Read luo 1 Ruodhi 4 Bible Online

1 Ruodhi 4 - luo bible

1 Ruodhi 4

¹Solomon nobedo ruodh jo-Israel duto,

²kendo magi ne jodonge: Azaria wuod Zadok ne jadolo maduong’;

³Elihoref gi Ahija, ma yawuot Shisha, ne jogoro; Jehoshafat wuod Ahiud ne jachan weche;

⁴Benaya wuod Jehoyada ne jatend jolweny; Zadok gi Abiathar ne jodolo;

⁵Azaria wuod Nathan ne jatend jodong piny; Zebud wuod Nathan ne jadolo kendo osiep ruoth;

⁶Ahishar ne jaduong’ e od ruoth, kendo Adoniram wuod Abda ne jarit jogo ma nichuno mondo oti gi thwon.

⁷Solomon noketo jodongo apar gariyo mondo orit piny Israel duto, kendo ochok chiemo ma dirome kod joge. Ng’ato ka ng’ato kuomgi ne choko chiemo kuom due achiel e higa,

⁸kendo magi e nying jogo: Wuod Hur ne rito piny gode mag Efraim;

⁹wuod Deker ne rito Makaz, gi Shaalbim, gi Beth-shemesh kod Elon-beth-hanan;

¹⁰wuod Hesed ne rito Aruboth, kaachiel gi Soko, kod piny Hefer duto;

¹¹wuod Abinadab, ma chiege Tafath nyar Solomon, ne rito piny Dor duto;

¹²Baana wuod Ahilud ne rito Taanak gi Megido nyaka Beth-shean, chakre kama yo lorie koa Jezreel dhi Beth-shean, mopowore nyaka Abel-mehola mokiewo gi Zerethan, kendo nyaka loka Jokmeam;

¹³wuod Geber ne rito piny ramoth-Gilead; pinyno ema miech Jair wuod Manase man Gilead ne nitie, kod piny Argob man Bashan, mier piero auchiel mochiel gi ohinga, kendo man gi lodi mag mula.

¹⁴Ahinadab wuod Iddo ne rito Mahanaim.

¹⁵Ahimaaz ma nokendo Basemath nyar Solomon ne rito piny Naftali.

¹⁶Baana wuod Hushai ne rito piny Asher kod Bealoth.

¹⁷Jehoshafat wuod Parua ne rito piny Isakar.

¹⁸Shimei wuod Ela ne rito piny Benjamin.

¹⁹Geber wuod Uri ne rito piny Gilead; (enie piny mane Sihon ruodh jo-Amor, kod Og ruodh Bashan rito chon.) To ne nitie jaduong’ achiel kende mane rito piny Juda.

²⁰Jo-Juda gi jo-Israel ne ng’eny ka kuoyo mae dhonam; ne gidak gi kue, kendo gi mor.

²¹ Solomon nobedo ruodh pinje duto, chakre aora Yufrate, nyaka piny jo-Filistia kod tong’ piny Misri. Jopinjego duto ne chulo osuru, kendo ne tiyo ni Solomon kuom ndalo duto mag ngimane.

²²Chiemo mane ikelo ni Solomon odiechieng’ kodiechieng’ ne romo kama: gunde piero auchiel mag mogo mayom, gi gunde mia achiel gi piero ariyo mag mogo amoga,

²³gi ruedhi apar machwe ma kwayo kama ochiel, gi ruedhi piero ariyo ma kwayo e lek, gi rombe mia achiel, kaachiel gi nyikeye, gi ngepe, gi mwendni, kod gwen machwe.

²⁴Solomon noloyo ruodhi kod pinje duto koa yo milambo mar aora Yufrate, chakre Tifsa nyaka Gaza, mi nobedo gi kue e tong’ pinye duto.

²⁵E ndalo Solomon duto, jo-Juda gi jo-Israel duto nodak e miechgii gii kue, chakre Dan yo nyandwat, nyaka Beer-sheba, yo milambo.

²⁶ Solomon ne nigi udi alufu piero ang’wen moger ni farese mag gechene, bende ne en gi joidh geche alufu piero ang’wen moger ni farese mag gechene, bende ne en gi joidh farese alufu apar gariyo.

²⁷Jodong gwenge kande ne kelo chiemo ni ruoth Solomon kod jogo duto mane chiemo e dalane. Ng’ato ka ng’ato ne kelo chiemo kamano e due moketne, mak gimoro orem.

²⁸Ne gitero bende shairi gi lum mag farese gi mag kenje kamoro amora mane idwarogie.

²⁹Nyasaye nomiyo Solomon rieko gi winjo mathoth, to kod paro malach ka nam.

³⁰Kuom mano, rieko Solomon noyombo rieko mar jo yo wuokchieng’ duto. Noloyo bende rieko duto mag jo-Misri.

³¹ Noriek moloyo ji duto, kata Ethan ja-Ezra, gi Heman, gi Kalkol kod Darda, ma yawuot Mahol. Humbe nolak e pinje duto mokiewo kode koni gi koni.

³² Nochuogo ngeche alufu adek, kendo wende moromo alufu achiel kod abich.

³³Nowuoyo kuom kit yien duto, kochako gi sida madongo man Lebanon nyaka okinga[1] mati e kind kite mag ohinga. Nowuoyo bende kuom le gi winy gi gik mamol, kendo kuom rech.

³⁴Ji ne biro, koa e ogendini duto, mondo owinj rieko Solomon. Ruodhi duto mag piny ngima mane osewinjo humb riekone bende ne biro ire.