Read luo 2 Ruodhi 1 Bible Online

2 Ruodhi 1 - luo bible

2 Ruodhi 1

¹Kane Ahab osetho, jo-Moab nodagi bet e bwo loch Israel.

²Chieng’ moro Ahazia nogore piny koa e dirisa mar gorofa mar ode man Samaria, mohinyore. Nooro joote mondo odhi openj Baal-zebub nyasach Ekron kata kobiro kwo.

³To malaika mar Ruoth Nyasaye nowacho ni Elija ja-Tishbe niya, “Dhi irom gi joote mag ruodh Samaria, kendo ipenjgi nia, ‘Nyasaye onge e Israel ka koso, momiyo udhi mana ir Baalzebub mondo upenje wach?

⁴Emomiyo Ruoth Nyasaye owacho ni ok nikwo, to initho mana e kitandani minindoeno.’ ”

⁵Kane jootego odok ir ruoth, nopenjogi gimomiyo giduogo.

⁶Ne gidwoke niya, “Ng’at moro oromo kodwa, mowachonwa ni mondo wadog ir ruoth ma noorowa, wanyise ni Ruoth Nyasaye owacho kama: ‘Nyasaye onge Israel koso, momiyo ioro ji ir Baalzebub nyasach Ekron mondo ipenje wach? Kuom mano ok nikwo, to iinitho manaa e kitanda minindoeno.’ ”

⁷Ruoth nopenjogi niya, “Jal moromo kodu, monyisou wechego, chal nadi?”

⁸ Ne gidwoke ni, “Norwako law ma rayier, kendo notweyo okanda mar del e nungone.” Ahazia nowacho ni, “Kara en Elija ja-Tishbe.”

⁹Eka ruoth nooro jatend lweny mane nigi jolweny piero abich mondo odhi ir Elija. Jatelono noyude kobet piny ewi got moro. Nowachone niya, “Ng’at Nyasaye, ruoth owacho ni mondo ilor!”

¹⁰ To Elija nodwoke ni, “Ka an ng’at Nyasaye adier, to mach mondo oa e polo, otieki kaachiel gi jogi piero abichgo.” Eka mach noa e polo motieko jalo gi joge.

¹¹Ruoth nochako ooro ni Elija jatelo machielo kod joge piero abich. Jalo nodhi ir Elija, mowachone niya, “Ng’at Nyasaye, ruoth owacho ni mondo ilor piyo!”

¹²To Elija nodwoke ni, “Ka an ng’at Nyasaye adier, to mach mondo oa e polo, otieki kaachiel gi jogi.” Mi mach noa e polo, motieke gi joge.

¹³Eka ruoth nooro jatelo mar adek kod joge piero abich. Jatelono nodhi, mogoyo chonge piny e nyim Elija, kosaye niya, “Yaye ng’at Nyasaye, akwayi ni mondo ngimana kod ngima ji piero abichgi obedni ka gima igeno e chunyi.

¹⁴Wasewinjo kaka mach noa e polo monego jotelo ariyogo, kaachiel gi jogi mag lweny, to koro mondo ngimana obedni ka gima igeno e chunyi.”

¹⁵Eka malaika mar Ruoth Nyasaye nowacho ni Elija niya, “Lor kode, kik iluore.” Omiyo nolor, mi ne gidhi kode ir ruoth.

¹⁶Eka Elija nowacho ni ruoth niya, “Ruoth Nyasaye owacho kama: ‘Ok nikwo, to initho mana e kitanda minindoeno, nikech nioro joote ir Baalzebub nysach Ekron mondo ipenje wach.’ ”

¹⁷Omiyo Ahazia notho kaka Ruoth Nyasaye nomiyo Elija owacho. Joram owadgi nodoko ruoth kare e higa mar ariyo mar loch Jehoram wuod Jehoshafat, ruodh Juda, nikech Ahazia ne onge gi wuowi.

¹⁸Timbe moko duto mag Ahazia ondik e kitap Weche Mag ndalo mag Ruodhi mag Israel.