Read luo 1 Weche mag Ndalo 15 Bible Online

1 Weche mag Ndalo 15 - luo bible

1 Weche mag Ndalo 15

¹Daudi nomedo gero udi e Dala Daudi, kendo noloso kama Sanduk mar Nyasaye nyalo betie, mogurone hema.

² Eka nochiko ni onge ng’at moro ma nyalo ting’o Sanduk mar Nyasaye mak mana jo-Lawi kende nimar gin ema ne Nyasaye oyierogi mondo giting’e, kendo gitine nyaka chieng’.

³Bang’ mano, Daudi nochoko jo-Israel duto Jerusalem mondo giter Sanduk mar Ruoth Nyasaye kuma noselosone.

⁴Nochoko bende joka Harun kod jo-Lawi kanyakla.

⁵Ne gin joka Kohath mia achiel gi piero ariyo, mane Uriel otelonigi,

⁶gi joka Merari mia ariyo gi piero ariyo, mane Asaya otelonigi,

⁷gi joka Gershom mia achiel gi piero adek, mane Joel otelonigi,

⁸gi joka Elizafan mia ariyo mane Shemaya otelonigi,

⁹gi jo-Hebron piero aboro, mane Eliel otelonigi,

¹⁰kod joka Uziel mia achiel gapar gariyo, mane Aminadab otelonigi.

¹¹Eka Daudi noluongo Zadok gi Abiathar ma jodolo kod Uriel gi Asaya gi Joel gi Shemaya gi Eliel kod Aminadab ma jo-Lawi.

¹²Nowachonigi niya, “Un ma un jodong dhout Lawi, pwodhreuru kaachiel gi oweteu mondo uter Sanduk mar Ruoth Nyasaye ma Nyasach Israel kuma aseikone.

¹³Ruoth Nyasaye ma Nyasachwa ne omwomore kuomwa e kinde mokwongo, nikech ne ok untie mondo uting’ Sanduk, kendo nikech ne ok warite kaka owinjore.”

¹⁴Omiyo jodolo gi jolawi nopwodhore mondo oter Sanduk mar Ruoth Nyasaye ma Nyasach Israel kama noseikne.

¹⁵ Jo-Lawi noting’o Sanduk mar Nyasaye e gokgi gi ludhe, koluwore gi wach Nyasaye kaka Musa nochiko.

¹⁶Daudi nochiko jotend jo-Lawi bende mondo oyier owetegi ma jower molony kendo mong’eyo goyo thumbe mopogore opogore mamit.

¹⁷Omiyo jo-Lawi noyiero Heman wuod Joel, gi Asaf wuod Berekia ma owadgi. To kuom owetegi ma joka Merari ne giyiero Etham wuod Kushaya.

¹⁸Owetegi mane jolupgi e tich ne Zekaria gi Jaaziel gi Benaya gi Maaseya gi Matithia gi Elifelehu kod Mikneya, kaachiel gi Obed-edom kod Jeyel ma jorit rangeye.

¹⁹Heman gi Asaf kod Etham ma jower noyierr mondo ogo ongeng’o mag mula,

²⁰to Zekaria gi Jaaziel gi Shemiramoth gi Jehiel gi Uni gi Eliab gi Maaseya kod Benaya noyier mondo ogo nyigwerni.

²¹Matithia gi Elifelehu gi Mikneya gi Obed-edom gi Jeyel kod Azazia noyier mondo ogo thumbe, ka gitelo ni jower.

²²Kenania ma jatend jo-Lawi ema notelo ni wer nikech nolonyie.

²³To Berekia gi Elkana ne jorit dhout od Sanduk.

²⁴Shebania gi Jehoshafat gi Nethaneel gi Amasai gi Zekaria gi Benaya kod Eliezer ma jodolo ne goyo tung’ e nyim Sanduk mar Nyasaye. Obed-edom gi Jehia bende ne jorit dhout Sanduk.

²⁵Bang’ mago Daudi gi jodong Israel kod jotend lweny mane rito jo-lweny alufu achiel, nodhi gi mor mondo oom Sandug Muma mar Ruoth Nyasaye e od Obed-edom.

²⁶Ne gitimo misango gi ruedhi abiriyo kod imbe abiriyo, nimar Nyasaye ne konyo jo-Lawi ma noting’o Sandug Muma mar Ruoth Nyasaye.

²⁷Daudi gi jo-Lawi duto ma noting’o Sanduk, kaachiel gi jower norwako aroche mag bafta. Daudi norwako law dolo mar bafta bende.

²⁸Kamano jo-Israel nokelo Sandug Muma mar Ruoth Nyasaye ka gigoyo sigalagala gi tung’ gi oporo gi ongeng’o gi nyigwerni kod thumbe.

²⁹Kane Sanduk ochopo e dala Daudi, Mikal nyar Saulo nong’icho gie dirisa moneno ruoth Daudi ka miel kendo tugo, mi nochaye gi chunye.