Read luo 1 Weche mag Ndalo 10 Bible Online

1 Weche mag Ndalo 10 - luo bible

1 Weche mag Ndalo 10

¹Noyudo jo-Filistia kedo gi jo-Israel, kendo jo-Israel noringo, kinegogi e got Gilboa.

²Jo-Filistia nojuko Saulo gi yawuote ma Jonathan gi Abinadab kod Malkishua, kendo ne ginego yawuotego.

³Lweny nohingo Saulo, mi jo-asere noyude, mochiele kendo ohinye.

⁴Saulo nowacho ni jating’ne gilweny nita, “Wuodh liganglani inegago, nono to joma kia Nyasayegi, biro nyiera.” To jating’ gilwenje nodagi, nikech noluor ahinya. Emomiyo Saulo nomako liganglane owuon, mochwoworee.

⁵To kane jating’ne gilweny oneno ni Saulo osetho, en bende nochwowore e liganglane, motho.

⁶Kamano Saulo notho kaachiel gi yawuote adek kod joode duto chieng’ achiel.

⁷Kane jo-Israel mane odak e holo oneno ni jolweny oseringo, kendo ni Saulo gi yawuote josetho, ne gibolo miechgi kanyo, mi gin bende ne giringo. Bang’e jo-Filistia nobiro, modak e miergo.

⁸Kinyne, kane jo-Filistia obiro dedo joma otho, ne giyudo ringre Saulo gi ringre yawuote koriere e got Gilboa.

⁹Ne gidedo Saulo, kendo ne ging’ado wiye, mi gikawo gige mag lweny. Eka ne gioro joote e piny Filistia duto, mondo oter wach maberno ni nyisechegi, kendo ni jopinygi.

¹⁰Ne giketo gi Saulo mag lweny e od nyisechegi, to wiye ne giguro e kor hekalu mar Dagon nyasachgi.

¹¹To kane jo-Jabes-gilead owinjo gima ne jo-Filistia osetimo ni Saulo,

¹²thuondgi duto nowuok modhi oomo ringre Saulo gi ringre yawuote. Ne gikelogi Jabesh, mi giyiko chokegi kuno e tiend yath moro, kendo ne gitueyo chiemo kuom ndalo abiriyo.

¹³ Kamano Saulo notho nikech noweyo Ruoth Nyasaye. Ne ok orito chik Ruoth Nyasaye, kendo kar penjo Ruoth Nyasaye wach, to nodhi mana ir jonyakalondo mondo onyise wach.

¹⁴Mano emomiyo Ruoth Nyasaye nonege, momiyo Daudi wuod Jesse lochne.