Read luo 2 Ruodhi 13 Bible Online

2 Ruodhi 13 - luo bible

2 Ruodhi 13

¹E higa mar piero ariyo gadek mar loch Joash wuod Ahazia ruodh Juda, Jehoahaz wuod Jehu nodoko ruodh Israel, mi norito kuom higni apar gabiriyo, kodak Samaria.

²Timbene ne richo e nyim Ruoth Nyasaye, koluwo richo mane Jeroboam wuod Nebat omiyo jo-Israel otimo. Ne ok oweyo kata achiel.

³Ruoth Nyasaye nokecho gi jo-Israel, mi nothoro ketogi e lwet Hazael ruodh Aram, kendo e lwet Ben-hadad ma wuode.

⁴To Jehoahaz nosayo Ruoth Nyasaye, mi Ruoth Nyasaye nowinje, nikech noneno kaka ruodh Aram sando jo-Israel.

⁵Omiyo Ruoth Nyasaye nomiyo jo-Israel ng’at ma noresogi e lwet jo-Aram, mi ne gidak e miechgi gi kue kaka chon.

⁶To kata kamano, ne ok giweyo timbe maricho mag dhood Jeroboam, mane Jeroboam omiyo jo-Israel otimo, to ne pod giluwogi. Kido mar nyasaye ma dhako miluongo ni Ashera bende ne pod ni Samaria.

⁷Ruoth Nyasaye noweyo ni Jehoahaz mana jolweny alufu apar, gi joidh farese piero abich, kod geche lweny apar, nikech ruodh Aram nosetiekogi mi gichalo mana mihudhi.

⁸Weche moko mag Jehoahaz, gi timbene duto, kod tekone, ondiki e Kitap Weche mag Ndalo mag Ruodhi mag Israel.

⁹Jehoahaz notho moluwo kwerene, mi noyike Samaria. Jehoash wuode nodoko ruoth kare.

¹⁰E higa mar piero adek gabiriyo mar loch Joash ruodh Juda, ema Jehoash wuod Jehoahaz nodokoe ruodh Israel, kendo norito piny kuom higni apar gauchiel, kodak Samaria.

¹¹En bende timbene ne richo e nyim Ruoth Nyasaye, koluwo timbe maricho duto mane Jeroboam wuod Nebat omiyo jo-Isarel otimo.

¹²Weche moko mag Jehoahaz gi timbene duto, kod teko mane okedogo gi Amazia ruodh Juda, ondiki e kitap Weche mag Ndalo mag Ruodhi mag Israel.

¹³Jehoahash notho, moluwo kwerene, mi noyike Samaria but ruodhi mag Israel. Jeroboam nodoko ruoth kare.

¹⁴ Kane Elisha tuo gi tuo mane biro nege, noyudo Jehoash ruodh Israel osedhi nene, moywage ni, “Wuora! Wuora! Isebedonwa kaka geche lweny gi joidh farese mag Israel.”

¹⁵Elisha nowachone niya, “Kaw tung’ gi aserini.” Mi notimo kamano.

¹⁶Eka Elisha nochako owachone niya, “Ywa atung’.” Mi noywayo. Elisha noketo luetene kuom luete ruoth,

¹⁷mowacho niya, “Yaw dirisa mochomo yo wuokchieng’” Mi noyawo. Eka Elisha nowachone niya, “Dir asere.” Kane osediro, Elisha nowachone niya, “Mano asech loch Ruoth Nyasaye, kendo onyiso ni ibiro loyo jo-Aram. Ibiro kedo gi jo-Aram e dala mar Afek nyaka itiekgi chuth.”

¹⁸Nowachone kendo niya, “Koro kaw aserini modong’.” Kane ruoth osekawogi, Elisha nowachone ni, “Chiel piny kodgi.” Mi nochielo piny nyadidek, moweyo.

¹⁹To Elisha, ng’at Nyasaye, nokecho kode, mowachone niya, “Da bed ni ichielo piny nyadibich kata nyadiuchiel, to eka da itieko jo-Aram chuth, to koro inilogi mana nyadidek kende.”

²⁰Elisha notho, moyiki. Kindego jo-Moab ne thoro monjo piny Israel higa ka higa.

²¹To chieng moro kane jomoko yiko ng’ato, ne gipo ka gineno wasigu kabiro, mi ne gibolo ringre ng’atno ei liend Elisha. To kane ringre ng’at mothono olwar kuom choke Elisha, chunye noduogo, mochung’.

²²Hazael ruodh Aram ne thago jo-Israel ndalo duto mag loch Jehoahaz.

²³To Ruoth Nyasaye nong’wononigi, kendo nokechogi, koparo singruok mane otimo gi Ibrahim kendo gi Isaka kod Jakobo. Emomiyo ne ok otiekogi, kata witogi oko ne ok owitogi.

²⁴Kane Hazael ruodh Aram otho, Ben-hadad wuode nodoko ruoth kare.

²⁵Jehoash wuod Jehoahaz nomayo Ben-hadad wuod Hazael mier mane Hazael ogolo e lwet Jehoahaz wuon mare e lweny. Jehoash noloyo Ben-hadad nyadidek, mi nodwoko miergo ni Israel.