Read luo 2 Ruodhi 5 Bible Online

2 Ruodhi 5 - luo bible

2 Ruodhi 5

¹ Naaman ne jaduong’ lweny mar ruodh Aram, kendo Ruoth Nyasaye nosekonye, komiyo jo-Aram loyo e lweny. Kuom mano, ne en ng’at ma ruodhe ogeno kendo morgo. Bende ne en ng’at maratego ma jachir. To ne en radhoho.

²Noyudo ka chiege nigi nyar Israel moro ma jatichne, mane jo-Aram omako kane gimonjo jo-Israel, kaka ne githoro timo.

³Nyakono nowacho ni chi Naaman niya, “Mad ruodhwa dhi ir janabi man Samaria! Dothiedh dhohone.”

⁴Kane Naaman owinjo kamano, nodhi monyiso ruodhe gima nyar Israel owacho.

⁵Ruodh Aram nowachone niya, “Kara dhiyo, abiro ori ir ruodh Israel gi barua.” Naaman nodhi gi fedha moromo kilo mia adek, gi dhahabu moromo kilo apar, kod lewni mabeyo apar.

⁶Barua mane otero ni ruodh Israel nowacho kama: “Kisomo barupani, to ng’e ni aseoroni Naaman jaduong’na mar lweny, mondo ithiedh dhohone.”

⁷Kane ruodh Israel osomo barua noyiecho lepe, kowacho niya, “An e Nyasaye koso, ma anyalo nego ng’ato kata miye ngima, momiyo jali orona ng’ato mondo athiedh dhohone? Neuru kaka odwaro dhaw kodwa!”

⁸To kane Elisha, ng’at Nyasaye owinjo kaka ruodh Israel oyiecho lepe, noorone wach niya, “Marang’o iseyiecho lepi? Or jalo ira, mondo ong’e ni kara janabi nitie e Israel.”

⁹Mi Naaman nodhi gi faresene kod gechene, mochung’ e dhood Elisha.

¹⁰Elisha noorone jaote niya, “Dhiyo, inyumri dibiriyo e aora Jordan, to dendi biro chango, kendo ibiro pwodhori.”

¹¹To Naaman nokecho, modok kowacho niya, “Nende aparo ni dowuog obi ira, kendo dochung’ koluongo nying Nyasaye ma Nyasache, kendo dorie lwete kuom adhondena mondo othiedhna dhoho.

¹²Donge aore mag Damaski, ma Abana gi Farpa, beyo moloyo aore duto mag Israel? Ok danyumra e aorego mondo achangi?” Bang’e nolokore modhi ka iye owang’.

¹³To jotichne nosudo bute, mopenje niya, “Wuonwa, ka da janabi chiki ni mondo itim gimoro maduong’, donge ditimo? To koro ok ber moloyo kowachoni mana ni mondo inyumri e pi, idok maler?”

¹⁴Omiyo nolor modhi onimo e aora Jordan dibiriyo, kaka ng’at Nyasaye nowacho, mi nopwodhore, kendo dende noduogo mapakni ka dend nyathi matin.

¹⁵Naaman gi joge duto nodok ir ng’at Nyasaye, mochung’ e nyime, kowachone niya, “Koro ang’eyo ni onge Nyasaye kamoro amora mak mana e Israel; omiyo akwayi ni yie ikawie mich moro matin.”

¹⁶To nodwoke niya, “Gi nying Ruoth Nyasayee ma atiyone, ok nakaw gimoro.” Nochune mondo okaw, to Elisha nodagi.

¹⁷Eka Naaman nowachone niya, “Kidagi ni kik amiyi gimoro, to akwayi ni mondo imiya lowo ma dirom kenje ariyo ting’o, nikech chakre kawuono ok abi timo misango ni Nyasaye moro amora, to mak mana ni Ruoth Nyasaye.

¹⁸To ne nitie gimoro achiel ma Ruoth Nyasaye onego wenae; ruodha pod biro donjo e od Rimon nyasache mondo olem kuro, koyiengore e bada. Obiro kulore e od Rimon, kendo an bende abiro kulora kode, to Ruoth Nyasaye mondo owena kuom timo kamano.”

¹⁹Elisha niowachone niya, “Dhiyo gi kue.” To kane Naaman osechwalore matin,

²⁰Gehazi ma jatich Elisha ng’at Nyasaye, noparo niya, “Ruodha oseweyo Naaman ma ja-Aram odhi mak okawo mich ma nokelo. Gi nying Ruoth Nyasaye, abiro lawe mondo ayudie gimoro kuome.”

²¹Omiyo Gehazi nolawo Naaman. Kane Naaman oneno ng’ato kalawe, nolor oa e gari, modhi moromone, kopenje niya, “Ere wach?”

²²Gehazi nodwoke niya, “Onge wach, to ruodha oora mondo anyisi ni yawuowi ariyo mag oganda jonabi ochopo sani koa e piny gode mag Efraim. Okwayi mondo imiye fedha moromo kilo piero adek, kod lewni ariyo.”

²³Naaman nodwoke niya, “Yie mondo ikaw kilo piero auchiel.” Nochuno Gehazi, momiyo kilo piero auchiel mag fedha e kirope ariyo, kod lewni ariyo. Nomiyo jotichne ariyo mondo oting’gi, ka gitelo e nyim Gehazi.

²⁴Kane gichopo e dala, Gehazi nokawo gigo kuomgi, mokano e ot. Eka nomiyogi thuolo, mi gidok.

²⁵To kane Gehazi odonjo e ot, mondo oti ni ruodhe. Elisha nopenje niya, “Gehazi, ia kanye?” Nodwoke ni, “Ne ok adhi kamoro.”

²⁶Elisha nokone niya, “Donge chunya nodhi kodi, kane ng’at cha lor a e gache, duogo romoni? Iparo ni ma e kinde mar kawo fedha, gi lewni, gi puothe mzabibu, gi rombe, gi dhok, kod jotich machwo gi mamon koso?

²⁷Omiyo koro dhoho mar Naaman biro maki, kaachiel gi nyikwayi nyaka chieng’” Mi Gehazii noa kanyo kosedoko radhoho, ma dende rachar ka pe.