Read luo 1 Weche mag Ndalo 23 Bible Online

1 Weche mag Ndalo 23 - luo bible

1 Weche mag Ndalo 23

¹ Kane Daudi koro oseti, kendo hike oniang’, noyiero Solomon wuode mondo obed ruodh Israel.

²Nochoko jodong Israel duto kaachiel gi jodolo kod jo-Lawi.

³Jo-Lawi machwo ma johigni piero adek kata moloyo kanyo nondik nyinggi, mi kar rombgi noromo alufu piero adek gaboro.

⁴Alufu piero ariyo gang’wen kuomgi noket mondo oti e Od Ruoth Nyasaye, to alufu auchiel mondo obed jotelo kod jong’ad bura,

⁵to alufu ang’wen noket jorit dhorangeye, kendo alufu ang’wen mondo opak Ruoth Nyasaye gi thumbe mane Daudi oloso.

⁶Daudi nopogogi e migepe miluongo gi nying Gershon gi Kohath kod Merari, ma yawuot Lawi.

⁷Yawuot Gershon ne gin Laadan kod Shimei.

⁸Laadan nonywolo yawuowi adek, ma nyinggi Jehiel, ma nodoko jatelo, gi Zetham kod Joel.

⁹Mago ne jotend dhout Laadan.

¹⁰Yawuot Shimei ne gin ang’wen, ma nyinggi Jahath gi Ziza gi Jeush kod Beria.

¹¹Jahath ne en jatelo, to Ziza ne jalupne. Jeush gi Beria nokwan kaka dhoot achiel, nikech nyithindgi ne nok.

¹²Yawuot Kohath ne gin angwen, ma nyinggi Amram gi Izhar gi Hebron kod Uziel.

¹³ Yawuot Amram ne gin Harun kod Musa. To Harun gi dhoode nowal ni mondo oti tich dolo ni Ruoth Nyasaye, ka gichiwone gik maler, kendo timone misango, kendo guedho ji e nyinge nyaka chieng’.

¹⁴To joka Musa, ng’at Nyasaye, ne okwan kuom jo-Lawi.

¹⁵Yawuot Musa ne Gershom kod Eliezer.

¹⁶Kuom joka Gershom, Shubael nobedo jatelo,

¹⁷to kuom joka Eleazer, Rehabia ema notelo. Eleazer ne onge yawuowi moko, to Rehabia wuode nonywolo yawuowi mang’eny.

¹⁸To kuom joka Izhar, Shelemoth ne jatelo.

¹⁹Yawuot Hebron ne gin Jeria mane obedo jatelo, gi Amaria jalupne, gi Jahaziel mar adek, kod Jekameam mar ang’wen.

²⁰Yawuot Uziel ne gin Mika, ma nobedo jatelo, kod Ishia jalupne.

²¹Yawuot Merari ne gin Mali kod Mushi. To yawuot Mali ne gin Eleazar kod Kish.

²²Eleazar notho, moweyo nyiri lilo, kendo owetegi ma yawuot Kish nokendogi.

²³Yawuot Mushi ne gin adek, ma nyinggi Mali gi Eder kod Jeremoth.

²⁴Mago ne gin jo-Lawi, ma nyinggi ochan kaluwore gi nying jodong dhoutgi. Ng’ato ka ng’ato kuomgi ma hike piero ariyo kata moloyo kanyo, nomi tich e Od

²⁵Ruoth Nyasaye, nikech Daudi nosewacho niya, “Ruoth Nyasaye ma Nyasach Israel osemiyo joge kue, kendo koro Jerusalem e kar dakne nyaka chieng’.

²⁶ Omiyo koro jo-Lawi ok onego oting’ Sanduk kata gik lemo moko mitiyogo kode.”

²⁷Kuom wechene mogikgo, Daudi nochiko mondo ondik jo-Lawi ma hikgi piero ariyo kata moloyo kanyo.

²⁸ Tichgi ne en konyo joka Harun tiyo e Od Ruoth Nyasaye. Nomigi tich rito udi mag Od Nyasaye gi alworane, kendo lwoko gik lemo duto, kod tiyo tije moko duto mag Od Nyasaye.

²⁹Ne giiko makati miketo e nyim Ruoth Nyasaye pile, kod mogo mayom mitimogo misango, gi makati ma ok ketie thowi kod chapat gi kek moko mikonyruokgo e lemo, kendo ne girito gik mipimogo gik moko.

³⁰Ne onego giti e nyim Ruoth Nyasaye pile, okinyi godhiambo, ka gipake kendo gigoyone erokamano.

³¹Ne gikonyo bende joma ne timo misango miwang’o pep ni Ruoth Nyasaye e ndalo Sabato, kendo ka due opor, kendo en ndalo moketi, kaka nochan-gi.

³²Jo-Lawi nomi bende tich rito Hemb Romo, kod Kama Ler, to joka Harun owetegi ema nomi tich dolo e Od Ruoth Nyasaye.