Read luo 1 Weche mag Ndalo 18 Bible Online

1 Weche mag Ndalo 18 - luo bible

1 Weche mag Ndalo 18

¹Bang’e Daudi noloyo jo-Filistia, mi gibedo moboch, kendo nomayogi Gath gii mier mokiewo kode.

²Noloyo jo-Moab bende, mi gibet e bwo lochne, kendo ne gigolone osuru.

³Bende Daudi noloyo Hadadezer ruodh Zoba-hamath, kane ruodhno dhi chungo rapar mar lochne e lweny but aora Yufrate.

⁴Daudi nomaye geche lweny alufu achiel, kendo nomako joidh farese alufu abiriyo, kod jolweny moko alufu piero ariyo. Nong’ado odond farese duto mag geche lweny, moweyo mana farese mia achiel.

⁵To kane jo-Aram moa Damaski obiro mondo okony Hadadezer ruodh Zoba, Daudi nonego ji alufu piero ariyo gariyo kuomgi.

⁶Eka noketo askeche ma jorit e piny jo-Aramgo, mi ne gibedo e bwo lochne, kendo ne gigolone osuru. Kuonde duto mane Daudi dhiye, Ruoth Nyasaye ne miyo olocho.

⁷Daudi noyako gilweny mag dhahabu mane jorit Hadadezer oting’o mokelo Jerusalem.

⁸ Bende noyako munde mathoth ahinya e Tibhath kod Kun ma miech Hadadezer. Mundego ema ne Solomon olosogo gima ne iluongo ni Nam gi sirni kod gik moko duto mitiyogo e Hekalu.

⁹Kane Tou ruodh Hamath owinjo ni Daudi oseloyo jolweny mag Hadadezer,

¹⁰nooro Hadoram wuode ir ruoth Daudi mondo omose, kendo opake kuom loyo Hadadezer nimar Hadadezer ne jasik Tou. Hadoram nokelo ni Daudi gik moko mag dhahabu gi mag fedha kod mag mula.

¹¹Magi bende ruoth Daudi nochiwo ni Ruoth Nyasaye, kaachiel gi fedha kod dhahabu ma noyako kuom ogendni mamoko duto mane oseloyo, kaka jo-Edom gi jo-Moab gi jo-Amon gi jo-Filistia kod jo-Amalek.

¹² Abishai wuod Zeruya nonego jo-Edom alufu apar gaboro e holo Kado.

¹³Noketo askeche ma jorit e piny Edom, mi jo-Edom duto nobet e bwo loch Daudi. Kuonde duto mane Daudi dhiye, Ruoth Nyasaye ne miyo olocho.

¹⁴Daudi nobedo ruodh Israel duto, morito piny gi kue, kong’ado bura kare ni joge duto.

¹⁵Joab wuod Zeruya ne jatend jolweny, to Jehoshafat wuod Ahilud ne jachan weche.

¹⁶Zadok wuod Ahitub kod Ahimelek wuod Abiathar ne jodolo, Savsha to ne jagoro.

¹⁷Benaya wuod Jehoyada ne jatend jo-Kereth kod jo-Peleth, kendo yawuot Daudi ne jodongo ma konye.