Read luo 1 Weche mag Ndalo 22 Bible Online

1 Weche mag Ndalo 22 - luo bible

1 Weche mag Ndalo 22

¹Omiyo koro Daudi nowacho niya, “Ma e kama od Ruoth Nyasaye nobedie, kaachiel gi kendo ma jo-Israel notimie misango.”

²Daudi nogolo chik mondo ochok jodak duto manie piny Israel. Eka noketogi mondo gipa kite kendo giger Od Nyasaye.

³Bende noiko nyinyo modhuro mondo olosgo musmande gi teke miriwogo dhoudi, kaachiel gi mula mokalo apima

⁴kod yiend sida mak kwan, nimar jo-Sidon gi jo-Turo nokelone yiend sida mang’eny.

⁵Daudi nowacho niya, “Solomon wuoda pod rawera mayot, to ot midwaro gero ni Ruoth Nyasaye onego obed maber miwuoro, kendo ma humbe olak e pinje duto. Omiyo nyaka aikne gik gedo.” Kuom mano Daudi noiko gik mogundho ka pok otho.

⁶Bange noluongo Solomon wuode, mochike ni mondo oger ot ni Ruoth Nyasaye ma Nyasach Israel,

⁷ kowacho niya, “Solomon wuoda, nachano mondo ager ot mamiyogo Ruoth Nyasaye ma Nyasacha duong’.

⁸To Ruoth Nyasaye nokwera, kawachona niya, ‘Isechuero remo mang’eny, kendo isekedo lwenje madongo e nyima, omiyo ok nigerna ot.

⁹To ininywol wuowi ma lochne nobed gi kue. Anamiye kue, kamiyogi yueyo e ndalone.

¹⁰En ema nogerna ot. Enobed wuoda, kendo anabed wuon mare, mi nagur lochne e Israel nyaka chieng’.’

¹¹Koro wuoda, Ruoth Nyasaye ma Nyasachi obed kodi, kendo oguedhi, mondo igerne Hekalu, kaka nosingore.

¹²Ruoth Nyasaye ma Nyasachi mondo omiyi rieko duto mondo irit chikne koseketi ruodh Israel.

¹³ Inibed gi hawi mana kimako chik kod buche Ruoth Nyasaye mane Musa omiyo jo-Israel. Bed gi chir, kendo gi jing’o! Kik chunyi nyosre, kata kik ibed jaluoro.

¹⁴“Kata obedo ni an gi thagruok mang’eny, to koro aseiko ni Od Ruoth Nyasaye dhahabu ma dirom kilo tara adek, kod fedha moromo kilo tara piero adek gabich, kaachiel gi mula kod nyinyo mokadho apima. Yien gi kite bende aseiko. In bende nyaka imed moko.

¹⁵To bende in gi jotich mang’eny, kaka jopa kite gi jogedo gi jopa bao, kod jotich moko mathoth

¹⁶molony e tije mopogore opogore mag dhahabu gi fedha gi mula kod nyinyo. Omiyo koro chak tich, kendo Ruoth Nyasaye mondo obed kodi!”

¹⁷Daudi nochiko jodong Israel ni mondo okony Solomon wuode, kowachonigi niya,

¹⁸“Ruoth Nyasaye ma Nyasachu ni kodu. Osemiyou kue kuonde duto, kendo osechiwo joma odak e pinyni e lweta, mi koro giyie loch Ruoth Nyasaye gi joge.

¹⁹Omiyo koro keturu chunyu gi parou kuom dwaro Ruoth Nyasaye ma Nyasachu. Chakuru gero Hekalu ni nying Ruoth Nyasaye mondo Sandug Muma mare, kod gik maler mitiyogo kilame, oyudie kar bet.”