Read luo 1 Weche mag Ndalo 19 Bible Online

1 Weche mag Ndalo 19 - luo bible

1 Weche mag Ndalo 19

¹Bang’e, Nahash ruodh jo-amon notho, mi wuode nodoko ruoth kare.

²Daudi nowacho niya, “Abiro timo ni Hanun wuod Nahash maber, mana kaka wuon mare notimona maber.” Omiyo Daudi nooro joote mondo oduog chunye kuom tho wuon mare. To kane joote Daudi ochopo e piny jo-Amon, mi gidhi ir Hanun mondo giduog chunye,

³jodong Amon nowacho ni Hanun niya, “Bende iparo ni Daudi oseoro jogi mondo omi wuoru duong’ adier? Ooyo, gibiro mana ni mondo gicheng pinywa, eka oyud yo ma onyalo loyego.”

⁴Kuom mano, Hanun nomako joote Daudi molielo tikgi, kendo ong’ado lepgi nyabathe, chakre nungogi kalor piny. Bang’e noriembogi.

⁵Kane Daudi owinjo gima otimore, nooro ji mondo oromnigi, nikech ne giyudo wichkuot maduong’. Nowacho ni mondo gibed jeriko mondi, nyaka yie tikgi dongi, eka giduogi.

⁶Hanun gi jo-Amon noneno ni gisemiyo Daudi ojok kodgi, omiyo ne gioro fedha moromo kilo alufu piero adek mondo giholgo geche lweny gi joma didhgi kuom jo-Aram-naharaim gi jo-Aram-Maaka kod jo-Zoba.

⁷Ne giwako ruodh Maaka gi jolwenje kendo ne giholo gechene mag lweny alufu piero adek gariyo, mi jogo nobiro mojot but Madeba. Jo-Amon bende nowuok e miechgi, kendo ne giyworo ni lweny.

⁸Kane Daudi owinjo wachno, nooro Joab kod joma rateke duto mondo oked kodgi.

⁹Jo-Amon nowuok, mi ne giriedo ni lweny e dhoranga dala, to ruodhi mane obiro konyogi nochanore e pap.

¹⁰Joab noneno ni lweny olwore, omiyo noyiero thuond jo-Israel moko, mochano kochomo jo-Aram.

¹¹To jomoko duto modong’, noketi e lwet Abishai owadgi, ka gichomo jo-Amon.

¹²Nowachone niya, “Kineno ka jo-Aram tek madwaro loya, to nyaka ibi ikonya. To ka jo-Amon dwaro loyi, eka nabi akonyi.

¹³Bed gi chir, waked matek ni jowa, kendo ni miech Nyasachwa. To Ruoth Nyasaye mondo otim gima oneno ni ber.”

¹⁴Kamano Joab gi joge norado gi jo-Aram, moriembo.

¹⁵Kane jo-Amon oneno ni jo-Aram ringo, gin bende ne giringo Abishai owadgi Joab, mi gidonjo e dalagi. Eka Joab nodok Jerusalem.

¹⁶To kane jo-Aram oneno ni jo-Israel oseloyogi, ne gioro joote mondo oluong jo-Aram mane odak loka aora Yufrate, mi ne gibiro, ka Shobak ma jatend oganda lweny mar Hadadezer otelonigi.

¹⁷Kane Daudi oyudo wach ni gibiro, nochoko jolwenj Israel duto kanyakla, mi giidho loka Jordan mondo gikanigi. Jo-Aram bende noriedo ni lweny, kochomo Daudi gi jogi, mi ne girado.

¹⁸To jo-Israel noloyogi, mi giringo, kendo Daudi gi joge nonego joidh farese alufu abiriyo, gi jolweny mamoko alufu piero ang’wen. Shobak bende notho.

¹⁹Kane jo-Hadadezer oneno ni jo-Isarel oloyogi, ne giywagre ni Daudi, mi gibedo e bwo lochne. Bang’ mano, jo-Aram nodagi konyo jo-Amon kendo.