Read luo 1 Weche mag Ndalo 21 Bible Online

1 Weche mag Ndalo 21 - luo bible

1 Weche mag Ndalo 21

¹Koro Satan ne dwaro hinyo jo-Israel, mi nosundo Daudi mondo okwan gi.

²Omiyo Daudi nochiko Joab gi jodong oganda ni mondo odhi okwan jo-Isarel, chakre Dan yo nyandwat, nyaka Beer-sheba yo milambo, kendo mondo onyise kar rombgi.

³To Joab nodwoke niya, “Kata da bed ni Ruoth Nyasaye omedo joge nyadi mia achiel, donge giduto digibed jotichne? Ang’o momiyo idwaro kwanogi? Gima kamano biro mana miyo jo-Israel doko joketho!”

⁴Kata kamano, ruoth nochuno Joab momiyo owuotho e piny jo-Israel duto. Bang’e nodwogo Jerusalem

⁵monyiso Daudi kar romb ji. E piny Israel ne nitie ji tara achiel gi alufu mia achiel (1,100,000) manyalo kedo, to e piny Juda ne nitie ji alufu mia ang’wen gi piero abiriyo (470,000), ma bende nyalo kedo.

⁶To Joab ne ok okwano jo-Lawi gi jo-Benjamin, nikech nosin gi chik ruoth.

⁷To gima nosetimore ne ok long’o ni Nyasaye, mi nokumo jo-Israel.

⁸Eka Daudi nowacho ni Nyasaye niya, “Aseketho ahinya kuom gima asetimo. To koro akwayi ni mondo iwena richona, nikech asetimo gima ofuwo.”

⁹Mi Ruoth Nyasaye nowacho ni Gad jakor wach mar Daudi niya,

¹⁰“Dhiyo, inyis Daudi ni Ruoth Nyasaye owacho kama: ‘Aketo gik moko adek e nyimi: yier achiel kuomgi monego atimni.’ ”

¹¹Omiyo Gad nodhi ir Daudi mowachone niya, “Ruoth Nyasaye owacho ni mondo iyier achiel kuom gik moko adekgi:

¹²Higni adek mag kech kata dueche adek ma wasiki lawoue kendo negou, kata ndalo adek ma Ruoth Nyasaye owuon kelonu tho ka dera marach biro e piny kendo malaika mar Ruoth Nyasaye nego ji e piny Israel duto. Koro nyisa gima dadwok Jal ma noora.”

¹³Daudi nodwoko Gad niya, “An gi masira maduong’, to ber mondo abed e lwet Ruoth Nyasaye, nimar ng’wonone duong’ gi lala. To kik abed e lwet dhano.”

¹⁴Omiyo Ruoth Nyasaye nooro tho malit kuom jo-Israel, monego ji alufu piero abiriyo.

¹⁵Nyasaye nooro malaika mondo oketh Jerusalem, to kane oneno ka malaika kethe, noloko parone kuom masira mane odwaro kelo, omiyo nowacho ni malaika mane nego ji niya, “Oromo! Koro duok lweti.” To noyudo ka malaikano ochung’ but kar dino mar Ornan ja-Jebus.

¹⁶Daudi nong’iyo malo moneno malaika mar Ruoth Nyasaye kochung’ e kind polo gi piny ka en gi ligangla e lwete ma nodwaro tiekogo Jerusalem. Daudi gi jodonge noriere piny auma ka girwakore gi pien gugru.

¹⁷Daudi nowacho ni Nyasaye niya, “An ema nagolo chik mondo okwan ji, kendo an e jakwath mosebedo ka timo marach. Rombe machandoregi to otimo ang’o? A Ruoth Nyasaye ma Nyasacha, akwayi ni an ema mondo ikuma kod dhoodwa, to igeng’ tho malitni kik mak jogi.”

¹⁸Eka malaika mar Ruoth Nyasaye nowacho ni Gad mondo ochik Daudi odhi kar dino mar Ornan ja-Jebus, ogerie kendo-mar-misango ji Ruoth Nyasaye.

¹⁹Omiyo Daudi notimo kaka Ruoth Nyasaye nomiyo Gad owachone, modhi kanyono.

²⁰To Ornan noyudo diemo ngano. Kane oting’o wang’e, noneno malaika, to yawuote ang’wen mane ni kode noringo mopondo.

²¹Kane Daudi ochopo machiegni, Onan nowichore, kendo ka noneno ruoth, nowuok oa kar dino. Nodhi mogoyo chonge piny e nyim Daudi mokulore nyaka e lowo.

²²Daudi nowachone niya, “Yie ing’iew kar dinoni gi nengo makare, mondo agerie kendo-mar-misango ni Ruoth Nyasaye, mondo tho manego joga orum.”

²³Onan nodwoko Daudi niya, “Ruodha, kawe, kendo itim kode gima idwaro. To bende ruedhi minyalo timogo misango, kod yien mag dino minyalo chwako, kaachiel gi ngano minyalo timogo misango mar mogo, eki amiyi duto!”

²⁴To ruoth Daudi nodwoko Onan niya, “Ooyo, abiro mana ng’iewe gi nengo makare, ok nakaw giri ami Ruoth Nyasaye, kata timone misango gi gima ayudo nono.”

²⁵Kuom mano, Daudi nong’iewo kar dinono gi Onan kuom dhahabu moromo kilo abiriyo.

²⁶Eka nogero ni Ruoth Nyasaye kendo-mar-misango kanyono, motimoe misengni miwang’o pep gi mag sawo, kolamo Ruoth Nyasaye. Mi Ruoth Nyasaye nodwoke gi mach moa e polo, molwar e kendo-mar-misango.

²⁷Eka Ruoth Nyasaye nochiko malaika mondo odwok ligangla e olalo.

²⁸Kane Daudi oneno ni Ruoth Nyasaye oseneno kwayone mane okwayo kar dino mar Ornan ja-Jebus, nochako timo misango kanyo.

²⁹Kata obedo ni e ndalogo Hema Maler mar Ruoth Nyasaye kod kendo-mar-misango mane Musa oloso e thim ne pod ni e hembko man Gibeon,

³⁰Daudi ne ok odhi kanyo mondo openj Ruoth Nyasaye wach, nikech ligangla mar malaika mar Ruoth Nyasaye nobwoge.