Read luo 2 Ruodhi 15 Bible Online

2 Ruodhi 15 - luo bible

2 Ruodhi 15

¹[2] E higa mar piero ariyo gabiriyo mar loch Jeroboam ruodh Israel, Uzia wuod Amazia nodoko ruodh Juda.

²Ne en jahigni apar gauchiel kane ochako tich, kendo norito piny kuom higni piero abich gariyo, kodak Jerusalem, min mare ne nyinge Jekolia nyar Jerusalem.

³Timbene ne long’o e nyim Ruoth Nyasaye, mana kaka timbe Amazia wuon mare.

⁴To kata kamano hembko mane ni kuonde moting’ore ne ok okethi, kendo ji ne pod timo misengni kendo wang’o ubani kuondego.

⁵Ruoth Nyasaye nomiyo ruoth tuo mar dhoho, mi nodak e ot kar kende nyaka otho. Jotham wuode nodoko jatelo e od ruoth, morito piny,

⁶Weche moko mag Uzia, gi timbene duto, ondiki e Kitap weche mag Ndalo mag Ruodhi mag Juda.

⁷ Uzia notho, moyike but kwerene e dala Daudi. Jotham wuode nodoko ruoth kare.

⁸E higa mar piero adek gaboro mar loch Uzia ruodh Juda, Zekaria wuod Jeroboam nobet ruodh Israel kuom dueche auchiel, kodak Samaria.

⁹Timbene ne richo e nyim Ruoth Nyasaye, mana kaka timbe kwerene. Noluwo timbe maricho mane Jeroboam wuod Nebat omiyogo jo-Israel obedo joricho.

¹⁰Shalum wuod Jabesh nojame, monege Ibleam, kendo nokawo lochne.

¹¹Timbe moko duto mag Zekaria ondiki e Kitap Weche mag Ndalo mag Ruodhi mag Israel.

¹² Kamano weche mane Ruoth Nyasaye osingorego ni Jehu, kowachone ni nyikwaye nobed ruodhi mag Israel nyaka tieng’ mar ang’wen, nochopo kare.

¹³E higa mar piero adek gochiko mar loch Uzia ruodh Juda, Shalum wuod Jabesh nokawo loch, morito piny due achiel, kodak Samaria.

¹⁴To Menahem wuod Gadi noa Tirza modhi Samaria. Nonego Shalum wuod Jabesh kuno, mokawo lochne.

¹⁵Koro timbe moko duto mag Shalum, kendo kaka nojamo Zekaria, ondiki e Kitap Weche mag Ndalo mag Ruodhi mag Israel.

¹⁶E ndalogo ema Menahem nokawoe Tapua, kaachiel gi mbape duto, chakre Tirza kadhi nyime. Nonego jo-Tapua duto, koriedo iye mon mayach, kendo noketho dalano chuth, nikech ne gidagi yawone dhorangach.

¹⁷E higa mar piero adek gochiko mar loch Uzia ruodh Juda, Menahem wuod Gadi nodoko ruodh Israel, morito piny kuom higni apar, kodak Samaria.

¹⁸Timbene ne richo e nyim Ruoth Nyasaye, kaka timbe maricho mane Jeroboam wuod Nebat omiyogo jo-Israel obedoo joricho.

¹⁹Ndalogo e Pul ruodh Asuria nomonjoe e piny Israel, to Menahem nomiyo Pul fedha moromo kilo alufu mia adek, mondo Pul okonye jiwo lochne obed motegno.

²⁰Menahem noloso pesa kuom jo-Israel man gi mwandu, mochulogo ruodh Asuria, koketo ni ng’ato ka ng’ato nus kilo mar fedha. Omiyo ruodh Asuria noweyo piny Israel, mi nodok thurgi.

²¹Koro weche moko mag Menahem, gi timbene duto ondiki e Kitap Weche mag Ndalo mag Ruodhi mag Israel.

²²Menahem notho, moluwo kwerene, mi Pekahia wuode nodoko ruoth kare.

²³E higa mar piero abich mar loch Uzia ruodh Juda ema Pekahia wuod Menahem nodokoe ruodh Israel, morito piny kuom higni ariyo, kodak Samaria.

²⁴Timbene ne richo e nyim Ruoth Nyasaye, kaka timbe mane Jeroboam wuod Nebat omiyogo jo-Israel obedo joricho.

²⁵To Peka wuod Ramalia, mane jaduong’ne mar lweny, kaachiel gi jo-Gilead piero abich, nojame, monege Samaria e od ruoth. Kane Peka osenege kamano, nokawo lochne.

²⁶Koro weche moko mag Pekahia, gi timbene duto, ondiki e Kitap Weche mag Ndalo mag Ruodhi mag Israel.

²⁷E higa mar piero abich gariyo, mar loch Uzia ruodh Juda, ema Peka wuod Remalia nodokoe ruodh Israel, morito piny kuom higni piero ariyo, kodak Samaria.

²⁸Timbene ne richo e nyim Ruoth Nyasaye, kaka timbe mane Jeroboam wuod Nebat omiyogo jo-Israel obedo joricho.

²⁹E ndalo mag loch Peka ruodh Israel, Tiglath-pileser ruodh Asuria nobiro, mokawo Ijon gi Abel-bethmaaka gi Janoa gi Kedesh gi Hazor gi Gilead kod Galili. Kamano nokawo piny Naftali duto, motero jopinyno nyaka Asuria e tuech.

³⁰To e higa mar piero ariyo mar loch Jotham wuod Uzia, Hoshea wuod Ela nojamo Peka wuod Ramalia, monego, mi okawo lochne.

³¹Koro weche moko mag Peka, kod timbene duto, ondiki e Kitap Weche mag Ndalo mag Ruodhi mag Israel.

³²E higa mar ariyo mar loch Peka wuod Remalia ruodh Israel, Jotham wuod Uzia nodoko ruodh Juda.

³³Ne en jahigni piero ariyo gabich kane ochako tich, morito piny kuom higni apar gauchiel, kodak Jerusalem. Min mare ne nyinge Jerusha nyar Zadok.

³⁴Timbe Jotham ne long’o e nyim Ruoth Nyasaye kaka timbe Uzia wuon mare.

³⁵To kata kamano hembko mane ni kuonde moting’ore ne ok okethi. Ji ne pod timo misengni kendo wang’o ubani kuondego. Jotham ema nogero dhorangach mamalo mar Od Ruoth Nyasaye.

³⁶Koro weche moko mag Jotham gi timbene duto, ondiki e Kitap Weche mag Ndalo mag Ruodhi mag Juda.

³⁷E ndalogo Ruoth Nyasaye nochako ooro Rezin ruodh Aram kod Peka wuod Remalia mondo omonj jo-Juda.

³⁸Jotham notho, moyik but kwerene e dala Daudi kwar mare. Ahaz wuode nodoko ruoth kare.