluwo Omri noloyo jo-Tibni wuod Ginath e lweny, mi ginego Tibni, kendo Omri nokawo loch.

²³E higa mar piero adek gachiel mar loch Asa ruodh Juda, Omri nodoko ruodh Israel, motiyo higni apar gariyo, Higni auchiel nodak Tirza,

²⁴eka bang’e nong’iewo got Samaria kuom Shemer gi fedha, ma dirom kilo piero abiriyo kendo nochielo godno gi ohinga, mochake ni Samaria, machal gi nying Shemer, ma wuon godno.

²⁵Omri notimo gik mane Ruoth Nyasaye okwero moloyo ji duto ma nokwongone,

²⁶nikech noluwo timbe duto mag Jeroboam wuod Nebat, kendo nomiyo jo-Israel obedo joricho, ka gimiyo Ruoth Nyasaye ma Nyasach Israel mirima nikech nyisechegi manono.

²⁷Koro weche moko mag Omri, gi tekone ma nonyiso, ondik e Kitap Weche mag Ndalo mag Ruodhi mag Israel.

²⁸Omri notho, moyike Samaria; Ahab wuode nodoko ruoth kare.

²⁹E higa mar piero adek gaboro mar loch Asa ruodh Juda, Ahab wuod Omri nodoko ruodh Israel, morito Israel kuom higni piero ariyo gariyo kodak Samaria.

³⁰To Ahab wuod Omri notimo gik ma Ruoth Nyasaye okwero moloyo jogo duto mane okwongone.

³¹Ok noluwo mana richo mag Jeroboam kende, to gima rachie moloyo mane otimo, en ni nokendo Jezebel nyar Ethbaal ruodh jo-Sidon, kendo notiyo ni Baal, kolame.

³²Noloso kendo-mar-liswa ni Baal e ot ma nogero ni Baal Samaria,

³³kendo nochungo siro milamo miluongo ni Ashera. Nomiyo Ruoth Nyasaye ma Nyasach Israel mirima moloyo ruodhi duto mag Israel ma nokwongone.

³⁴ Ndalo Ahab ema Hiel ja-Bethel nogeroe Jeriko. Kane oketo mise, Abiram wuode makayo notho, kendo ka nochungo dhorangeyene, Segub wuode machogo notho, mana kaka Ruoth Nyasaye nomiyo Joshua wuod Nun owacho.