Read luo 1 Ruodhi 22 Bible Online

1 Ruodhi 22 - luo bible

1 Ruodhi 22

¹Higni adek nokadho ka lweny onge e kind jo-Aram gi jo-Israel.

²To e higa mar adek, Jehoshafat ruodh Juda nolimo ruodh Israel.

³Ruodh Israel nopenjo jodonge ni, “Donge ung’eyo ni Ramoth-gilead en dalawa? To waling’ nadi mak wadhi wakawe kuom ruodh Aram?”

⁴Eka nopenjo Jehoshafat niya, “Iyie dhi kodwa mondo waked gi jo-Ramoth-gilead?” Jehoshafat nodwoko ruodh Israel niya, “Ayie! Joga e jogi, kendo faresena e fareseni.”

⁵Eka Jehoshafat nowacho ni ruodh Israel niya, “To mokwongo onego wapenj Ruoth Nyasaye wach.”

⁶Omiyo ruodh Israel nochoko jonabi ma dirom mia ang’wen, mopenjogi niya, “Adhi aked gi jo-Ramoth-gilead, koso awe?” Ne gidwoke niya, “Dhiyo, nikech Ruoth Nyasaye biro miyi dalano.”

⁷To Jehoshafat nopenje niya, “Janabi moro mar Ruoth Nyasaye onge ka, ma dwapenj wach koso?”

⁸Ruodh Israel nodwoke ni, “Ee, ng’at achiel pod odong’ ma dipenjnwa Ruoth Nyasaye wach, en Mikaya wuod Imla.” To Jehoshafat nowachone ni, “Kik iwuo kamano.”

⁹Eka ruodh Israel noluongo jatichne moro, mowachone niya, “Dhi piyo iluong Mikaya wuod Imla.”

¹⁰Koro noyudo ka ruodh Israel gi Jehoshafat ruodh Juda obet e alap manie dhoranga Samaria, ka ng’ato ka ng’ato nie kom duong’ne, korwako lawe mar ruoth, kendo jonabi duto ne koro wach e nyimgi.

¹¹Zedekia wuod Kenaana nosethedho tunge mag nyinyo morwako, mi nowacho niya, “Ruoth Nyasaye owacho kama: ‘Ibiro chwowo jo-Aram gi tungegi, nyaka itiekgi.’ ”

¹²Jonabi duto bende nokoro mana wach machal kamano, ka giwacho niya, “Dhi Ramoth-gilead mondo ilo. Ruoth Nyasaye biro chiwe e lweti.”

¹³Jaote mane odhi luongo Mikaya nowachone niya, “Jonabi duto osekoro wach nyalhodia, ka giwacho ni gima ber biro timore ni ruoth. In bende yie ikor wach maber kaka gisekorono.”

¹⁴To Mikaya nodwoke ni, “Akuong’ora gi nying Ruoth Nyasaye ni gima Ruoth Nyasaye biro wacho ema nawachi.”

¹⁵Kane Mikaya ochopo e nyim ruoth, ruoth nopenje niya, “Koso wawe?” Nodwoke niya, “Dhi mondo ilo! Ruoth Nyasaye biro chiwe e lweti.”

¹⁶Ruoth nowachone ni, “Asesiemi nyadidi ni kik iwach miriambo, to mak mana adiera kende e nying Ruoth Nyasaye!”

¹⁷ Mikaya nowacho niya, “Naneno jo-Isarel duto koke e gode, ka rombe maonge jakwath; kendo nawinjo ka Ruoth Nyasaye wacho niya, ‘Jogi onge gi wuon-gi, we mondo gidog e miechgi gi kue.’ ”

¹⁸Ruodh Israel nowacho ni Jehoshafat niya, “Donge nawachoni ni jali ok dikorna wach maber, to mana marach?”

¹⁹ Mikaya nowacho niya, “Koro winj wach Ruoth Nyasaye. Naneno Ruoth Nyasaye kobet e kom duong’ne, kendo ka oganda polo ochung’ e bathe koni gi koni.

²⁰Ruoth Nyasaye nopenjogi niya, ‘Ere ng’ama diho Ahab odhi Ramoth-gilead mondo otho kuno?’ To roho ka roho nochiwo parone,

²¹nyaka roho moro nosudo mochung’ e nyim Ruoth Nyasaye, kowacho niya, ‘An ema abiro hoye.’

²²Ruoth Nyasaye nopenje niya, ‘Ere kaka ibiro hoye?’ Nodwoke niya, ‘Abiro dhi bet roho mar miriambo e dho jonabini duto.’ Ruoth Nyasaye noyie ni, ‘Ee, in ema ibiro hoye, kendo iniloye. Dhiyo itim kamano.’

²³Koro sani Ruoth Nyasaye oseketo roho mar miriambo e dho jonabini duto. To kata kamano Ruoth Nyasaye oseng’adoni buch masira.”

²⁴Eka Zedekia wuod Kenaana nosudo machiegnii, mothalo lemb Mikaya, kapenje niya, “Ere kaka Roho mar Ruoth Nyasaye ne nyalo a kuoma mondo owuo kodi?”

²⁵Mikaya nodwoke niya, “Chieng’ ma inidonjie ot maiye mondo ipondie, eka ining’e!”

²⁶Ruodh Israel nowacho ni, “Makuru Mikaya, uter ir Amon jaduong’ Samaria, kod Joash wuod ruoth, mondo girite.

²⁷Wachnigiuru niya, ‘Ruoth owacho ni mondo uket ng’atni e od tuech, kendo umiye mana kuon abang’a gi pi kende, nyaka aduog ka angima.’ ”

²⁸To Mikaya nowacho niya, “Kiduogo kingima, to kara Ruoth Nyasaye ok osemiyo awuoyo!”

²⁹Kamano ruodh Israel gi Jehoshafat nodhi Ramoth-gilead.

³⁰Ruodh Israel nowacho ni Jehoshfat niya, “Kwadhi e lweny, to abiro rwako lewni moko mondo kik ji ng’eya, to in rwak lepi mag ruoth.” Kamano ruodh Israel noloko kite, modhi e lweny.

³¹To ruodh Aram nosechiko jodong lweny piero adek gariyo ma jotend gechene ni kik giked gi ng’at moro amora, to mak mana ruodh Israel kende.

³²Kane jotend geche oneno Jehoshafat, ne giwacho niya, “Nyaka bed ni jal cha e ruodh Israel.” Ne gilokore ire mondo giked kode, to Jehoshafat nogiyo.

³³Kane jotend geche oneno ni ok en ruodh Israel, ne giweyo lawe.

³⁴To ng’at moro nodiro asere, morodhno gi kor ruodh Israel e kind chumbe mag lweny ma norwako. Mi ruoth nowacho ni jariemb gache niya, “Wichri, igola e lweny, nikech ahinyora malit.”

³⁵Lweny nomedore chieng’no, to ne giyiengo ruoth e gache kochomo jo-Aram, kendo rembe nochuer aming’a e gari nyaka notho godhiambo.

³⁶Kane chieng’ dwaro podho, nogo milome ni oganda lweny niya, “Ng’ato ka ng’ato mondo odog thurgi,

³⁷nikech ruoth osetho.” Ne gidwoko ringre ruoth Samaria, mi giyike kuno.

³⁸Ne gilwoko geche e dho yawo mar Samaria, kuma mon ma jochode ne lwokoree, mi guogi nonang’o rembe. Kamano wach Ruoth Nyasaye nochopo kare.

³⁹Weche moko mag Ahab, gi timbene duto, kod ode mane olos gi lak liech, gi mier duto ma nogero, ondik e Kitap Weche mag Ndalo mag Ruodhi mag Israel.

⁴⁰Kane Ahab otho, Ahazia wuode nodoko ruoth kare.

⁴¹E higa mar ang’wen mar loch Ahab ruodh Israel, Jehoshafat wuod Asa nodoko ruodh Juda.

⁴²Nokawo loch ka en jahigni piero adek gabich, kendo norito piny kuom higni piero ariyo gabich kodak Jerusalem. Min mare ne nyinge Azuba nyar Shilhi.

⁴³Jehoshafat noluwo timbe duto mag Asa wuon mare, ma ok oweyo kata achiel, kendo timbene ne long’o e nyim Ruoth Nyasaye. To hembko mane ni kuonde moting’ore ne ok okethi, kendo ji ne pod timo misengni kendo wang’o ubani kuondego.

⁴⁴Jehoshafat bende notimo winjruok gi ruodh Israel.

⁴⁵Timbe moko duto mag Jehoshafat, gi tekone kod lwenjene ondik e Kitap Weche mag Ndalo mag ruodhi mag Juda.

⁴⁶Noriembo joterruok mag kuonde lemo mane otony e ndalo Asa wuon mare, mondo kik gidag e pinye.

⁴⁷Ndalogo Edom ne onge gi ruoth, to jaduong’ moro ema nobet jatelo kar ruoth.

⁴⁸Jehoshafat nohondho yiedhi madongo machal gi mago mane dhi Tarshish, mondo oomgo dhahabu Ofir. To ne ok gidhi, nikech ne gibarore mana Ezion-giber.

⁴⁹Eka Ahazia wuod Ahab nokwayo Jehoshafat niya, “Yie mondo jowa odhi gi jou e yiedhi mau.” To nodagi.

⁵⁰Jehoshafat notho, moyike but kwerene e dala Daudi kwar mare. Jehoram wuode nodoko ruoth kare.

⁵¹E higa mar apar gabiriyo mar loch Jehoshafat ruodh Juda, Ahazia wuod Ahab nodoko ruodh Israel kuom higni ariyo.

⁵²Notimo gik ma Ruoth Nyasaye okwero, koluwo timbe wuon mare, gi timbe min mare, kod timbe Jeroboam wuod Nebat, ma nomiyo jo-Israel obedo joricho.

⁵³Notiyo ni Baal, kendo nolame, komiyo Ruoth Nyasaye ma Nyasach Israel mirima mana kaka wuon mare notimo.