Read luo 1 Ruodhi 2 Bible Online

1 Ruodhi 2 - luo bible

1 Ruodhi 2

¹Kane Daudi chiegni tho, nolemo ni Solomon wuode niya,

²“An to eri adhi kuma ji duto mae piny dhiye; in to bed motegno kinyiso ni in dichwo.

³Mak chik Ruoth Nyasaye ma Nyasachi, kiwuotho e yorene, kendo kimako wechene, gi chikene kod buchene, kaka ondiki e chik Musa, kamoro amora midhiye.

⁴Kamano Ruoth Nyasaye nochopo singruok mane otimona, kowachona ni, ‘Ka yawuoti noritre, kendo nowuoth e nyima gi adiera gi chunygi duto kod parogi duto, to nyikwayi nobed ruodhi mag Israel nyaka chieng’.’

⁵ “Bende ing’eyo gima Joab wuod zeruya notimona. Ne onego Abner wuod Ner, kod amasa wuod Jether, mane jotend jolwenj Israel. E ndalo kue, nochulo kuor kuom gima notimore e lweny, kokelona buch remo nikech tho mar ng’at makare.

⁶Omiyo ti gi riekoni; wiye oseti lwar, to kik iwe otho gi kue.

⁷ To tim maber ni jood Barzilai ja-Gilead, kendo ikonygi, nikech ne girwaka gi ng’wono kane aringo Absalom owadu.

⁸ To kik wiyi wil gii Shimei wuod Gera ma ja-Benjamin moa Bahurim, nikech nokuong’a gi kuong’a malit, chieng’ mane awuok kadhi Mahanaim. To bang’, kane romona e aora Jordan, nakuong’orane gi nying Ruoth Nyasaye ni ok nanege.

⁹To koro kik iweye mak ikume. In ng’at mariek, kendo ibiro ng’eyo ng’ama owinjore itim, mondo otho tho mar masira, kata obedo ni wiye oseti lwar kamano.”

¹⁰Kamano Daudi notho, moluwo kwerene, kendo noyike Jerusalem.

¹¹ Nobet ruodh Israel kuom higni piero ang’wen. E Hebron nobedoe ruoth kuom higni abiriyo, to e Jerusalem higni piero adek gadek.

¹² Koro Solomon nobet ruoth kar Daudi wuon mare, kendo lochne nogurore motegno.

¹³To Adonija wuod Hagith nodhi ir Bathsheba min Solomon. Bathsheba nopenje niya, “Ibiro gi kue koso?” Nodwoke ni, “Ee, abiro gi kue.

¹⁴To adwaro kwayi gimoro.” Bathsheba nokone ni, “Wachi.”

¹⁵Eka nowacho niya, “Ing’eyo ni yande loch onego bed mara, kendo jo-Israel duto nogeno ni an ema nabed ruoth. To wach olokore, kendo owadwa osebet ruoth, nikech Nyasaye ema omiye.

¹⁶Koro adwaro kwayi gimoro achiel, to kik itama.” Bathsheba nokone ni, “Kwa akwaya.”

¹⁷ Nowacho niya, “Asayi, kwa ruoth Solomon mondo omiya Abishag nyar Shunam obed chiega, nikech ok onyal tami.”

¹⁸Nodwoke ni, “Ber, abiro wuoyoni gi ruoth.”

¹⁹Omiyo Bathsheba nodhi ir ruoth Solomon mondo okwaye gima Adonija dwaro. Ruoth nochung’ ka dhi romo ni min, mokulorene. Eka nobet e kom duong’ne, kendo nochiko jotich mondo okel kom ni min mare, mondo obed e bade korachwich.

²⁰Bathsheba nowachone niya, “An gi kwayo matin, kik idagi.” Ruoth nodwoke ni, “Kwa akwaya, mama ok nadagi.”

²¹Nowacho niya, “Yie mondo Abishag nyar Shunam obed chi Adonija owadu.”

²²Ruoth Solomon nopenjo min mare ni, “Ang’o momiyo ikwaya mondo Abishag nyar Shunam obed chi Adonija? Chal ka gima ikwaya mana ni mondo amiye loch, nimar en owadwa maduong’, kendo Abiathar jadolo, gi Joab wuod Zeruya, jodokne.”

²³Bang’ mano, ruoth Solomon nokuong’ore gi nying Ruoth Nyasaye kowacho niya, “Nyasaye mondo okweda ka Adonija ok otho nikech wachni!

²⁴Gi nying Ruoth Nyasaye mosemiyo agurora motegno e loch kar Daudi wuora, kendo mosemiyo jodhooda obedo jotelo kaka nosingore, akuong’ora ni, Adonija biro tho kawuono!”

²⁵Kuom mano ruoth Solomon nooro Benaya wuod Jehoyada monego Adonija.

²⁶ To ruoth nowacho ni Abiathar jadolo niya, “In to dog Anathoth dalau. Owinjore itho, to kata kamano koro ok nanegi, nikech niting’o Sanduk mar Ruoth Nyasaye e nyim Daudi wuora, kendo nineno chandruok kaachiel kode.”

²⁷ Omiyo Solomon nogolo Abiathar ni kik obed jadolo mar Ruoth Nyasaye. Kamano wach mane Ruoth Nyasaye owacho Shilo kuom od Eli nochopo kare.

²⁸Kane Joab owinjo wachno, noringo odhi e Hema mar Nyasaye, momako tunge kendo-mar-misango, nimar nodok ni Adonija,, kata obedo ni ne ok odok ni Absalom, e kinde mane Absalom ong’anyoe.

²⁹Nonyis Solomon ni Joab oseringo odhi e od Hema mar Ruoth Nyasaye, mobet e bath kendo-mar-misango. Mi Solomon nooro Benaya wuod Jehoyada, kochike ni, “Dhiyo, inege.”

³⁰Omiyo Benaya nodhi e Hema mar Ruoth Nyasaye, mowacho ni Joab niya, “Ruoth owacho ni mondo iwuogi.” To Joab nodagi, kowacho ni, “Ooyo, atho mana ka.” Eka Benaya nokelo ni ruoth wach mane Joab odwoke.

³¹Ruoth nokone niya, “Tim kaka owacho. Nege kendo iyike, mondo igol oko remo mane ochuero kayiem, kik sik kuoma, kendo kuom od wuora.

³²Ruoth Nyasaye biro kume kuom remo ma nochwero, nikech nonego ji ariyo makare moloyo gi ber. Nonego Abner wuod Ner, jatend jolweny mag Israel, kod Amasa jotend jolweny mag Juda kane daudi wuora kia.

³³Emomiyo rembgi mondo obed ewi Joab gi kothe nyaka chieng’, to ruoth Nyasaye mondo omed kue ni Daudi gi kothe gi ode kod lochne nyaka chieng’.”

³⁴Eka Benaya wuod Jehoyada nodhi monego Joab. Mi noyik Joab e dalane e thim.

³⁵Ruoth noketo Benaya wuod Jehoyada jatend jolweny kar Joab, to Zadok jadolo noketo kar Abiathar.

³⁶Eka ruoth noluongo Shimei, mowachone niya, “Ger ot Jerusalem, idagie, to kik iwuog oko ngang’,

³⁷nikech chieng’ ma iniwuogie, king’ado aora Kidron, to bed king’eyo ni nonegi. To rembi nodong’ e wiyi iwuon.”

³⁸Shimei nodwoko ruoth ni, “Gima iwacho ber. Anatim kamano.” Mi Shimei nodak Jerusalem kuom ndalo mang’eny.

³⁹To bang’ higni adek, wasumb Shimei ariyo noringo adhi ir Akish wuod Maaka, ruodh Gath. Kane onyis Shimei ni wasumbni mage ni Gath,

⁴⁰nogawo kanyna, moidho kodhi ir Akish, dwarogi. Kamano noomogi Gath, moduogogi.

⁴¹To ka nonyis Solomon ni Shimei osewuok Jerusalem, odhi Gath, kendo oseduogo,

⁴²noluongo Shimei, mowachone niya, “Namiyo ikuong’ori e nying Ruoth Nyasaye, kendo asiemi matek, kawachoni ni, ‘Ng’e adier ni chieng’ ma iniwuog oko kidhi kamoro amora, to nonegi.’ Kendo kidwoka ni, ‘Anatim kaka iwacho.’

⁴³Marang’o nitamori rito singruok ma nitimo e nying Ruoth Nyasaye, kod chik mane aketoni?”

⁴⁴Ruoth nomedo wacho ni Shimei niya, “Ing’eyo richo duto mane itimo ni Daudi wuora. Emomiyo Ruoth Nyasaye nodwok richoni e wiyi.

⁴⁵To an Solomon, nayud gueth, kendo loch Daudi nogurre e nyim Ruoth Nyasaye nyaka chieng’.”

⁴⁶Eka Ruoth nochiko Benaya wuod Jehoyada mondo oneg Shimei, mi Benaya nowuok oko, monege. Kamano loch nogurore e lwet Solomon.