Read luo 1 Weche mag Ndalo 26 Bible Online

1 Weche mag Ndalo 26 - luo bible

1 Weche mag Ndalo 26

¹Magi e migepe mag jorit rangeye: Joka Kora ne gin Meshelemia wuod Kore ma wuod Ebiasaf.

²Yawuot Meshelemia ne gin Zakaria wuod Makabayo, gi Jediael mar ariyo, gi Zebedia mar ang’wen,

³gi Elam mar abich, gi Jehohanan mar auchiel, kod Elioenai mar abiriyo.

⁴ Nyasaye noguedho Obed-edom momiye yawuowi ma nyinggi Shemaya wuode makayo, gi Jehozabad mar ariyo, gi Joa mar adek gi Sakar mar ang’wen, gi Nathaneel mar abich,

⁵gi Amiel mar auchiel, gi Isakar mar abiriyo, kod Peulthai mar aboro.

⁶Shemaya wuod Obed-edom nonywolo yawuowi ma nobedo jotelo kuom joodgi, nikech ne gin gi rieko.

⁷Yawuot Shemaya gogo ne gin, Othni, gi Refael gi Obed kod Elzabad, to ominene ma bende ne nigi rieko ne gin Elihu gi Shemakia.

⁸Mago duto ne gin joka Obed-Edom. Gin kaachiel gi owetegi kod yawuotgi, ne gin joma riek kendo mowinjore kod tich Hekalu. Giduto ne gin ji piero auchiel gariyo.

⁹Yawuot Meshelemia kod owetene ne gin ji apar gaboro ma bende ne nigi rieko.

¹⁰Yawuot Hosa ja-Merari ne gin Shimri mane Hosa oketo jatelo, kata ne ok en kayo kamano,

¹¹gi Hilkia mar ariyo, gi Tebalia mar adek, kod Zekaria mar ang’wen. Kar romb yawuot Hosa kaachiel gi owetene ne apar gadek.

¹²Jodong dhoudi ema notelo ni migepe mag jorit rangeye. Tijgi ne en tiyo e Od ruoth Nyasaye kaachiel gi owetegi.

¹³Dhoudi madongo gi matindo nogoyo ombulu e kindgi giwegi mondo gipog tich rito rangeye.

¹⁴Ombuklu mar rangach man yo wuok chieng’ nolwar kuom Shemelia. Eka ne gigoyo ombulu ni wuode Zekaria, ma jabura mariek, moyudo rangach man yo nyandwat.

¹⁵Obed-edom noyudo rangach man yo milambo, to yawuote noyudo tich rito od keno.

¹⁶Hosa noyudo rangach man yo podho chieng’ kod ranga Shekeleth man e yo maidho.

¹⁷Arita duto noket machalre. Ndalo duto, jo-Lawi auchiel ne rito rangach man yo wuok chieng’ to ang’wen ne rito man yo nyandwat, kendo ang’wen man yo milambo, to ariyo ariyo ne rito od keno ka od keno.

¹⁸Ji auchiel ne rito laru mochiel gi sirni man yo podho chieng’. Ang’wen kuomgi ne rito yo michopogo e laruno, to ariyo ne rito laru hie.

¹⁹Mago ne e migepe mag joka Kora gi joka Merari mane rito rangeye.

²⁰Jo-Lawi moko ne rito od keno mag Od Nyasaye kod kuonde mikanoe chiwo momi Ruoth Nyasaye.

²¹Kuom nyikwa Laadan ma jaka Gershon

²²Jehiel kod owetene ma Zetham gi Joel ema ne rito kuonde keno mag Od Ruoth Nyasaye. Ne gin jotend dhout Laadan jaka Gershon.

²³Kuom dhout Amram gi Izhar gi Hebron kod Uziel

²⁴Shubael jaka Gershom ma wuod Musa ne jatend jorit kuonde keno.

²⁵To Shelemoth wuod Zikri, ma wuod Joram, ma wuod Isaya, ma wuod Rehabia, ma wuod Eliezer, ne jatend joka Eliezer owadgi Gershom,

²⁶Shelemothno kaachiel gi owetene ema ne rito udi mikanoe chiwo mane Daudi gi jodong dhoudi, gi jotend ogend lweny madongo gi matindo, kod jotend jolweny moko osechiwo ni Ruoth Nyasaye.

²⁷Ne giwalo gik moko kuom gik mane ope e lweny mondo otigo e Od Ruoth Nyasaye.

²⁸Bende gik mane Samuel janen, gi Saulo wuod Kish, gi Abner wuod Ner, kod Joab wuod Zeruya ochiwo ni Ruoth Nyasaye ne nie lwet Shelemoth kod owetene nikech gin ema ne girito gik moko duto mochiw ni Ruoth Nyasaye.

²⁹Kuom joka Izhar, Kenania kod yawuote ne gin jogoro gi jong’ad bura e piny Israel.

³⁰Kuom joka Hebron, Hashabia kod owetene ema nobedo jotend jo-Israel modak yo podho chieng’ mar aora Jordan, ka ging’iyo tich Ruoth Nyasaye kod tich ruoth. Ne gin ji mariek, moromo alufu achiel gi mia abiriyo. Jeria ne en jatend joka Hebron-go.

³¹E higa mar piero ang’wen mar loch Daudi, nonon anywola joka Hebron, kendo noyud ni kara joma riek ma nodak Jezer-gilead ne gin joka Hebron.

³²Ruoth Daudi noketo jodong dhoudi mariek alufu ariyo gi mia abiriyo ma joodgi Jeria mondo orit jo-Reuben gi jo-Gad kod jo-Manase konchiel e yore duto mag tich Nyasaye kod tich rito piny.