Read luo 1 Weche mag Ndalo 28 Bible Online

1 Weche mag Ndalo 28 - luo bible

1 Weche mag Ndalo 28

¹Daudi nochoko jotend Israel duto Jerusalem. Ne gin jodong dhoudi, gi jotend joma ne tiyo ni ruoth, gi jotend ogend lweny madongo gi matindo, gi joma ne rito mwandu kod jamb ruoth gi mag yawuote, kaachiel gi jong’ad bura gi thuondi kod joge duto mane nigi teko.

² Eka Daudi nochung’ mowacho niya, “Winjuru owetena gi jothurwa. Ne achano mondo ager ot ma Sandug Muma mar Ruoth Nyasaye nyalo betie, mondoo obed raten tiend Nyasachwa. Omiyo ne aiko gik moko duto ma dagerego.

³To Nyasaye nowachona niya, ‘Ok inigerna ot, nikech in ijalweny, kendo isechwero remo.’

⁴Kata kamano Ruoth Nyasaye ma Nyasach Israel noyiera kuom joodwa duto mondo abed ruodh Israel nyaka chieng’, nikech dhood Juda ema nomiyo loch, to kuom dhood Juda, od wuora ema noyiero, to kuom yawuot wuora an ema noyiera, mi oketa ruodh Israel.

⁵Ruoth Nyasaye osemiya yawuowi mang’eny, to kuom yawuowigo duto, Solomon ema oseyiero mondo obed ruodh Israel, korito jo-Ruoth Nyasaye.

⁶Ruoth Nyasaye nowachona niya, ‘Solomon wuodi ema aseyiero mondo ogerna ot gi lache, nikech aseyiere mondo obed wuoda to an abed wuon mare.

⁷Korito chikna kaka iritogi sani, to anagur lochne nyaka chieng’.’

⁸To koro akwayou uduto e nyim Nyasaye, kendo e nyim jo-Ruoth Nyasaye duto ni mondo unon matut chike mag Ruoth Nyasaye ma Nyasachu, mondo piny maberni osik maru, kendo uweye kodong’ ni nyithindu nyaka chieng’.

⁹“To in Solomon wuoda, par Nyasach wuoru, kendo ichiwri mondo itine gi chunyi duto, nimar Ruoth Nyasaye ng’iyo chuny ji duto, kendo ofwenyo paro mag dhano. Kidware, to iniyude, to kiweye, to enojwang’i nyaka chieng’.

¹⁰Emomiyo par malong’o ni Ruoth Nyasaye oseyieri ni mondo iger ot moyangne. Bed gi jing’o kendo igere!”

¹¹Daudi nonyiso Solomon wuode kit gedo mar agoch Hekalu kod utene, gi ut keno gi ut gorofa gi udi maiye, kod raum mar Sandug Muma, miluongo ni kar-ng’wono.

¹²Nonyise bende paro ma en go kuom gero laru mag Od Ruoth Nyasaye, gi udi mane olwore, gi ut keno mag Od Nyasaye kod udi ma nokanie mich maler mochiw ni Ruoth Nyasaye.

¹³To bende nonyise kaka odwaro mondo ochan jodolo gi jo-Lawi e migepegi, kendo opognigi tije duto mag Od Ruoth Nyasaye kendo kaka onego los gik mitiyogo e lemo.

¹⁴Bende nonyise pek mar dhahabu gi fedha monego losgo gik lemo duto,

¹⁵kaka: sis teyni mag dhahabu gi techegi, gi sis teyni mag fedha gi techegi ma moro ka moro owinjore gi tije,

¹⁶gi mesni mag dhahabu miketoe makati e nyim Nyasaye pile, gi mesni moko mag fedha,

¹⁷kod rachwopi gi nyilerni kod kikombe mag dhahabu maler gi tewni mag dhahabu gi mag fedha,

¹⁸gi kendo miwang’oe ubani, kod gach lweny mar dhahabu maler, ma tiende ni kerubi moyaro bwombegi mondo oumgo Sandug Muma mar Ruoth Nyasaye.

¹⁹Daudi nowacho niya, “Magi duto Ruoth Nyasaye owuon ema onyiso. Tichna ne en mana dwaro rieko kaka digere.”

²⁰Bang’e Daudi nowacho ni Solomon wuode niya, “Bed gichir, kendo gi jing’o! Kik chunyi nyosre, kendo kik iluor, to chak mana tich, nikech Ruoth Nyasaye ma Nyasacha nobed kodi, kendo ok nojwang’i kata weyi ka pok itieko tije duto mag Ode.

²¹Migepe mag jodolo kod jo-Lawi oikore ni tich Od Nyasaye. Jotich duto molony bende oikore konyi e tije duto, kendo jotelo, kaachiel gi ji duto, nobed e lueti.”