Read luo 2 Ruodhi 18 Bible Online

2 Ruodhi 18 - luo bible

2 Ruodhi 18

¹E higa mar adek mar loch Hoshea wuod Ela ruodh Israel, Hezekia wuod Ahaz nodoko ruodh Juda.

²Ne en jahigni piero ariyo gabich kane ochako tich, morito piny kuom higni piero ariyo gochiko, kodak Jerusalem. Min mare ne nyinge Abija nyar Zekaria.

³Timbe Hezekia ne long’o e nyim Ruoth Nyasaye mana kaka timbe Daudi kwar mare.

⁴ Noketho ut lemo mag hembko, kaachiel gi sirni milamo mag kite gi mag yien. Thuond mula mane Musa oloso, bende nong’ado matindotindo, nikech nyaka chop ndalogo, jo-Israel ne pod wang’oe ubani. Thuondno niluongo ni Nekushtan, (tiende ni, gima olos gi mula.)

⁵Hezekia nogeno Ruoth Nyasaye ma Nyasach Israel, kendo onge ruoth moro machal kode kuom ruodhi duto mag Juda,

⁶nikech nopadore kuom Ruoth Nyasaye chutho, ka ok oweyo luwe, kendo norito chike duto mane Ruoth Nyasaye omiyo Musa.

⁷Kuom mano, Ruoth Nyasaye ne ni kode, kendo noguedho gik moko duto mane otimo. Nodagi bet e bwo loch Asuria,

⁸kendo noloyo jo-Filistia e lweny, kokawo mier madongo gi matindo duto, nyaka Gaza gi mier mokiewo kode.

⁹E higa mar ang’wen mar loch Hezekia, kane Hoshea wuod Ela osebet ruodh Israel kuom higni abiriyo, Shalmaneser ruodh Asuria nomonjo Samaria.

¹⁰Nolworo dalano kuom higni adek, mokawo e higa mar auchiel mar loch Hezekia, kane Hoshea wuod Ela osebet ruodh Israel kuom higni ochiko.

¹¹Ruodh Asuria nodaro jo-Israel, motero nyaka Asuria, mi noketo moko kuomgi mondo odag Hela but aora Habor man Gozan, to moko noketo e miech jo-Media.

¹²Wachno notimore nikech ne ok girito chik Ruoth Nyasaye ma Nyasachgi, to ne giketho singruok mane gitimo kodgi. Ne ok gimako weche duto mane Musa jatich Ruoth Nyasaye ochikogi, kata dewogi bende ne ok gidewo.

¹³E higa mar apar gabich mar loch Hezekia, Senakerib ruodh Asuria nomonjo miech Juda duto mochiel gi ohinga, mokawo.

¹⁴Eka Hezekia ruodh Juda nooro wach ni ruodh Asuria mane oyudo ni Lakish niya, “Aseketho to we kedo koda kendo, nikech ayie chulo gimoro amora midwaro.” Kamano ruodh Asuria nodwaro kuome fedha maromo kilo alufu apar, kod dhahabu moromo kilo alufu achiel.

¹⁵Mi Hezekia nomiye fedha duto mane nie Od Ruoth Nyasaye, kod mane nie kar keno mar od ruoth.

¹⁶E ndalono ema Hezekia nogoloe dhahabu mane obawgo thike kod sirni mag dhood Ruoth Nyasaye, momiyo ruodh Asuria.

¹⁷Ruodh Asuria nooro Tartan gi Rabsaris kod Rabshake, ma jodonge, kaachiel gi oganda lweny maduong’, ir Hezekia, mi ne giwuok Lakish ka gidhi Jerusalem. Kane gichopo kuno, ne gichung’ but fereji ma golo pi e yawo mamalo, e yo maduong’ madhi e puodho miluongo ni Puoth Jalwok Lewni.

¹⁸Ne giluongo ruoth, to Eliakim wuod Hilkia, mane jaduong’ od ruoth, gi Shebna jagoro, kod Joa wuod Asaf, ma jachan weche mag piny, ema ne jowuok irgi.

¹⁹Rabshake nowachonigi ni mondo ginyis Hezekia ni ruoth maduong’, ma ruodh Asuria owachone kama: “Ere gimomiyo idhialori kamano?

²⁰Iparo ni weche awecha nyalo lokore rieko kod teko mar loyo lweny? En ng’a ma igeno ni biro konyi piem koda?

²¹Ang’eyo ni idhialori nikech jo-Misri, to nyaka ing’e ni Farao ruodh Misri chalo gi odundu mobarore, ma ka ng’ato oyiengoree, to pilore, kendo chwowo lwete. Mano e kaka farao ruodh Misri chalo ni ji duto mogeno kuome.

²²To kuwachona ni ugeno kuom Ruoth Nyasaye ma Nyasachu, donge en ema Hezekia oseketho hembkone gi kuonde mitimonee misengni kochiko jo-Juda gi jo-Jerusalem ni nyaka lem mana e nyim kendo-mar-misango man Jerusalem?

²³“Koro in Hezekia, singri ni ruodh Asuria ma atiyone! Ayie miyi farese alufu ariyo, kapo nono ni inyalo yudo joma diidhgi!

²⁴Ka jo-Misri ema igeno ni biro konyi gi geche kod joidh farese, to ere kaka iparo ni dilo kata mana achiel matinie moloyo kuom jotend lweny mag ruodha?

²⁵Koso iparo ni asebiro mana ni mondo amonj amonja Jerusalem, akethi, ka ok Ruoth Nyasaye ema ne owachona ni mondo abi amonj pinyni, akethi!”

²⁶Eka Eliakim wuod Hilkia gi Shebna kod Joa nowacho ni Rabshake niya, “Wasayi, yie iwuo kodwa gi dho Aram, nikech en dhok mwang’eyo, to we wuoyo kodwa gi dho Hibrania kae, nimar joma ni ewi ohinga nyalo winjowa.”

²⁷To Rabshake ne odwokogi, kapenjogi niya, “Uparo ni un kod ruodhu kende ema ne ruodha oora iru mondo awachnu wechegi? Ooyo, noora ir joma ni ewi ohinga, ma ochunore ni nyaka cham chiethgi, kendo madh lachgi, mana kaka un bende unutim!”

²⁸Bang’ mano Rabshake nochung’ mokok gi duol maduong’ gi dho Hibrania niya, “Winjuru wach ruoth maduong’ ma ruodh Asuria!

²⁹Owacho ni kik uyie Hezekia wuondu, nikech ok onyal resou e lweta.

³⁰Kik uwe ohou ni mondo ugen kuom Ruoth Nyasaye, kowachonu ni, adier Ruoth Nyasaye ema noresu, kendo ni ruodh Asuria ok nokaw dala maduong’ni.

³¹Kik uwinj wach Hezekia, nimar ruodh Asuria owacho niya, ‘Winjreuru koda mondo ubi ira, mi ng’ato ka ng’ato kuomu nocham olemb mzabipe kod ng’ope, bende nomodh pi e sokone owuon,

³²nyaka chop abi, mi agolu kendo ateru e piny machal gi pinyuni, mondo kik utho, to ubed mana mangima. En piny ma cham gi mzabibu chiekie maber, kendo ma makati gi divai gi mor zeituni kod mor kich ng’enyie. To kik uwinj Hezekia kawuondou ni Ruoth Nyasaye biro konyou.

³³Bende nitie nyasach piny moro mosereso pinye e lwet ruodh Asuria?

³⁴Nyiseche mag Hamath gi arpad ni kanye? Koso ere nyiseche mag Sefarvaim gi Hena kod Iva? Bende ne gireso Samaria e lweta?

³⁵Kuom nyiseche duto mag pinjego, ere mosereso Jerusalem e lweta?’ ”

³⁶To ji noling’ thi, ma onge ng’at modwoke kata wach achiel, nikech ruoth Hezekia nosegolo chik ni kik dwoke.

³⁷Eliakim wuod Hilkia ma jaduong’ od ruoth, gi Shebna jagoro kod Joa wuod Asaf ma jachan weche mag piny ne jobiro ir Hezekia, ka joyiecho lepgi, mi ginyise gima ne Rabshake owacho.