Read luo 1 Ruodhi 17 Bible Online

1 Ruodhi 17 - luo bible

1 Ruodhi 17

¹ Elija ja-Tishbe modak e piny Gilead nowacho ni Ahab niya, “Gi nying Ruoth Nyasaye ma Nyasach Israel, kata tho ok nomok e lum, kata koth ok nochue e piny kuom hignigi, mak mana ka awacho.”

²Eka wach Ruoth Nyasaye nobiro ni Elija niya,

³“Aye ka, ichik yo wuok chieng’, kendo ipond e bath aora Kerith, man yo wuok chieng’ mar aora Jordan.

⁴Inimodh e aora, kendo asechiko agak mondo okelni chiemo kuno.”

⁵Nodhi kaka Ruoth Nyasaye nowacho, modak e bath aora Kerith man yo wuok chieng’ mar aora Jordan.

⁶Agak ne kelone kuon gi ring’o okinyi godhiambo, kendo nomodho e aorano.

⁷To bang ndalo moko aora nodwono, nikech koth ne onge e piny.

⁸Eka wach Ruoth Nyasaye nobirone niya,

⁹ “A malo, idhi Zarefath, dala moro e piny Sidon, idag kuno, nikech asechiko chi liel moro dalano mondo opidhi.”

¹⁰Omiyo nodhi Zarefath. To kane ochopo e dhoranga dala, noyudo dhako moro ka dondo yien. Noluonge, mokwaye ni, “Omnae pi matin e agwata mondo amodhi.”

¹¹To kane dhakono dhi, Elija nokowone wach ni, “Ikelnae kuon matin bende.”

¹²En to nodwoko ni, “Gi nying Ruoth Nyasaye ma Nyasachi, aonge gi gimoro motedi, mak mana sanja mar mogo modong’ e dak, kod mo matin e agulu. Koro eka adondo yien matin, mondo adhi atedgo chiemo, wacham gi wuoda, aye watho.”

¹³Elija nowachone niya, “Kik iluor. Dhi mondo itim kaka asewacho, to mokwongo ited kuon matin ikelna, eka bang’e ited modong’ ucham gi wuodi.

¹⁴Nimar ruoth Nyasaye owacho kama: ‘Mogo manie dak, kata mo manie agulu ok norum nyaka chop chieng’ ma Ruoth Nyasaye nokel koth e piny.’ ”

¹⁵Mi dhakono nodhi, motimo kaka Elija nowachone, kendo ne gichiemo gi joode kod Elija ndalo mang’eny.

¹⁶Mogo manie dak kod mo manie agulu ne ok orumo, kaka Ruoth Nyasaye nomiyo Elija owacho.

¹⁷Bang’ mano, tuo nogoyo wuod dhako ma wuon otno, kendo tuono nohinge, mi chunye nochot.

¹⁸Dhakono nopenjo Elija niya, “Yaye ng’at Nyasaye, in gang’o koda? Bironi osefwenyo richona koso, ma omiyo wuoda otho?”

¹⁹To Elija nodwoke niya, “Miya wuodi.” Eka nokawe kuome, moting’e kodhi kode e gorofa malo, kama nodakie mi nopiele e kitandane owuon.

²⁰Eka noywak ni Ruoth Nyasaye, kopenje niya, “Yaye, Ruoth Nyasaye ma Nyasacha, in ema isekelo masira ni chi liel ma adakgoni kinego wuode?”

²¹ Eka noriere kuom nyathi didek, koywak ni Ruoth Nyasaye niya, “Ruoth Nyasaye ma Nyasacha, akwayi, yie chuny nyathini oduogi.”

²²Ruoth Nyasaye nowinjo Elija, mi chuny nyathi noduogo, modoko mangima.

²³Elija nokawo nyathi, molorgo koa e gorofa. Nomiye min mare, kowacho niya, “Neye! Wuodi ngima.”

²⁴Dhakono nowacho ni Elija niya, “Kawuono eka ang’eyo ni in ng’at Nyasaye, kendo wach Ruoth Nyasaye mawuok e dhogi en adier.”