Read luo 2 Ruodhi 25 Bible Online

2 Ruodhi 25 - luo bible

2 Ruodhi 25

¹Zedekia nopiem gi ruodh Babulon, modagi lochne. Omiyo chieng’ due apar, due mar apar, e higa mar ochiko mar loch Zedekia, Nebukadnezar ruodh Babulon nobiro gi joge mag lweny, mi gimonjo Jerusalem. Ne gigero kambi oko mar dala, eka ne gichielone ohinga molwore.

²Ne gigoyo ni Jerusalem ageng’a nyaka higa mar apar gachiel mar loch Zedekia.

³Koro kech ne lich e dalano, kendo ji ne onge gi chiemo chuth.

⁴ Chieng’ due ochiko, due mar ang’wen, jo-Babulon nomwomo ohinga mar dala, mi Zedekia notemo ringo gi jolwenje duto gotieno, kata obedo ni jo-Babulon nosedhogo dala koni gi koni. Ne giluwo rangach mane nie kind ohingni ariyo, ka ging’ado orundu ruoth, mi gichiko yo holo mar Jordan.

⁵To jolweny mag babulon nolawo Zedekia, mojuko e paw Jeriko, mi jolwenje duto oringo oweye.

⁶Ne gimake mi gitere Ribla ir ruodh Babulon, mong’adone bura kuno.

⁷ Ne ginego yawuot Zedekia e wang’e koneno, eka ne gitoko wengene oko, kendo gitueye gi nyororo, mi gitere Babulon.

⁸Chieng’ due abiriyo due mar abich, e higa mar apar gochiko mar loch Nebukadnezar, jatend joma ne rito ruodh Babulon, nobiro Jerusalem,

⁹ Nowang’o Od Ruoth Nyasaye, gi od ruoth, kod udi duto mag Jerusalem,

¹⁰kendo joge mag lweny nomuko ohinga duto mane olworo Jerusalem.

¹¹Bang’e Nebukadnezar nomako ji duto mane odong’ Jerusalem motero Babulon, kaachiel gi joma ne oseringo modok ni ruodh Babulon, kod jotich molony mane pod odong’ kuno.

¹²To joma odhier ahinya, mane onge gi gimoro, noweyo e piny Juda mondo oti e puothe mzabibu, kendo e puothe mamoko.

¹³ Jo-Babulon notoyo sirni mag mula, gi rachungi mane itiyogo e Hekalu, kod karaya maduong’ mar mula ma bende ne ni kanyo. Bang’e ne gitero mulago duto Babulon.

¹⁴ Bende ne gidhi gi agulini gi rachodhi gi rangisni gi bakunde miting’oe remb misango, kod gik moko duto mag mula mane olos ni tich Hekalu.

¹⁵Bende jatend jolweny nokawo gik moko duto molos gi dhahabu kata molos gi fedha, kaka kikombe gi tegni mag mach.

¹⁶Pek mula mane ruoth Solomon olosogo sirni ariyo gi karaya maduong’ ne ng’eny mokadho apima.

¹⁷Sirni ariyogo ne romre. Moro ka moro borne modhi malo ne romo mita ochiko. Ewi siro ka siro ne nitie gima chalo agulu mar mula, ma borne modhi malo romo mita achiel gi nus, to alwora mare ne oketie gik mong’inore ong’inore ka machunga, ma bende nolos gi mula.

¹⁸Nebuzaradan, jatend lweny maduong’, nomako Seraya jadolo maduong’, gi Zefania jadolo maluwe, kod ji adek ma jorit dhood Hekalu.

¹⁹Bende nokawo ng’at mane osebedo jatend jolweny, gi jagoro mare mane tichne en ndiko nying joma onego obed jolweny, kaachiel gi ji abich kuom joma ne ng’ado ni ruoth rieko, kod jodongo piero auchiel mane pod ni Jerusalem.

²⁰Jogo duto notero Ribla ir ruodh Babulon,

²¹mi ruoth nogolo chik, mi ogogi kendo oneggi kuno e piny Hamath. Kamano e kaka nodar jo-Juda e pinygi, moter e tuech.

²² To kuom joma nodong’ e piny Juda, Nebukadnezar ruodh Babulon noyiero Gedalia wuod Ahikam ma wuod Shafan, mondo obed jatendgi.

²³Jodong lweny duto, kaachiel gi jogi, nowinjo ni ruodh Babulon oseyiero Gedalia. Mi Ishmael wuod Nethania, gi Johanan wuod Karea, gi Seraya wuod Tanhumeth ja-Netoifa, kod Jaazania wuod ja-Maaka ne jodhi ir Gedalia kaachiel gi jogi.

²⁴Gedalia nokuong’orenigi kowacho niya, “Kik uluor jo-Babulon. Daguru adaga e pinywani kuyie loch ruodh Babulon, to unune maber.”

²⁵ To e due mar abiriyo, Ishmael wuod Nethania ma wuod Elishama ma anywola joka ruoth, nobiro gi ji apar, momonjo Gedalia. Ne ginege, kaachiel gi jo-Yahudi kod jo-Babulon mane ni kode Mizpa.

²⁶ Eka ji duto, kaachiel gi jodong lweny, noringo modhi Misri, nimar ne giluoro jo-Babulon.

²⁷Kane Jehoyachin ruodh Juda osetue higni piero adek gabiriyo, Evil-merodak ruodh Babulon nogonye. Mano notimore chieng’ due piero ariyo gabiriyo, mar due apar gariyo, e higa mane Evil-merodak ochakoe tich ruoth.

²⁸Evil-merodak norito Jehoyachin gi ng’wono, kendo ne omiye luor maduong’ moloyo ruodhi duto mane ni Babulon e tuech.

²⁹Kuom mano Jehoyachin nolonyo lep tuech, kendo nochiemo e od ruoth ndalone duto.

³⁰Odiechieng’ kodiechieng’ kuom higni duto mane ongima, ne imiye gik moko morome konyorego.