Read luo 2 Ruodhi 2 Bible Online

2 Ruodhi 2 - luo bible

2 Ruodhi 2

¹E ndalo mane Ruoth Nyasaye dwaro tero Elija e polo gi kalausi, noyudo ka Elija gi Elisha josewuok Gilgal.

²Elija nowacho ni Elisha niya, “Yie idong’ ka, nikech Ruoth Nyasaye oora nyaka Bethel.” To Elisha nodwoke ni, “Gi nying Ruoth Nyasaye, kendo gi nyingi iwuon, ok naweyi.” Omiyo ne gidhi nyaka Bethel.

³To oganda jonabi ma nodak Bethel nowuok modhi ir Elisha, mopenje niya, “Bende ing’eyo ni Ruoth Nyasaye biro kawo jaduong’ni kawuono?” Nodwokogi niya, “Ee, ang’eyo kamano, to ling’uru.”

⁴Elija nowacho ni Elisha niya, “Yie idong’ ka, nikech Ruoth Nyasaye oora nyaka Jeriko.” To nodwoke niya, “Gi nying Ruoth Nyasaye, kendo gi nyingi iwuon, ok naweyi.” Omiyo ne gidhi nyaka Jeriko.

⁵Oganda jonabi mane odak Jeriko nosudo machiegni gi Elisha, mopenje niya, “Bende ing’eyo ni Ruoth Nyasaye biro kawo jaduong’ni kawuono?” Nodwokogi niya, “Ee, ang’eyo kamano, to ling’uru.”

⁶Eka Elija nowachone niya, “Yie idong’ ka, nikech Ruoth Nyasaye oora nyaka aora Jordan.” To nodwoke niya, “Gi nying Ruoth Nyasaye, kendo gi nyingi iwuon, ok naweyi.” Omiyo ji ariyogo nodhi adhiya.

⁷Ji piero abich kuom oganda jonabi bende nodhi, mochung’ kama ochwalore kodgi, ka ji ariyogo chung’ e dho aora.

⁸Eka Elija nobano lawe mar abola, mochwadogo pi, mi pi nopogore koni gi koni, eka ji ariyogo noyudo thuolo mar ng’ado aora kotwo.

⁹ Kane giseidho loka, Elija nowacho ni Elisha niya, “Yier gima datimni, kapok okawa kuomi.” Elisha nokone ni, “Akwayi mondo ayud pok ariyo mag teko ma in go.”

¹⁰Elija nodwoke ni, “Ikwayo gima tek, to kata kamano, kinena sa mikawa kuomi, to gima ikwayo notimreni. To ka ok inena, to ok notimreni.”

¹¹To kane pod giwuotho, kendo giwuoyo, gari mar mach gi farese mag mach nobiro, mopogogi, kendo Elija noidho gi kalausi nyaka e polo.

¹² Elisha noneno gima notimore, mokok niya, “Wuora, wuora, aneno geche Israel kod joidh faresene!” Kamano Elija nolal e wang’e. Eka Elisha noyiecho lepe owuon kidienje ariyo.

¹³Nokwanyo law abola mar Elija mane olwar piny, kendo nodok mochung’ e dho aora Jordan.

¹⁴Nochwado pi gi law Elijano kowacho niya, “Ere Ruoth Nyasaye ma Nyasach Elija?” Kane osechwado pi kamano, pi nopogore koni gi koni, mi nong’ado aora.

¹⁵Kane oganda jonabi modak Jeriko onene gi kuma bor, ne giwacho niya, “Teko mane Elija nigo, koro odok ni Elisha.” Ne gidhi romone, mi gikulorene,

¹⁶ka giwachone niya, “Wan gi joma rateke piero abich. Yie mondo gidhi gidwar jaduong’ni cha, dipo ka Roho mar Ruoth Nyasaye otere, moweye ewi got, kata e hoho moro.” Nodwokogi ni, “Kik uorgi.”

¹⁷To ne gikwaye kidhuku kidhuku, nyaka wiye nokuot, mowachnigi niya, “Ara, orgiuru.” Omiyo ne gioro ji piero abich, momanyo Elija kuom ndalo adek, to ne ok giyude.

¹⁸Ne giduogo Jeriko kuma Elisha ne pod ritogie, mi nowachonigi niya, “Donge nakwerou ni kik udhi?”

¹⁹Jo-Jeriko nowacho ni Elisha niya, “Jaduong’ neye kaka dalawa oger kama ber, mak mana pi ema ok ber, kendo lowo bende rach.”

²⁰Nodwokogi niya, “Kelnauru agulu manyien, kendo ketieuru kado.” Mi ne gitimo kamano.

²¹Eka nodhi e soko, moboloe kado, kowacho niya, “Ruoth Nyasaye owachoo kamaa: Aseloso pigni maber; chakre kawuono ok nokel tho, kendo ok nomon piny chiek.”

²²Kamano pigno osiko ka ber nyaka chil kawuono, kaka Elisha nowacho.

²³Elisha noa kuno, modhi Bethel to kane pod enie yo koidho thur, rawere moko nowuok e dalano, monyiere, ka giyanye ni, “Rabondoni, dhi adhiya! Rabondoni, dhi adhiya!”

²⁴Nogoyo machiemo monenogi, kendo nokuong’ogi e nying Ruoth Nyasaye. Ondiegi[1] ma mon ariyo noa e bungu, mokidho rawere piero ang’wen gariyo kuomgi.

²⁵Eka Elisha noa kuno, modhi nyaka got Karmel. To koa Karmel, nodok Samaria.