Read luo 2 Ruodhi 10 Bible Online

2 Ruodhi 10 - luo bible

2 Ruodhi 10

¹Noyudo ka yawuot Ahab piero abiriyo odak Samaria. Omiyo Jehu nondiko barupe, mooro Samaria ni jodong dala kod joma ne pidho yawuot Ahabgo, kowacho niya,

²“Donge yawuot ruoth odak kodu, kendo un gi gilwenje, gi geche, gi farese, kod mier mochiel? Omiyo kuyudo baruani,

³to yieruru wuod ruoth moro, malong’o kendo motegno, uket e kom wuon mare, mondo uked ni dhood ruodhu.”

⁴To ne giluor ahinya ka giwacho niya, “Jehu noloyo ruodhi ariyo kande, koro wan to dwaloye nadi?”

⁵Omiyo jaduong’ od ruoth gi jaduong’ dala kaachiel gi jodongo kod jogo mane pidho yawuowigo nooro ni Jehu wach niya, “Wan jotichni, kendo wayie timo gimoro amora miwachonwa. Ok wanaket ng’at moro obed ruoth. Tim atima gima idwaro.”

⁶Eka Jehu nondikonigi barua machielo kawacho niya, “Kuyie dokna, kendo mako chikna, to ng’aduru wiye yawuot ruodhu, ukelna Jezreel kiny sa makama.” (Yawuot ruoth piero abiriyogo nodak kod jodong dala mane pidhogi.)

⁷Kane jodongogo oyudo baruano, ne ginego yawuot ruoth duto, mi giketo wiyegi e aditni, kendo giorogi Jezreel ni Jehu.

⁸Kane jaote onyiso Jehu ni osekel wiye yawuot ruoth, Jehu nowacho ni mondo odhurgi pidhe ariyo e dhorangach, gibed kanyo nyaka piny ru.

⁹Nowuok gokinyi mowacho ni ji duto niya, “An ema najamo ruodha, manego, omiyo un uonge bura e wachno; to koro, jogi duto ng’ama onego?

¹⁰Kuom mano ng’euru ni onge wach Ruoth Nyasaye kata achiel ma norem mak otimore kuom weche duto mane owacho kuom dhood Ahab, nikech Ruoth Nyasaye osetimo gima nomiyo Elija jatichne owacho.”

¹¹ Eka Jehu nonego jodhood Ahab duto ma nodong’ Jezreel, gi jodonge duto gi osiepene kod jodolo mage, nyaka ne onge kata ng’at achiel modong’.

¹²Jehu nowuok kadhi Samaria. To kane osechopo Beth-eked Kajokwath,

¹³nopo koromo gi owete Ahazia ruodh Juda. Nopenjogi niya, “Un ng’a gini?” Ne gidwoke ni, “Wan owete Ahazia, kendo wadhi limo joka ruoth.”

¹⁴Eka Jehu nowacho niya, “Makgiuru.” Mi ne gimakogi duto, ji piero ang’wen gariyo, kendo ne ginegogi pep e Yap Beth-eked.

¹⁵Kane Jehu osea kuno, noneno Jehonadab wuod Rekab ka biro romone. Nomose, mopenje niya, “Bende chunyi ler koda, kaka chunya ler kodi?” Jehonadab nodwoke niya, “Ee, chunya ler kodi.” Jehu nokone ni, “Ka kamano, to mak lweta.” Omiyo Jehonadab nomako lwete. Eka Jehu nokwaye mondo giidh gari,

¹⁶kowachone niya, “Bi wadhi mondo ine kaka atiyo ni Ruoth Nyasaye gi kinda.” Kamano Jehu notero Jehonadab Samaria gi geche.

¹⁷Kane gichopo Samaria, nonego jodhood Ahab duto ma nodong’ kuno, nyaka notiekogi chuth. Mano e kaka wach mane Ruoth Nyasaye owacho ni Elija nochopo kare.

¹⁸Eka Jehu nochoko jo-Israel duto, mowachonigi niya, “Ahab notiyo ni Baal matin nono, to an abiro tiyone moloyo.

¹⁹Omiyo luongnauru jonabi duto mag Baal gi ji duto malame kod jodolo mage. Kik ng’ato dong’ kata achiel, nikech adwaro timo ni Baal liswa maduong’, to ng’ama obare notho!” To Jehu nowuondogi kamano mondo oneg jogo duto mane lamo Baal.

²⁰Nochiko ni mondo olos chokruok mopwodhi mar lamo Baal. Mi ne gitimo kamano.

²¹Nooro wach e piny Israel duto, mi jolam Baal nobiro maonge kata ng’at achiel modong’. Ne gidonjo e od Baal, ma ot opong’ ma onge kata kama iboloe luth.

²²Jehu nonyiso jarit lep lemo mondo opogni jolam Baal duto lewnigo, mi nomiyogi.

²³Eka Jehu nodonjo e od baal gi Jehonadab wuod Rekab. Nowacho ni jolam Baal niya, “Nonuru mondo une ni onge jatich Ruoth Nyasaye moro e dieru ka, to mak mana jolam Baal kende.”

²⁴Eka nochako wang’o misango kendo timo liswa. To Jehu noseketo askeche piero aboro oko, mondo orit ot, kawachonigi niya, “Ka ng’ato kuomu oweyo ng’at achiel kuom joma aseketo e lwetu otony, to en ema notho kar ng’atno!”

²⁵Kane Jehu osetieko wang’o misango, nowacho ni askechego kod jotendgi niya, “Donjuru, uneggi; kik uwe ng’ato tony!” Kane askechego kod jotendgi osenegogi, ne giwito ringregi oko. Eka ne gidonjo e od Baal maiye,

²⁶mi gigoloe siro mane ji lamo, mi giwang’o.

²⁷Kamano ne giketho siro mar Baal, kendo ne gimuko od Baal, mi giloko choo, kendo pod en kamano nyaka chil kawuoono.

²⁸Mano e kaka Jehu notieko lemo mar Baal e Israel.

²⁹ Kata kamano, ne ok oweyo timo timbe maricho mane Jeroboam wuod Nebat omiyo jo-Israel otimo, nimar ji ne pod lamo nyiroye mag dhahabu mane ni Bethel gi mane ni Dan.

³⁰Ruoth Nyasaye nowacho ni Jehu niya, “Amor gi tich misetiyo, nikech isetimo ni dhood Ahab kaka nadwaro, omiyo nyikwayi nobed ruodhi mag Israel nyaka tieng’ mar ang’wen.”

³¹To Jehu ne ok odewo rito chik Ruoth Nyasaye ma Nyasach Israel gi chunye duto. Nomedo timo richo mane Jeroboam omiyo jo-Israel otimo.

³²Ndalogo ema Ruoth Nyasaye nochako thiroe jo-Israel, komiyo wasikgi kawo bethe pinygi. Hazael noloyo jo-Israel e pinygi duto,

³³chakre aora Jordan kochomo yo wuokchieng’. Nokawo piny Gilead gi Bashan duto, chakre Aroer but aora Arnon, koloyo jo-Gad gi jo-Reuben kod jo-Manase.

³⁴Weche moko mag Jehu, gi timbene kod tekone duto, ondik e Kitap Weche mag Ndalo mag Ruodhi mag Israel.

³⁵Jehu notho, moyike Samaria. Jehoahaz wuode nodoko ruoth kare.

³⁶Jehu nobet ruodh Israel kuom higni piero ariyo gaboro, kodak Samaria.