Read luo 1 Weche mag Ndalo 14 Bible Online

1 Weche mag Ndalo 14 - luo bible

1 Weche mag Ndalo 14

¹Hiram ruodh Turo nooro joote ir Daudi gi yiend sida, kaachiel gi jogedo mag kite kod jopa bao, mondo oger ni Daudi ot.

²Koro Daudi nong’eyo ni kara Ruoth Nyasaye osekete ruodh Israel kendo osetego lochne ahinya mondo oguedhgo joge Israel.

³Daudi nokendo mon moko Jerusalem, mi nomedo nywolo yawuowi gi nyiri.

⁴Nying nyithindo mane onywolo kuno e magi: Shamua gi Shobab gi Nathan gi Solomon

⁵gi Ibhar gi Elishua gi Elphet

⁶gi Noga gi Nefeg gi Jafia

⁷gi Elishama gi Beeliada kod Elifelet.

⁸Kane jo-Filistia owinjo ni osewir Daudi mondo obed ruodh Israel duto, ne gibiro kar rombgi mondo gimonje. To kane Daudi owinjo kamano, nowuok mondo orad kodgi.

⁹Noyudo ka jo-Filistia osemonjo joma odak e Holo Refaim.

¹⁰Daudi nopenjo Nyasaye wach niya, “Kadhi kedo gi jo-Filistia, inichiwgi e lweta koso?” Nyasaye nodwoke niya, “Dhiyo! Nachiwgi e lweti.”

¹¹Mi Daudi nodhi Baal-perazim, momonjogi, kendo oloyogi. Eka nowacho niya, “Nyasaye osemiyo amwomo wasika mana kaka aora mwomo genge.” Mano emomiyo nochak kanyo ni Baal-perazim, (tiende ni ruodh mwomruok.)

¹²Jo-Filistia noringo moweyo nyisechegi kanyo, mi Daudi nogolo chik, mowang’gi.

¹³Chieng’ machielo jo-Filistia nochako omonjo holo cha.

¹⁴Daudi nochako openjo Nyasaye wach, mi Nyasaye nodwoke niya, “Kik ichomgi tir, to ng’ad yo ka ng’egi, mondo imonjgi kama omanyore gi yien maboyo kande.

¹⁵Kiwinjo mutni ewi yien, machalo gi mutni mar ji mawuotho, to imonj jolweny mag jo-Filistia, nimar asetelo nyimi mondo adhi alogi.”

¹⁶Daudi notimo kaka Nyasaye nochike, mi jo-Israel noriembo jo-Filistia, chakre Gibeon nyaka Gezer.

¹⁷Humb Daudi nolak e pinje duto, kendo Ruoth Nyasaye nomiyo ogendini duto oluore.