Read luo 1 Weche mag Ndalo 13 Bible Online

1 Weche mag Ndalo 13 - luo bible

1 Weche mag Ndalo 13

¹Daudi noporo wach gi jotend ogend lweny madongo gi matindo, kod jotelo duto.

²Nowacho ni jo-Israel mane ochokore niya “Ka wachni bernu, kendo en dwaro mar Nyasachwa, to mondo waor joote ir jo-Israel wetewa duto modong’ dala, kendo ir jodolo gi jo-Lawi ma nopognigi mier man gi lege, mondo obi irwa.

³Eka mondo waom Sanduk mar Nyasaye obed kodwa, nimar ne wajwang’e e ndalo Saulo.”

⁴Mi oganda duto noyie timo kamano, kendo wachno ne ber ni piny duto.

⁵ Omiyo Daudi nochoko jo-Israel duto kanyakla, chakre aora Shihor nyaka kama idonjogo Hamath, yo nyandwat, mondo giom Sanduk mar Nyasaye Kiriath-jearim.

⁶ Mi Daudi gi jo-Israel duto nodhi Baala, ma bende iluongo ni Kiriath-jearim, manie piny Juda, mondo giomie Sanduk mar Nyasaye miluongogo nying Ruoth Nyasaye, mobet kuom kerubi kaka ruoth bet e kom duong’ne.

⁷Ne gigolo Sanduk mar Nysaye e od Abinadab, ka giting’e e gari manyien. Uza gi Ahio ema ne chiko garino.

⁸Daudi gi jo-Israel to ne jomiel gi tekregi duto e nyim Ruoth Nyasaye, ka giwer, kendo gigoyo thumbe gi nyidwonge gi ongeng’o kod tung’.

⁹To kane gichopo kar dino mar Kidon, dhok mane ywayo gari nochwanyore, mi Uza norieyo bade mondo ojuk Sanduk mane oyudo dhi podho.

¹⁰To Ruoth Nyasaye nokecho kode, mochwade nikech nomako Sanduk, mi notho kanyo e nyim Nyasaye.

¹¹Daudi nokecho nikech Nyasaye nomwomore kuom Uza. Omiyo nochako kanyo ni Perez-uza, (tiende ni, mwomruok kuom Uza.) Pod iluonge kamano nyaka chil kawuono.

¹²Daudi noluoro Nyasaye chieng’no, mowacho niya, “Kara Sanduk mar Nyasaye ok onego kel e dalana!”

¹³Omiyo ne ok okelo Sanduk e dalane, to nobaro kode, motere e od Obed-edom ma ja-Giti.

¹⁴ Sanduk mar Nyasaye nodong’ e hembe but od Obed-edom kuom dueche adek. Mi Ruoth Nyasaye noguedho od Obed-edom kod gige duto.