Read luo 2 Ruodhi 9 Bible Online

2 Ruodhi 9 - luo bible

2 Ruodhi 9

¹Elisha janabi noluongo achiel kuom jonabi, mowachone niya, “Ng’wan lepi, idhi Ramoth-gilead gi puga mar morni.

²Kichopo, dwar Jehu wuod Jehoshafat ma wuod Nimshi. Kisetundo kama entie, to gole kuom jolweny wetene, kendo itere e ot maiye.

³Eka ikaw puga mar mo, iol e wiye, kikone ni Ruoth Nyasaye owachone ni oseyiere mondo obed ruodh Israel. Ka isewacho kamano, to yaw dhoot iring ia. Kik ideki!”

⁴Omiyo janabi ma rawerano nodhi Ramoth-gilead,

⁵monwang’o jodong lweny ka nie bura. Nowacho niya, “Jaduong’, adwaro loso kodi.” Jehu nopenje niya, “En ng’a ma idwaro losogo kuomwa?” Nodwoke ni, “Mana in, jaduong’”

⁶ Mi Jehu noa malo, modonjo e ot. Eka janabino noolo mo e wiye, kawachone ni Ruoth Nyasaye ma Nyasach Israel owacho niya, “Aseyieri mondo ibed ruodh Israel.

⁷Inineg dhood Ahab ma ruodhu, mondo ochulgo kuor kuom Jezebel nikech nochuero remb jotichna ma jonabi, kod jotichna mamoko duto.

⁸Dhood Ahab duto norum! Anatiek jo-Ahab machwo duto, ma onge kata achiel ma nodong’ e Israel.

⁹Analok dhoode mondo ochal gi dhood Jeroboam wuod Nebat, kendo machal gi dhood Baasha wuod Ahija.

¹⁰ Guogi nocham Jezebel e piny Jezreel, kendo onge ng’ama nokonye.” Eka janabino noyawo dhoot, moringo.

¹¹Kane Jehu owuok, modok ir jodong ruodhe, ne gipenje niya, “Ere wach? Janekono nobiro iri nang’o?” Nodwokogi niya, “Ung’eyo kaka ng’atno wuoyo!”

¹²To ne gikwere ni, “Mano miriambo! Wachnwa awacha adiera.” Nodwokogi kendo niya, “Nonyisa ni Ruoth Nyasaye owacho ni oseyiera mondo abed ruodh Israel.”

¹³Mi jogo duto nopedho lepgi aruya ewi raidhi, mondo Jehu obedie. Eka ne gigoyo tung’ ka gikok niya, “Jehu e ruoth!”

¹⁴Kamano e kaka Jehu wuod Jehoshsfat ma wuod Nimshi nochako piem gi Joram, mondo ogol e tich ruoth.

¹⁵Jehu nowacho ni jodong lweny wetene niya, “Ka parou chal kamano, to kara neuru ni ng’ato ok owuok e dala ka, ma diter wach Jezreel.”

¹⁶Eka Jehu noidho gache, modhi Jezreel, nimar Joram ne ni kuno. To Ahazia ruodh Juda bende ne ni kuno, ka wendo Joram. (Ruoth Joram ne ni Jezreel mondo ochang kuom hinyruok mane oyudo e lwet jo-Aram Ramoth-gilead gi jo-Israel duto, mondo kik Hazael ruodh Aram kaw.)

¹⁷Jarito mane oyudo ochung’ ewi ohinga mar Jezreel noneno Jehu gi joge ka biro, mowacho niya, “Aneno ji moko, ka biro.” Joram nowachone ni, “Or ng’ato gi faras odhi oromnigi, mondo openjgi ka wach ber.”

¹⁸Omiyo jaidh faras nodhi romonigi, mowachonigi niya, “Ruoth penjo ka wach ber.” To Jehu nodwoke niya, “Wach maber obadhie ang’o? Wichri ilu bang’a.” Jarito mane ni ewi ohinga nochako owacho niya, “Jaote cha osechopo irgi, to ok ane koduogo.”

¹⁹Eka ruoth nooro jaidh faras machielo, ma bende nowachonigi niya, “Ruoth penjo ka wach ber.” Jehu nodwoke niya, “Wach maber obadhie ang’o? Wichri ilu bang’a.”

²⁰Jarito nowacho kendo niya, “Jaoteno osechopo irgi, to en bende ok oduogi. To jariemb gari cha chalo mana gi Jehu wuod Nimshi, nikech oriembo matek ka janeko.”

²¹Joram nowacho ni joge mondo oikne gache, mi ne gitimo kamano. Eka Joram ruodh Israel, kod Ahazia ruodh Juda, ne jowuok gi gechegi, ka dhi romo ni Jehu, mi ne giromo kode e puoth Naboth ja-Jezreel.

²²Kane Joram oneno Jehu, nopenje niya, “Ere kaka wach nyalo bet maber, ka meru Jezebel pod dhi nyime gi timbene mag ndhogruok gi mag jwok?”

²³Kane Joram owinjo wachno, noloko gache moringo, kowacho ni Ahazia niya, “Ahazia masira ni ka! Jogi jemo!”

²⁴To Jehu noywayo asere gi tekone duto, mochwowo otenga Joram, mi asere nopowo e dho chunye, monywowore e gache.

²⁵Eka Jehu nowacho ni Bidkar mane jating’ne gilweny niya, “Kawe, ibole e pwoth Naboth ja-Jezreel. Ok ipar gima Ruoth Nyasaye nowacho kuome chieng’ mane wan kodi e gach lweny, kwaluwo bang’ Ahab wuon mare?

²⁶ Donge Ruoth Nyasaye nowacho kuome ni, ‘Nyoro aneni kinego Naboth gi yawuote, to abiro chuloni kuor e puodhoni’? Omiyo kawe, ibole e puodhono, mondo wach Ruoth Nyasaye ochop kare.”

²⁷Kane ahazia ruodh Juda oneno gima otimore, noringo kochomo Beth-hagan. Jehu nolawe, kawacho niya, “En bende negeuru!” Mi ne gichwowe ka geche idho got Gur, machiegni gi Ibleam. Noringo nyaka Megido, motho kuro.

²⁸Joge noting’e e gari nyaka jerusalem, mi giyike but kwerene e dala Daudi.

²⁹Ahazia nochako bet ruodh Juda e higa mar apar gachiel mar loch Joram wuod Ahab.

³⁰Kane Jehu ochopo Jezreel, Jezebel nowinjo birone, omiyo nowiro wang’e gi mo, kendo oloso yie wiye. Eka nong’icho gie dirisa.

³¹Kane Jehu odonjo e dhorangach, Jezebel nowachone niya, “Ere wach, in Zimri ma janek ruodheni?”

³²Jehu noting’o wang’e, mong’iyo dirisa kapenjo niya, “Ere ng’ama odokna?” Eka jotich ariyo kata adek nobiro e dirisa, mong’iye.

³³Jehu nowacho nigi niya, “Dhiruru dhakono piny.” Kamano ne gidhire, mi rembe nokirore e kor ot, kendo farese nonyone.

³⁴Jehu nodonjo e ot, mochiemo kendo ometho. Eka nowacho niya, “Dhiuru uyik dhako mokuong’ni nikech en nyar ruoth.”

³⁵To kane gidhi mondo giyike, ne ginwang’o mana hanga wiye gi tiendene kod luetene kende.

³⁶ Kane gidok nyiso Jehu, nowachonigi niya, “Mano e gima Ruoth Nyasaye nomiyo jatichne Elija ja-Tishbe owacho, kokoro niya, ‘Guogi nocham ringre Jezebel e gweng’ Jezreel;

³⁷kendo ringre nochal kaka owuoyo moyar e puothe mag Jezreel, ma onge ng’ato ma nong’e ni, ma e Jezebel.’ ”