Read luo 1 Ruodhi 7 Bible Online

1 Ruodhi 7 - luo bible

1 Ruodhi 7

¹Solomon nogero dalane owuon kuom higni apar gadek, eka otieko gere.

²Nogero ot miluongo ni Od Bungu mar Lebanon Borne noromo mita piero abich, to lachne mita piero ariyo gabich, kendo borne modhi malo mita apar gabich. Nogere ewi laini adek mag sirni mag sida, moriwie bepe mag sida.

³Ne oumo wiye gi bap sida, mokadho ewi sirni piero ang’wen gabichgo. E laini ka laini nochanie sirni apar gabich.

⁴Ne nitie laini adek mag dirise mogaji, kendo dirisa ka dirisa nomanyore gi wadgi.

⁵Sisi mar dhoudi duto gi mag dirise duto ne romre, kendo dirisa ka dirisa nomanyore gi wadgi e laini adek.

⁶Bende nogero ot moro miluongo ni Od Sirni, ma borne noromo mita piero ariyo gabich, to lachne mita apar gabich. Ne en gi agola man gi sirni e nyime.

⁷Nogero bende Od Kom Duong’ mochwado gi bap sida, chakre tiend ot nyaka tado. Noluonge ni Od Bura nimar nong’adoe bura.

⁸ Solomon nogero ode owuon mane obiro dakie e laru machielo man tok Od Bura. Nolose machal gi Od Burano, kendo nogero ot moro machielo ma bende chal kode, ni mondo nyar Farao mane okendo odagie.

⁹Udigo duto noger gi kite mopa ma nengogi tek, chakre mise nyaka yiendambewa, kendo chakre laru mar Hekalu mar Ruoth Nyasaye nyaka laru maduong’. Kitego duto nong’ad gi musmeno marom kaka idwaro, kendo nopagi koni gi koni.

¹⁰Mise noger gi kite madongo ma nengogi tek, ma moko mita abich to moko mita ang’wen.

¹¹To ewigi ne nitie bap sida gi kite ma nengogi tek, ma moro ka moro opa kaka idwaro.

¹²Laru maduong’ nochiel gi ohinga moger gi kite mopa moluow didek, kod laini achiel mar bap sida, machal gi laru ma iye mar Hekalu mar Ruoth Nyasaye kod agola mar Hekalu.

¹³Eka ruoth Solomon nooro jaote Turo mondo oom ng’at moro miluongo ni Huram.

¹⁴Ne en wuod chi liel ma jadhood Naftali, to wuon mare ne ja-Turo, ma jatich mula. Ne en gi rieko gi winjo kod lony mar loso gimoro amora mar mula, kendo nobiro ir ruoth Solomon, molosone gik moko duto mane odwaro.

¹⁵Noloso sirni ariyo mag mula. Bor mar moro ka moro noromo mita ochiko, to alwora mar kore noromo mita auchiel. Igi norokore, kendo mith mula molosgigo ne romre gi lach lith lwedo ang’wen.

¹⁶Nolenyo mula molosogo gik moko ariyo machal gi agulini madongo, moumogo sirni. Bor mar agulu ka agulu noromo mita abich.

¹⁷Noloso gik moko ariyo mag mula e kido machal gi osera, mong’awogi kuom agulini mane nie wi agulini mane nie wi sirni. Agulu ka agulu ne nie wi osera achiel.

¹⁸Kamano bende noloso gik mong’inore ong’inore ka machunga e laini ariyo, molworo osera ma noumo agulini mane nie wi sirni.

¹⁹Agulini mane nie wi sirni mochung’ e nyim agolago, nolos gi mula machal gi wi oyungu, moromo mita ariyo.

²⁰Wi sirni ariyogo noyarore, kendo agulini moum gi osera noumore kuomgi, to gik mong’inore ong’inore mia ariyo mochan e laini ariyo nolworo agulu ka agulu.

²¹Nochungo sirnigo e agola mar Hekalu. Siro achiel nochungo korachwich, mochako ni Jakin. Siro machielo nochungo koracham, mochako ni Boaz.

²²Wi sirnigo noketie mula molos e kido machal gi wi oyungu. Kamano tich sirni norumo.

²³Eka nolenyo mula molosogo gima duong’ mating’o pi, machal gi karaya, mochako ni Nam. Lach dhoge ne romo mita abich, kendo tutne ne romo mita ariyo gi nus, to alwora mar dhoge mita apar gabich.

²⁴E bwo dhoge ne nitie gik ma maradadi mong’inore ong’inore, molwore. Noriedgi e laini ariyo, ma borgi romo mita apar gabich. Namno nochue kaachiel gi gik ma maradadigo.

²⁵Norenje e ng’e ruedhi apar gariyo mag mula. Ruedhi adek nomanyo yo nyandwat, to adek yo podho chieng’, adek yo milambo, kendo adek yo wuok chieng’. To wigi nodok ka iye. Kamano e kaka noten Namno e dieng’e ruedhigo.

²⁶Mith mula molosego ne romre gi lach lith lwedo ang’wen. Dhoge nolos ka dho kikombe, machal gi thiep oyungu. Nonyalo ting’o pi ma dirom depe alufu ang’wen.

²⁷Bende noloso rachungi apar mag mula mondo kareche orenjree. Bor mar rachungi ka rachungi ne romo mita ariyo, kendo lachne bende mita ariyo, to borne modhi malo mita achiel gi nus.

²⁸Rachungigo nolos kama: ne gin gi pewe moket e frembe.

²⁹To nolos sibuoche gi ruedhi kod kerubi mag mula e pewe mane ni e frembego. Nokiewo frembego, yo ka wi sibuoche gi yo ka wi ruedhi, kod yo ka tiendegi.

³⁰Rachungi ka rachungi ne nigi tiende ang’wen mag mula, mane nyalo lworore kuom chumbe mag mula. E tunge ang’wen mag rachungi, ne nitie sirni morenjie karaya. Sirnigo nolos gi mula, kendo nokiew bethegi.

³¹Chuma moting’oo karaya ne ni malo, moyombo wi rachungi gi mita achiel. En bende nokiewe. Dhoge nolworore mondo karaya orenjree maber. To pewe mag rachungi ne ok olworore, to ne gin gi bethe ang’wen maromre.

³²Tiende ang’wen go ne nie bwo pewe mag rachungi, to chumbe mane tiendegi lwororee nolos mobedo gimoro achiel gi rachungi. Bor modhi malo mar tielo ka tielo ne romo mita achiel.

³³To tiendego nolos machal gi tiend gach lweny. Chumbe mane tiende lwororee, kaachiel gi tiendegi giwegi, nolos gi mula.

³⁴Ne nitie sirni ang’wen e tunge ang’wen mag rachungi, to sirnigo nolos mobedo gimoro achiel kode.

³⁵To ewi rachungi ne nitie chuma molworore, ma borne modhi malo romo mita achiel. Chumano gi ramekni mage kod bethene nolos mobedo gimoro achiel kode.

³⁶Kuom rameknigo kod pewe, nopayoe kerubi gi sibuoche kod yiend othidhe kama thuolo ne yudoree, kendo nokiewgi gi oko.

³⁷Kamano e kaka noloso rachungigo duto apar mag mula, kendo romgi gi kitgi ne chal.

³⁸ Eka noloso kareche apar mag mula, ma moro ka moro ne nyalo ting’o pi ma dirom depe mia achiel, to lach karaya ka karaya noromo mita ariyo. Rachungi apargo moro ka moro, ne nigi karache owuon.

³⁹Noketo rachungi abich e bath Hekalu korachwich kendo abich e bathe koracham, to Nam cha noketo e bath Hekalu korachwich, yo wuok chieng’ mochomo milambo.

⁴⁰Achien Huram noloso agulini gi rajope kod tewni. Kamano notieko tije duto mag Odd Ruoth Nyasaye ni ruoth Solomon.

⁴¹Noseloso sirni ariyo, gi agulini madongo ariyo mane ni e wi sirni, gi oserni mag mula ma noumo agulini ariyogo,

⁴²kod gik mong’inore ong’inore mia ang’wen ma noried e laini ariyo e kor oserni;

⁴³gi rachungi apar, gi kareche apar mane orenj kuom rachungigo,

⁴⁴kaachiel gi Nam cha, gi ruedhi apar gariyo mane orenjie Namno;

⁴⁵gi agulini gi rajope kod tewni. Gigo duto mag Od Ruoth Nyasaye, Huram noloso ni ruoth Solomon gi mula mang’ang’ni.

⁴⁶Nolosogi e paw aora Jordan e lop chuech man e kind Sukoth gi Zerethan.

⁴⁷To Solomon ne ok opimo pek gigo, nikech ne ging’eny ahinya. Omiyo pek mula mane olosgigo ne ok ong’ere.

⁴⁸ Solomon noloso gik moko duto mag Od Ruoth Nyasaye. Noloso kendo-mar-misango mar dhahabu ma ting’o makati miketo e nyim Ruoth Nyasaye;

⁴⁹ gi rachung teyni apar mag dhahabu maler maiye. Bende noloso thiepe, gi teyni kod ramekni mag dhahabu;

⁵⁰gi kikombe, gi rangis teyni, gi degi, gi tewni mag ubani, kod tegni mag mach. Magi duto nolos gi dhahabu maler. Pata mag dhood Hekalu bende nolos gi dhahabu.

⁵¹ Kamano ruoth Solomon notieko tich duto mag Od Ruoth Nyasaye, eka noomo gik moko duto mane Daudi wuon mare osechiwo ni Ruoth Nyasaye, mi noketogi kar keno mar Od Ruoth Nyasaye. Ne gin fedha, gi dhahabu kod gik mamoko.