Read luo 1 Ruodhi 8 Bible Online

1 Ruodhi 8 - luo bible

1 Ruodhi 8

¹ Solomon nochoko jodong Israel duto Jerusalem, mondo oom Sandug Muma mar Ruoth Nyasaye e dala Daudi miluongo ni Sayun.

² Mi jo-Israel duto nochokore gi ruoth Solomon chieng’ sawo ma nitimo higa ka higa e due mar abiriyo miluongo ni Ethanim.

³Kane jodong Israel duto osebiro, jodolo noting’o Sandug Muma.

⁴Ne gikele kaachiel gi Hemb Romo, kod gik moko duto mane nie Hema mitiyogo tich Nyasaye. Jodolo kod jo-Lawi ema nokelogi.

⁵Ruoth Solomon gi jo-Israel duto ma nochokore kode ne nie nyim Sanduk, ka gitimo misengni gi rombe kod ruedhi mokadho akwana.

⁶Eka jodolo norwako Sandug Muma mar Ruoth Nyasaye kama nolosne e bwo buomb kerubi, ei ot maiye mar Hekalu miluongo ni Kama Ler Moloyo,

⁷nimar kerubi noyaro bwombegi ewi kama Sanduk betie, ka giume kaachiel gi ludhe miting’ego.

⁸Ludhego ne boyo ahinya, ma wigi ne nenore oko e Kama Ler mane nie nyim ot maiye, to ne ok ginen oko mar Hekalu. Pod gin kanyo nyaka chil kawuono.

⁹ Ne onge gimoro ei Sanduk mak mana kite ariyo mopa, mane Musa oketoe kane en Horeb, kuma Ruoth Nyasaye notimoe winjruok gi jo-Israel ka gia e piny Misri.

¹⁰ Kane jodolo owuok oa Kama Ler, bor polo nopong’o Od Ruoth Nyasaye,

¹¹mi ne ok ginyal tiyo tichgi mar dolo, nikech duong’ maler mar Ruoth Nyasaye nopong’o Hekalu.

¹² Eka Solomon nowacho niya, “A Ruoth Nyasaye, niketo wang’ chieng’ e polo malo, to isewacho ni nidag e mudho mandiwa.

¹³Koro asegeroni ot man gi duong’ mondo idagie nyaka chieng’.”

¹⁴Ruoth Solomon nowichore, kendo kane jo-Israel duto ma nochokore ochung’, noguedhogi.

¹⁵Nowacho niya, “Apako Ruoth Nyasaye ma Nyasach Israel, mosechopo singruok ma notimo ni Daudi wuora, kowachone ni,

¹⁶ ‘Chakre ndalo mane areso joga Israel, kagologi e piny Misri, pok ayiero dala moro kuom dhout Israel duto, mondo ogernae ot ma nyinga betie, to nayiero Daudi mondo obed jatend joga Israel.’

¹⁷ Ung’eyo ni Daudi wuora ne dwaro gero ot ni Ruoth Nyasaye ma Nyasach Israel,

¹⁸to Ruoth Nyasaye nowachone niya, ‘Nitimo maber, kuom paro gerona ot.

¹⁹ Kata kamano, in ok niger odno, to mana wuodi mibiro nywolo ema nogernago.’

²⁰Koro Ruoth Nyasaye osechopo singruok ma notimo, nikech asebet kar Daudi wuora, kendo an e ruodh Israel, mana kaka Ruoth Nyasaye nosingore. Mi asegero ot ni Ruoth Nyasaye ma Nyasach Israel,

²¹kendo aseikoe kar bet ni Sanduk moting’o weche mag singruok mane Ruoth Nyasaye otimo gi kwerewa, kogologi e piny Misri.”

²²Eka Solomon nochung’ e dho kendo-mar-misango mar Ruoth Nyasaye, e nyim jo-Israel duto. Norieyo bedene malo kochomo polo,

²³mowacho niya, “A Ruoth Nyasaye ma Nyasach Israel onge nyasaye moro e piny mwalo machal kodi. Irito singruokni mitimo gi jotichni ma wuotho e yoreni gi chunygi duto, kendo iherogi gi hera mosiko.

²⁴Isechopo singruok mane itimo ni Daudi wuora ma jatichni. Adier, gima niwacho ema koro isetimo.

²⁵ Emomiyo, Ruoth Nyasaye ma Nyasach Israel, chop singruok mane itimo ni Daudi wuora ma jatichni, kiwachone ni, ‘Anywolani nobed ruodhi mag Israel nyaka chieng’, to mana ka yawuoti oritore, kendo owuotho e nyima kaka isewuotho.’

²⁶Koro Nyasach Israel, wachni ma niwacho ni Daudi wuora ma jatichni, mondo otimre.

²⁷ “In Nyasaye, bende didag e piny? Ka kata polo maduong’ manadi ok nyal romi, to koro ot masegeronini direm marom nadi!

²⁸Kata kamano, Ruoth Nyasaye ma Nyasacha, yie mondo iwinj lemona gi kwayona, kendo iwinj ywakna makeloni tinende,

²⁹ Odiechieng’ gotieno mondo irang ot misewacho ni nyingi nobedieni, kendo iwinj lemo ma anakwa ka eri.

³⁰Iwinj kwayo ma an kod jogi Israel biro kwayi ka eri. Yie iwinj e polo kama idakie, to kiwinjo, to mondo iwenwa richowa.

³¹“Ka ng’ato otimo ni wadgi marach, kendo okete mondo ocham muma, mi okuong’ore e nyim kendo-mar-misango manie odni,

³²to iwinj e polo, kendo ing’ad buch jotichni, kikumo ng’at moketho, kendo kidwoko richone e wiye owuon. To jal makare mondo iket kare, kimiye pok moromo gi timne maber.

³³“Ka wasigu oloyo jogi Israel nikech gisekethoni, to koro gilokore iri, kendo gisayi e odni,

³⁴to yie mondo iwinjgi gi e polo, kiweyonigi richogi, kendo idwokgi e piny ma nimiyo kweregi.

³⁵“Ka polo ong’awo, ma koth onge, nikech jogi Israel osekethoni, mi gilemo ka eri, kendo giyie duong’ni ka gilokore giweyo richogi nikech ikumogi,

³⁶to yie mondo iwinjgi e polo, kiweyonigi richogi. Nyisgi yo maber ma onego giwuothie, kendo imi koth chue e pinyi misemiyo jogi mondo obed mwandugi.

³⁷“Ka kech kata dera mar tho marach nie piny, kata ka cham orochore ewi dongo, kata ka bonyo kata kungu nitie, kata ka wasigu olworo dala moro, kata ka tho kata tuo manade nitie,

³⁸mi ng’ato olami ka kwayi gimoro, korieyo bedene kochomo Hekaluni, (nimar ng’ato ka ng’ato ong’eyo gima chando chunye,)

³⁹to yie mondo iwinj e polo kama idakie. Iwene richone, kendo ichop lemone, kimiye moromo gi timbene, nikech in kendi ema ing’eyo chuny ji duto.

⁴⁰Kuom mano, mondo giluori ndalo duto ma gidakgo e piny ma nimiyo kwerewani.

⁴¹“Ka ng’ama wendo ma ok achiel kuom jogi Israel obiro mondo olem e Hekaluni, koa e piny mabor nikech nyingi,

⁴²(nimar ji biro winjo humb nyingi maduong’, gi mar lueti motegno kod mar badi morie,)

⁴³to yie mondo iwinj e polo kama idakie, kendo itim duto ma ng’at ma wendono okwayi. Kamano ji duto mae piny mondo ong’e nyingi, kendo oluori, mana kaka jogi Israel oluori, kendo mondo ging’e ni Hekalu ma asegeronini en mari adier.

⁴⁴“A Ruoth Nyasaye, ka jogi dhi e lweny kedo gi wasikgi kamoro amora miorogie, mi gilami, ka gichomo dala miseyiero kod Hekalu ma asegeroni,

⁴⁵to yie mondo iwinji e polo, lemo ma gikwayigo, kendo ikonygi.

⁴⁶“Ka gitimo gima isekwero, (nimar onge ng’ato ma ok kethi,) kendo ikecho kodgi, michiwogi e lwet wasikgi mondo otergi e tuech e piny wasikgigo, kuma bor kata kuma chiegni,

⁴⁷to eka bang’e giloko parogi e piny motuegieno, mi chunygi olokore, kendo gikwayi niya, ‘Waseketho, kwatimo wich teko kod richo,’

⁴⁸mi giduogo iri gi parogi duto, kendo gi chunygi duto, e piny wasikgi ma notuegieno, kendo gilami ka gichomo pinygi mane imiyo kweregi, kod dala mane iyiero, gi Hekalu ma asegeronini,

⁴⁹to yie mondo iwinj lemogi ma gikwayigo e polo kama idakie, kendo ikonygi.

⁵⁰Iwe ni jogi richogi duto ma gisetimo, kod chwanyruok duto ma gisechwanyorego e nyimi, kendo imi joma noterogi e tuech ong’wonnigi ka kechogi,

⁵¹nikech gin jogi, kendo gin mwanduni mane igolo e piny Misri, kireso e sand mager ka mach makakni.

⁵²“A Ruoth Nyasaye, winj kwayona gi kwayo mag jogi Israel, kichiko iti mondo iwinjgi sa moro amora ma giywaknie,

⁵³nimar niyierogi kuom ji duto mae piny mondo gibed jogi, kaka kwerewa Misri.”

⁵⁴Kane Solomon osetieko lamo Ruoth Nyasaye, kendo kwaye wechego duto, noa malo e nyim kendo-mar-misango mar Ruoth Nyasaye, kama nosegoyoe chonge piny, morieyo bedene kochomo polo.

⁵⁵Kane osechung’ noguedho oganda Israel duto gi dwol maduong’, kowacho niya,

⁵⁶ “Apako Ruoth Nyasaye, mosemiyo joge Israel kue, kochopo gik moko duto mane osingore. Onge kata wach achiel moserem kuom singruokne duto mabeyo mane omiyo Musa jatichne owacho.

⁵⁷Ruoth Nyasaye ma Nyasachwa obed kodwa, kaka nobet gi kwerewa. Kik owewa kata kik ojwang’wa,

⁵⁸to mondo okonywa keto chunywa kuome, wawuoth e yorene duto, kendo wamak chikene gi buchene kod wechene mane ochiko kwerewa.

⁵⁹Wechena ma asehombogo Ruoth Nyasaye ma Nyasachwagi mondo obed e nyime odiechieng’ gotieno, mondo okonya kaachiel gi joge Israel, kaka dwarore odiechieng’ kodiechieng’.

⁶⁰Ji duto mae piny ngima mondo ong’e ni Ruoth Nyasaye kende e Nyasaye, kendo onge moro.

⁶¹Koro mondo chunyu obed malong’o e nyim Ruoth Nyasaye ma Nyasachwa, kuwuotho e yorene, kendo kurito chikene, kaka utimo kawuono.”

⁶²Eka ruoth Solomon, kaachiel gi jo-Israel duto, notimo misengni ni Ruoth Nyasaye.

⁶³Solomon nochiwo ruedhi alufu piero ariyo gariyo, kod rombe alufu mia achiel gi piero ariyo, (120,000) kotimogo misengni mag sawo. Mano e kaka ruoth kod jo-Israel duto noyango Hekalu ni Ruoth Nyasaye.

⁶⁴Chieng’ono ruoth nopwodho dier laru mane nie nyim Hekalu mar Ruoth Nyasaye, nikech kanyo ema notimoe misengni miwang’o pep, gi misengni mag sawo, nikech kendo-mar-misango mar mula mane ok nyal timie misengnigo duto.

⁶⁵E ndalogo Solomon, kaachiel gi jo-Israel duto, notimo sawo maduong’ e nyim Ruoth Nyasaye kuom ndalo abiriyo. Oganda maduong’ nochokore kanyo moa e piny Israel duto, chakre kama idonjogo Hamath nyaka aora manie kind pinygi kod piny Misri.

⁶⁶To chieng’ mar aboro nomiyogi thuolo, mi gidok miechgi ka gidendo ruoth. Ne gimor kendo giil, nikech gik mabeyo duto mane Ruoth Nyasaye osetimo ni Daudi jatichne, kendo ni joge Israel.