Read luo 1 Weche mag Ndalo 11 Bible Online

1 Weche mag Ndalo 11 - luo bible

1 Weche mag Ndalo 11

¹Bang’e jo-Israel duto nochokore gi Daudi Hebron, mi giwachone niya, “Ng’e ni wan mana remo achiel kodi.

²E ndalo mokadho, kane Saulo pod ruoth, in ema nitelo ni jo-Israel e lwenjegi duto, kendo Ruoth Nyasaye ma Nyasachi nowachoni niya, ‘Inibed jakwadh joga Israel, kendo in ema nibed jatendgi.’ ”

³Kuom mano, jodong Israel duto nobiro Hebron ir ruoth Daudi, kendo Daudi notimo kodgi singruok kuno e nyim Ruoth Nyasaye, mi ne giwire gi mo mondo obed ruodh Israel, kaluwore gi wach mane Ruoth Nyasaye omiyo Samuel owacho.

⁴ Bang’e Daudi gi jo-Israel duto nodhi Jerusalem, mane iluongo ni Jebus kuma ne jo-Jebus odakie.

⁵Jo-Jebus gogo nowacho ni Daudi niya, “Ok nidonj kaeri!” To kata kamano Daudi nokawo Sayun, dala mane ochiel motegno ahinya. Tinde iluonge ni Dala Daudi.

⁶Daudi nosewacho niya, “Ng’at ma nokwong nego ja-Jebus ema nobed jatelo kata jaduong’ lweny.” Joab wuod Zeruya ema nokwongo timo kamano, mi nokete jatelo.

⁷Daudi nodak e dala mochiel motegnono, emomiyo nochak kanyo ni Dala Daudi.

⁸Nogero udi molwore, kochakore gie ohinga mar Milo, to Joab noloso kuonde mamoko mane okethore e dalano.

⁹Duong’ mar Daudi koro nomedore ahinya, nimar Ruoth Nyasaye Manyalo Gik Moko Duto ne ni kode.

¹⁰Koro thuondi madongo moloyo, mane konyo Daudi gi tekregi duto mondo okete ruoth, kaluwore gi wach mane Ruoth Nyasaye owacho kuom jo-Israel e magi:

¹¹Jashobeam ja-Hakmon ne jatend thuondi adek madongo. En ema nonego ji mia achiel gi tong’, odiechieng’ achiel.

¹²Ng’at mane luwe ne en Eleazar wuod Dodo ja-Ahohi.

¹³Ne en gi Daudi Pasdamim, kuma ne jo-Filistia ochokoree ni lweny. Ne nitie puoth shairi kuno. Jolweny moko duto noringo jo-Filistia,

¹⁴To gin ne gichung’ gineno jo-Filistiago e dier puodhono, ka girite, kendo ne ginego jo-Filistiago. Mano e kaka Ruoth Nyasaye noreso jo-Israel, komiyogi loch maduong’.

¹⁵Kane jolweny mag jo-Filistia ojot e holo Refaim, ji adek kuom thuondi piero adek madongo nodhi ir Daudi e lwanda man but rogo mar Adulam.

¹⁶Kindego Daudi ne nie rogo, to jolweny mag jo-Filistia nosekawo Bethlehem.

¹⁷Daudi noomo chunye ka siso omake, mowacho niya, “Yaye! Mad ng’ato kelna pi soko man but ranga Bethlehem mondo amodhi!”

¹⁸Eka thuondi adekgo nomwomo oganda mar jo-Filistia. Ne gidhi omo pi sokono, mi gikelo ni Daudi, to nodagi modho pigno, moole piny ka misango ni Ruoth Nyasaye,

¹⁹kowacho niya, “Nyasaye mondo orita kik amodh pigni, nikech ochalo mana remb jogo mane odhi ome koyie wito ngimagi.” Mano emomiyo Daudi notamore modhe. Gik makamago ema thuondi adekgo ne timo.

²⁰Abishai omin Joab ema ne jatend thuondi piero adekgo. Nonego ji mia adek gi tong’, mi nobedo ng’at marahuma kuom thuondigo.

²¹Ne en rahuma moloyo kuomgi, mobedo jatendgi, to kata kamano ne ok ochopo e rang’iny mag ji adek kande.

²²Benaya wuod Jehoyada, thwon Kabzeel marahuma, nosetimo timbe thwon mang’eny. Bende nonego thuond Moab ariyo. Chieng’ moro, kane kodh pe osechue, nolor e bur moro, monegoe sibuor.

²³Bende en ema nonego ja-Misri marabet mane borne romo mita ariyo gi nus. Ja-Misrino ne nigi tong’ machal gi lodi, to Benaya nodhine gi odunga. Noyudho tong’ e lwet ja-Misrino, monegego.

²⁴Timbe machal kamago ema ne Benaya wuod Jehoyada oyudogo huma kaachiel gi thuondi piero adek kande.

²⁵Ne en rahuma moloyo ji piero adekgo, to kata kamano ne ok ochopo e rang’iny mag thuondi adek madongo kande. Daudi nokete jatend joge mag lweny mane rito ng’imane.

²⁶Thwond jolweny mag Daudi ne gin Asahel omin Joab, gi Elhanan wuod Dodo ja-Bethlehem,

²⁷gi Shamoth ja-Horad, gi Helez ja-Pelon,

²⁸gi Ira wuod Ikesh ja-Tekoa, gi Abiezer ja-Anathoth,

²⁹gi Sibekai ja-Hushath, gi Ilai ja-Ahohi,

³⁰kod Maharai gi Heled wuod Baana ma jo-Netofa,

³¹gi Benjamin, gi Benaya ja-Pirathon,

³²gi Hurai ma ja-Gaash, piny aore, gi Abiel ja-Beth-araba,

³³gi Azmoth ja-Bararim, gi Eliaba ja-Shaalbon,

³⁴gi Hashem ja-Gizon, kod Jonathan wuod Shagee,

³⁵gi Ahiam wuod Sakar ma jo-Harar, gi Elifal wuod Ur,

³⁶gi Hefer ja Mekera, gi Ahija ja-Pelon,

³⁷gi Ezbai,

³⁸gi Joel owadgi Nathan, gi Mibhar wuod Hagri,

³⁹gi Zelek ja Amon, gi Naharai ja Beerroth, mane jating’ gi lweny mag Joab wuod Zeruya,

⁴⁰kod Ira gi Gareb ma jo-Ithri,

⁴¹gi Uria ja-Hiti, kod Zabad wuod Alai.

⁴²Jatend thuondi piero adekgo ne Adina wuod Shiza ja-Reuben, ma jatend jo-Reuben.

⁴³Jomoko mane ni kodgi ne gin Hanan wuod Maaka, gi Joshafat ja-Mithni,

⁴⁴gi Uzia ja-Asheteroth, kod Shama gi Jeyel yawuot Hotham ja-Aroer,

⁴⁵kod Jadiael wuod Shimri gi Joha owadgi, ma jo-Tizi,

⁴⁶gi Eliel ja-Mahav, kod Jeribai gi Joshavia yawuot Elnaam, gi Ithma ja-Moab,

⁴⁷kod Eliel gi Obed kod Jaasiel jo-Zoba.