Read luo 2 Ruodhi 4 Bible Online

2 Ruodhi 4 - luo bible

2 Ruodhi 4

¹Chieng’ moro, dhako moro ma chi liel, ma chwore ne achiel kuom oganda jonabi, notero ywak ir Elisha, kawachone niya, “Chwora osetho, kendo ing’eyo kaka ne en ng’at ma oluoro Ruoth Nyasaye. To jabendho osebiro mondo okaw nyithinda ariyo, olok wasumbe.”

²Elisha nopenje niya, “Datim ang’o? Nyisa gima in go e ot.” Nodwoke niya, “Aonge gi gimoro, mak mana mo matin.”

³Eka Elisha nowachone niya, “Dhiyo e gweng’u, ihol agulini mang’eny kuom jowadu.

⁴Bang’e idonj e odi, ilorrie kaachiel gi yawuoti. Eka iol morno e agulinigo, kendo ka moro osepong’, to iket tenge.”

⁵Omiyo dhakono nodhi, molorore e ode kaachiel gi yawuote. Ne gigamone agulinigo, to en nooloe mo.

⁶Ne gimedo timo kamano nyaka agulini duto opong’. Omiyo kane okwayo wuode mondo ogamne moro, to wuode nodwoke ni, “Onge modong’.” E sa nogono mo nochok.

⁷Eka dhakono nodhi, monyiso ng’at Nyasaye gima osetimore. Elisha nodwoke niya, “Dhiyo, ihon morno, ichulgo gopeni, to modong’, ukonyrugo gi yawuoti.”

⁸Chieng’ moro, Elisha nodhi Shunem, kuma dhako moro ma jamoko nodakie. Dhakono nochune mondo ochiem e ode. Bang’ mano, kinde duto mane Elisha luwoe yorno, nothoro rawo kanyo mondo ochiemie.

⁹Mano omiyo dhakono nowacho ni chwore niya, “Aneno ni jal makadho ka pileni en ng’at Nyasaye.

¹⁰Wachuogne ot moro matin ewi tado, kendo waketnee kitanda gi mesa gi kom kod taya, mondo pile kobiro limowa to oyue kanyo.”

¹¹Chieng’ moro, kane oyudo Elisha orawo kanyo, nodonjo e odno moyueyo.

¹²Bang’e nowacho ni Gehazi jatichne niya, “Luong chi Shunem.” Gehazi noluongo dhakono, mobiro ochung’ e nyim Elisha.

¹³Eka Elisha nowacho ni Gehazi mondo openje niya, “Isekawo chandruok ahinya mar ritowa maber, to koro ere gima dwatimni? Donge dibedie gi ywak moro ma dwater ni ruoth kata jatend jolweny?” Nodwoko ni, “Ooyo, adak kod jowa.”

¹⁴Elisha nopenjo kendo niya, “Dwatimne ang’o?” Gehazi nowacho niya, “Oonge gi wuowi, kendo chwore oti.”

¹⁵Eka Elisha nowacho niya, “Luonge oduogi.” Kane oseluong dhakono, nobiro mochung’ e dhoot.

¹⁶ Elisha nowachone niya, “Due makama, higa mabiro, inibed gi nyathi ma wuowi.” To dhakono nodwoke niya, “Ooyo, ruodha, kik iwuonda!”

¹⁷To bang’e nomako ich, monywolo wuowi e ndalo mane Elisha owacho.

¹⁸Nyathino nodongo, kendo chieng’ moro ne odhi e puodho kuma wuon mare ne nitie gi jokeyo.

¹⁹Kane en kuno, nochako ywak ni wuon niya, “Wiya bara! Wiya bara!” Wuon mare nowacho ni jatichne moro niya, “Tere ir min.”

²⁰To kane osetere, nobet e tiend min nyaka sa auchiel, aye notho.

²¹Min mare noidho gorofa, mopiele e kitanda ng’at Nyasaye, eka noloro dhoot, mowuok.

²²Noluongo chwore, mowachone niya, “Adwaro jatich kod kanyna. Ornagi mondo aret adhi ir ng’at Nyasaye, kendo aduog piyo.”

²³Chwore nopenje niya, “Ang’o momiyo idwaro dhi ire kawuono? Due pok opor, bende ok en chieng’ Sabato.” Nodwoke ni, “Adhi adhiya.”

²⁴Kane osegawo kanyna, nowacho ni jatichne niya, “Sembe, wadhi! Sembe asemba matek, mak mana ka awachoni ni, we.”

²⁵Mi nowuok modhi got Karmel ir ng’at Nyasaye. Kane ng’at Nyasaye onene gi kuma bor, kobiro, nowacho ni Gehazi jatichne niya, “Ne! Chi Shunem cha biro.

²⁶Ring iromne, ipenje ngimane gi ngima mar chwore kod mar wuode.” Dhakono nodwoko Gehazi ni, “Wangima.”

²⁷Kane ochopo e got, nodhi ir ng’at Nyasaye, momako tiende, Gehazi nosudo mondo ogole, to ng’at Nyasaye nowachone niya, “Weye, nimar chunye chandore malit, to Ruoth Nyasaye osepandona wachne, mak onyisa.”

²⁸Dhakono nopenje ni, “An ema nakwayi wuowi koso? Donge nakweri ni kik iwuonda?”

²⁹Elisha nowacho ni Gehazi niya, “Ng’wan lepi, ikaw ludha, kendo ichak wuoth. Kiromo gi ng’ato, to kik imosi, kata ka ng’ato mosi, to kik idwoke, kendo kichopo, to iriw ludha e lela wang’ nyathi.”

³⁰To min nyathi nowachone niya, “Gi nying Ruoth Nyasaye, kendo gi nyingi iwuon, ok naweyi.” Omiyo Elisha nochung’ modhi kode.

³¹Gehazi notelonigi, kendo kochopo kuno, noketo luth e lela wang’ nyathi, to nyathi noling’ thi, ma ok otimo gimoro manyiso ni ongima. Omiyo Gehazi nodok romo ni Elisha, monyise ni nyathi ok ochier.

³²Kane Elisha ochopo e ot, noyudo nyathi kotho e kitandane.

³³Omiyo nodonjo, moloro dhoot mondo obed kende gi nyathi, kendo nolamo Ruoth Nyasaye.

³⁴ Eka noriere kuom nyathi, koketo dhoge e dho nyathi, wang’e kuom wang’ nyathi, kendo lwete kuom lwet nyathi. Kane osetimo kamano, ringre nyathi nodoko maliet.

³⁵Elisha nochung’ mowuotho koni gi koni e ot dichiel. Eka nodok, moriere kuom nyathi kendo, mi nyathi nogir dibiriyo, kendo wang’e noyawore.

³⁶Elisha noluongo Gehazi, mowachone niya, “Luong chi Shunem.” Mi noluonge. Kane obiro, Elisha nowachone niya, “Kaw wuodi.”

³⁷Dhakono nodonjo, mogoyo chonge piny e tiende, kokulo wiye piny. Eka nokawo wuode, mowuok.

³⁸Elisha nodok Gilgal. Chieng’ moro kane kech nie piny, Elisha ne ni kod oganda jonabi, kapuonjogi. Nowacho ni jatichne niya, “Ket agulu maduong’ e kendo, ited chiemo ni jonabigi.”

³⁹Ng’at achiel kuom jonabi nodhi ng’ueto, moyudo otangle. Nopono bade kopong’ modokgo irgi. Nobarogi, moologi e agulu, ka ok ong’eyo ni gin ang’o.

⁴⁰Eka notok ni ji mondo ocham. To kane gichako chiemo, ne giywak niya, “Yaye, ng’at Nyasaye, ang’o manie agulu ma negowani?” Mi ne ok ginyal chiemo.

⁴¹To Elisha nowacho niya, “Kara keluru mogo.” Eka nokiro mogo e agulu, mowacho niya, “Koro tokuru ni ji mondo ochiem.” Mi ne giyudo ni gima rach koro onge agulu.

⁴²Ng’at moro noa Baal-shalisha, mokelo ni ng’at Nyasaye cham manyien e gunia. Ne gin makati piero ariyo mag shairi, kod cham mawidhi. Elisha nowacho ni mondo omigi ji ochamgi.

⁴³To jatichne nokone ni, “Ere kaka anyalo miyo ji mia achiel chiemo matin ni?” Elisha nomedo wacho ni, “Migi amiya, nikech Ruoth Nyasaye owacho ni ginichiem, mi chiemo moko nodong’.”

⁴⁴Omiyo nomiyogi, mi gichiemo, kendo moko nodong’, mana kaka Ruoth Nyasaye nowacho.