Read luo 1 Weche mag Ndalo 16 Bible Online

1 Weche mag Ndalo 16 - luo bible

1 Weche mag Ndalo 16

¹Ne gikelo Sanduk mar Nyasaye mi giketo ei hema mane Daudi ogurone. Eka ne gitimo misengni miwang’o pep kod misengni mag kue e nyim Nyasaye.

²Kane Daudi osetieko timo misengnigo, noguedho jo-Israel e nying Ruoth Nyasaye,

³kendo nopogonigi chiemo giduto. Ng’ato ka ng’ato ma dichwo kata madhako noyudo makati achiel gi ring’o kod olembe mar mzabibu motwo mong’in.

⁴Daudi noyiero jo-Lawi moko mondo oti e nyim Sanduk mar Ruoth Nyasaye, ka gigoyone erokamano, kendo gipake ka giparego.

⁵Jotendgi ne gin Asaf, to jalupne ne Zekaria, to moko ne gin Jaaziel gi Shemiramoth gi Jehiel gi Matithia gi Eliab gi Benaya gi Obed-edom gi Jeyel mane jogo nyigwerni gi thumbe. Asaf ne goyo ongeng’o,

⁶to Benaya gi Jahaziel ma jodolo ne goyo tung’ odiechieng’ thole e nyim Sandug Muma mar Nyasaye.

⁷Chiengno ema ne Daudi okwongo chikoe Asaf gi owetene mondo opak Ruoth Nyasaye gi wendni:

¹³Un nyikwa Israel, jotich Ruoth Nyasaye. Adier, un yawuot Jakobo, jotichne moyier, gouru erokamano ni Ruoth Nyasaye. Luonguru nyinge, kendo landuru humb timbene ni ogendini duto. Pakeuru gi wende kod zaburi, bende paruru timbene madongo duto. Moruru nikech nyinge ler. Joma dwaro Ruoth Nyasaye mondo obed mamor! Dwaruru Ruoth Nyasaye mamiyou teko. Dwareuru ndalo duto. Paruru honni gi timbe madongo mosetimo, kaachiel gi buche moseng’ado

¹⁴En e Ruoth Nyasaye ma Nyasachwa kendo tekone okwako piny ngima.

¹⁵Noparo singruokne manyaka nene ma nosik kuom tienge gana gi gana,

¹⁶ mane otimo ni Ibrahim. Bende noparo kuong’ruok mane okuong’orego ni Isaka,

¹⁷ kod singruok mane otimo ni Jakobo. En singruok mochwere ni Israel.

¹⁸Nowacho niya, “Anamiyi piny Kanaan mondo obed mwanduni gi nyikwayi.”

¹⁹Ne pod gin ji manok ahinya, kendo jodak adaka e pinyno.

²⁰Ne giwuotho e kind ogendini ka gidak kuonde mopogore opogore.

²¹ Ruoth Nyasaye ne ok oyie mondo ng’ato otimnigi tim mamono, nikech noherogi. To nokwero ruodhi, kowachonigi niya,

²²“Kik umul joga maseyiero, kendo kik utim ni jonabi maga marach.”

²³Weruru ni Ruoth Nyasaye, un ji duto modak e piny, kendo pile ka pile, landuru kaka olocho.

²⁴Huluru ni ogendini duong’ne maler mondo ji duto owinj timbene madongo.

²⁵Ruoth Nyasaye duong’, kendo nyaka pake malich! Adier, nyaka miye duong’, moloyo nyiseche mamoko duto,

²⁶nikech nyiseche mag ogendini mamoko gin mana gik manono, Ruoth Nyasaye to nochweyo polo.

²⁷Duong’ maler gi duong’ mar loch okete dier, kendo teko gi ber duto ni kar dakne.

²⁸Un ji duto modak e piny, pakuru Ruoth Nyasaye! Dendeuru nikech duong’ne gi tekone.

²⁹Miuru nyinge duong’ mowinjore kode kendo keluru chiwo, ubigo e nyime! Ka Ng’ama Ler othinyore,

³⁰to un ji duto manie piny, kulreuru e nyime kutetni! En ema oseguro piny motegno, ma ok onyal ng’ingni

³¹Un polo gi piny, beduru gi mor, kendo un ji, nyisuru ogendni ni, “Ruoth Nyasaye e Ruoth!”

³²In nam wuo, kaachiel gi gik moko duto manie iyi. Un pewe, beduru mail, kaachiel gi gik moko duto ma un-go

³³Kendo yien duto mae bunge, mondo okog gi mor e nyim Ruoth Nyasaye, nikech obiro mondo orit piny.

³⁴ Gouru erokamano ni Ruoth Nyasaye, nikech ober, kendo herane mosiko ochwere.

³⁵Wachuru kama: Reswa, in Nyasaye ma jawarwa Chokwa, kendo reswa kuom ogendni mag piny, mondo wago erokamano ni nyingi maler, kendo wayud mor kwapaki.

³⁶Odend Ruoth Nyasaye ma Nyasach Israel higni gi higni. Eka ji duto nowacho niya, “Amin!” kendo ne gipako Ruoth Nyasaye.

³⁷Daudi noweyo Asaf kod owetene e nyim Sandug Muma mar Ruoth Nyasaye, mondo giti kanyo ndalo duto, kaka ne dwarore odiechieng’ kodiechieng’.

³⁸To noketo Obed-edom wuod Jeduthun kod Hosa mondo obed jorit dhout Hema. Obed-edom gi owetene ne gin ji piero auchiel gaboro.

³⁹Daudi noweyo bende Zadok jadolo kod owetene ma jodolo e Hema mar Ruoth Nyasaye, mane nie hembko mar Gibeon,

⁴⁰mondo gitim ni Ruoth Nyasaye misengni miwang’o pile okinyi godhiambo e kendo-mar-misango kaka ondiki e kitap chik mane Ruoth Nyasaye omiyo jo-Israel.

⁴¹Daudi nomiyo Heman gi Jeduthun kod jomoko mane oyier kendo oluong gi nyingegi ni mondo obed jower magoyo erokamano ni Ruoth Nyasaye ma herane mosiko ochwere.

⁴²Heman gi Jeduthun ne nigi tung’ gi ongeng’o kod kit thumbe moko mipakogo Nyasaye. To yawuot Jeduthun noket jorit dhoudi.

⁴³ Bang’e ji duto noa modhi miechgi. Daudi bende nodhi mondo one joode.