Read luo 2 Ruodhi 3 Bible Online

2 Ruodhi 3 - luo bible

2 Ruodhi 3

¹E higa mar apar gaboro mar loch Jehoshafat ruodh Juda, Joram wuod Ahab nodoko ruodh Israel morito piny kuom higni apar gariyo, kodak Samaria.

²Timbene ne richo e nyim Ruoth Nyasaye, to ok marom gi mago mane wuon mare gi min mare otimo, nikech nogolo siro mar Baal mane wuon mare oloso.

³Kata kamano notuere e timbe mokwer mane Jeroboam wuod Nebat omiyogo jo-Israel obedo joricho. Ne ok oweyogi kata matin.

⁴Mesha ruodh Moab ne japith rombe, kendo higa ka higa nogolo rombe alufu mia achiel kod piende imbe alufu mia achiel.

⁵To kane Ahab otho, ruodh Moab nodagi bedo e bwo loch ruodh Israel.

⁶Omiyo ruoth Joram nowuok Samaria, mochoko jo-Israel duto.

⁷Nooro wach ni Jehoshafat ruodh Juda niya, “Ruodh Moab piem koda. Diyie wanywak ni jo-Moab koso?” Jehoshafat nodwoke ni, “Ayie! Joga e jogi, kendo faresena e fareseni.”

⁸Eka nopenje ni, “Dwaluw yo mane?” Joram nodwoke ni, “Waluw yor thim Edom.”

⁹Eka ruodh Israel gi ruodh Juda kod ruodh Edom ne jodhi kanyakla. Ne gitieko ndalo abiriyo ka gilworo kuma bor, nyaka pi norumo ni jolweny kod jamni mane gin go.

¹⁰Eka ruodh Israel noywak, kawacho niya, “Yaye, wan ruodhi adekgi, hapwa rach, nikech Ruoth Nyasaye osekelowa ka mondo oketwa e lwet jo-Moab!”

¹¹To Jehoshafat nopenjo niya, “Bende nitie janabi mar Ruoth Nyasaye ka, manyalo penjonwa Ruoth Nyasaye wach?” Achiel kuom jotich ruodh nodwoke niya, “Elisha wuod Shafat, mane tiyo ni Elija, ni ka.”

¹²Jehoshafat nowacho niya, “Ero, jalo e ng’at man gi wach Ruoth Nyasaye.” Mi ruodh Israel gi Jehoshafat kod ruodh Edom ne jodhi ir Elisha.

¹³Elisha nopenjo ruodh Israel niya, “An gang’o kodi? Dhiyo ir jokor weche ma wuoru gi meru ne dhiye!” To ruodh Israel nokwere ni, “Ok kamano nimar Ruoth Nyasaye ema osechokowa kanyakla, mondo oketwa e lwet jo-Moab.”

¹⁴Elisha nodwoke niya, “Akuong’ora gi nying Ruoth Nyasaye Manyalo Gik Moko Duto ma atiyone, ni da ni ok ageno Jehoshafat ruodh Juda, to da ok adewi, kata ng’iyi da ok ang’iyi.

¹⁵Kata kamano, kelna jago thum.” Kane jago thum gocho, teko mar Ruoth Nyasaye nolwar kuom Elisha,

¹⁶mowacho niya, “Ruoth Nyasaye owacho ni mondo ukuny buche mang’eny e holoni,

¹⁷nikech owacho ni ok unune yamo kata koth, to pi biro pong’o holo, mondo umodhi kaachiel gi jambu.

¹⁸To mano en gima yot ni Ruoth Nyasaye, nimar jo-Moab bende obiro keto e lwetu.

¹⁹Ubiro loyo mier mochiel gi ohinga, kod mier mabeyo duto, kendo unutong’ yien mabeyo duto. Unudin sokni, kendo unuketh puothe mabeyo duto gi kite.”

²⁰Kamano, kinyne gokinyi kar sa mitimoe misango, pi nobiro koa yo Edom, nyaka gweng’no duto nolokore pi lilo.

²¹Kane jo-Moab duto owinjo ni ruodhigo obiro mondo oked kodgi, ji duto mane nyalo ting’o gi lwenje noyworo ni lweny, mi giriedo e tong’ pinygi.

²²Kane gichiew gokinyi, chieng’ norieny e pi, mi ne gineno pi momanyore kodgi kamil makwar ka remo.

²³Omiyo ne giwacho niya, “Macha remo! Nyaka bed ni ruodhigo nende okedi kendgi, monegore! Koro wadhi wayeki!”

²⁴To kane gichopo kama jo-Israel ojotie, jo-Israel nowuok momonjogi, mi ne giringo, ka jo-Israel lawogi kendo negogi.

²⁵Jo-Israel noketho miech Moab, kendo ng’ato ka ng’ato nodiro kidi e puothe duto mabeyo, nyaka kite nopong’ogi. Ne gidino sokni duto, kendo ne gitong’o yien mabeyo duto. Dala Kir-hareseth kende ema nodong’ ni jo-Moab, to jodir orujre nolwore mobaye.

²⁶Kane ruodh Moab oneno ni lweny dwaro loye, nowuok gi jo-ligangla mia abiriyo, kotemo mwomo nyaka ir ruodh Aram, mondo otony, to notamogi.

²⁷Eka nokawo wuode makayo, mane onego bed ruoth kare, mi onego ewi ohinga, mowang’o ka liswa. Kuom mano mirima maduong’ nomako jo-Israel, kendo ne giweyo kedo kode, mi gidok e pinygi.