Read luo 1 Weche mag Ndalo 17 Bible Online

1 Weche mag Ndalo 17 - luo bible

1 Weche mag Ndalo 17

¹Kane Daudi osechako dak e ode mane ogero, nowacho ni Nathan janabi niya, “Koro an adak e ot moger maber gi yiend sida, to Sandug Muma mar Ruoth Nyasaye nie hema.”

²Nathan nodwoko Daudi niya, “Tim duto midwaro, nikech Nyasaye ni kodi.”

³To gotienono, wach Ruoth Nyasaye nobiro ni Nathan niya,

⁴“Dhi inyis Daudi jatichna ni Ruoth Nyasaye owacho niya: ‘In ok ema nigerna ot mondo adagie.

⁵Chakre ndalo mane agoloe jo-Israel e piny Misri nyaka chil kawuono, pok adak e ot, to asebet kadak e hema.

⁶Kuonde duto mane awuothoe gi jo-Israel, ne ok apenjo achiel kuom jobura mane aketo mondo obed jokwadh joga Israel gimomiyo ok gigerona ot mar yiend sida.’

⁷Bende inyis Daudi ni Ruoth Nyasaye Manyalo Gik Moko Duto owacho kama: ‘Nagoloi e lek kuma nikwayoe rombe, mondo ibed jatend joga Israel.

⁸Asebet kodi kuonde duto midhiye, kendo asetiekoni wasiki duto. Abiro miyo nyingi bedo gi huma, ka humb joma dongo mag piny,

⁹kendo abiro miyo joga Israel pinygi giwegi. Anagurgi kuno, mi gidagie mak othaggi kendo. Jomahundu ok nochak ochandgi kaka ne chandogi chon,

¹⁰chakre ndalo mane aketoe jobura mondo orit joga Israel, to natiek wasiki duto. An Ruoth Nyasaye anamiyi duong’, kendo anaguedh dhoodi mondo osiki.

¹¹Kisetho, miluwo kwereni, anaket achiel kuom yawuoti kari, kendo anagur lochne obed motegno.

¹²En ema nogerna ot, kendo anami lochne osik nyaka chieng’.

¹³ Anabedne ka wuon mare, to enobed ka wuoda. Ok nagol herane kuome, kaka ne agolo kuom jal mane okuongoni bedo ruoth,

¹⁴to anami obed motegno, kendo anami lochne gurre kuom joga nyaka chieng’.’’

¹⁵Nathan nonyiso Daudi weche duto mane ofwenyne,

¹⁶mi ruoth nodhi e nyim Ruoth Nyasaye, mobet piny. Nowacho niya, “A Ruoth Nyasaye, an ng’a, koso dhooda en ang’o, momiyo imiya duong’ kama?

¹⁷A Nyasaye, gima isetimona pod in ikwano ka gima tin, nimar bende isewacho ni dhooda nosik kuom ndalo mang’eny, kendo isenyisa kaka tienge ma biro nochal.

¹⁸A Ruoth Nyasaye, in ema ing’eya oko gi iye. Ang’o ma damed wachoni kuom duong’ ma isemiya?

¹⁹Isemiya duong’ ma kama nikech ihera, kendo nikech mano ema idwaro.

²⁰A Ruoth Nyasaye, pok wawinjo ni nitie Ruoth Nyasaye moro machal kodi. Onge Nyasaye machielo, to mak mana in.

²¹Ere oganda moro e piny, machalo gi jogi Israel? Bende nitie jopiny moro mane isedhi miwaro e tich wasumbni, miloko jogi? Isemiyo nyingi duong’ kuom timbe madongo kendo malich nikech iseriembo ogendi moko mondo owe thuolo ni jogi mane ireso kigolo e piny Misri.

²²Niloko jo-Israel mondo obed jogi nyaka chieng, kendo in Ruoth Nyasaye, ema isedoko Nyasachgi.

²³To koro Ruoth Nyasaye, mi singruok misetimona kaachiel gi dhooda mondo osik nyaka chieng’, kendo ichop gima isewacho.

²⁴Singruoknino mondo ogurre, kendo nyingi oyud duong’ nyaka chieng’, ka ji wacho niya, ‘Ruoth Nyasaye Manyalo Gik Moko Duto, ma Nyasach Israel en Nyasachgi adier!’ Kamano dhooda nodongi e nyimi.

²⁵In, Nyasacha, isenyisa ni ibiro dongo oda. Kuom mano asebedo gi chir mondo alem e nyingi.

²⁶A Ruoth Nyasaye, in e Nyasaye kendo isesingorina maber kama.

²⁷Emomiyo, Ruoth Nyasaye, yie iguedh oda mondo osik e nyimi nyaka chieng’, nimar gima iseguedho, nobed gi hawi ndalo duto.”