Read luo 1 Weche mag Ndalo 5 Bible Online

1 Weche mag Ndalo 5 - luo bible

1 Weche mag Ndalo 5

¹ Reuben ne en wuod Israel makayo, to noterore gi chi wuon mare, omiyo kata obedo ni ne en kayo kamano, duong’ne mar dala ne omi yawuot Josef ma wuod Israel. To joka Josef ne ok omi duong’ mar dala kaka owinjore tim ni dhood wuowi makayo,

² nimar Juda noloyo owetene gi duong’, nikech ode ema nodoko od ruoth. To adier duong’ mar dala ne en mar Josef.

³Yawuot Reuben ma wuod Israel makayo ne gin Hanok gi Palu gi Hezron kod Karmi.

⁴ Joka Joel e magi: Joel nonywolo Shemaya, to Shemaya nonywolo Gog, Gog nonywolo Shimei,

⁵to Shimei nonywolo Mika. Mika nonywolo Reaya, to Reaya nonywolo Baal.

⁶Baal to nonywolo Beera. Beera ne en achiel kuom joma ne Tiglath-peleser ruodh Asuria odaro, motero e tuech piny mabor. Ne en jaduong’ joka Reuben.

⁷Ma e kaka ochan owetene e dhoutgi: Jeyel ne jatelo, eka Zekaria

⁸kod Bela wuod Azaz ma wuod Shema ma wuod Joel ne luwo. Ne gidak Aroer, mi ne gilandore nyaka Nebo gi Baal-meon.

⁹Bende ne gidak e yo wuok chieng’ nyaka chop e thim mopogo kindgi gi aora Yufrate, nikech jambgi nosemedore e piny Gilead.

¹⁰E ndalo loch Saulo ne gikedo gi jo-Hagri, mi ginego, kendo gidak e miechgi e piny man yo wuok chieng’ mag Gilead.

¹¹Jo-Gad nomanyore gi jo-Reuben, ka gidak e piny Bashan nyaka Saleka.

¹²Joel ma jatendgi gi Shafan jalupne gi Janai kod Shafat ne jodak Bashan.

¹³Jowetegi nowuok kuom dhout Mikael gi Meshulam gi Sheba gi Jorai gi Jakan gi Zia kod Eber.

¹⁴Ji abiriyogo ne yawuot Abihail wuod Huri ma wuod Jaroa, ma wuod Gilead, ma wuod Mikael, ma wuod Jeshishai, ma wuod Jado, ma wuod Buz.

¹⁵Ahi wuod Abdiel ma wuod Guni ne jatend dhoodgi.

¹⁶Ne gidak e piny Gilead kod e miech Bashan, kendo e thim Sharon nyaka mbape.

¹⁷Nying jogo duto nondik e ndalo mag lochh Jotham ruodh Juda, kendo Jeroboam ruodh Israel.

¹⁸Jo-Reuben gi jo-Gad kod jo-Manase konchiel ne nigi jolweny molony alufu piero ang’wen gauchiel gi mia abiriyo kod piero auchiel. Ne gikore gi kuodi gi tong’ kod asere.

¹⁹Ne gikedo gi jo-Hagri gi jo-Getur gi jo-Nafish kod jo-Nodab.

²⁰Nyasaye nokonyogi e lweny nikech ne giywakne kane gikedo. Nowinjogi nikech ne gigene, mi ne giloyo jo-Hagri gi ji duto mane jo-Hagri oseriworego.

²¹Ne gipeyo jamb jo-Hagri, ngamia alufu piero abich gi rombe alufu mia ariyo gi piero abich, kod kenje alufu ariyo, kendo ne gimako ji alufu mia achiel.

²²Ne ginego ji mang’eny, nikech Nyasaye ema nomiyo lwenyno obedoe. Bang’e ne gidak e pinyno kar jogo, nyaka ndalo mane odargi kiterogi e tuech Babulon ochopo.

²³Jo-Manase konchiel nodak e pinyno chakre Bashan nyaka Baal-hermon gi Senir kod Got Harmon. Ne ging’eny,

²⁴kendo jotend dhoutgi ne Efer gi Ishi gi Eliel gi Azriel gi Jeremia gi Hodavia kod Jadiel. Ne gin thuondi, kendo joma rahuma.

²⁵To ne giweyo Nyasach kweregi, ka gindhogore gi nyisech ogendni mag pinyno mane Nyasaye otieko mondo oyawnegi thuolo.

²⁶ Omiyo Nyasach Israel nomiyo Pul, ma bende iluongo ni Tiglath-peleser ruodh Asuria mondo omonj jo-Reuben gi jo-Gad kod jo-Manasego. Nodarogi moterogi nyaka Hala gi Habor gi Hasa kod aora Gozan, kuma gidakie nyaka chil kawuono.