Read luo 2 Weche mag Ndalo 1 Bible Online

2 Weche mag Ndalo 1 - luo bible

2 Weche mag Ndalo 1

¹Solomon wuod Daudi nogurore e tich ruoth e pinye. Ruoth Nyasaye ma Nyasache ne ni kode, kendo nomiye duong’ ahinya.

²Solomon noluongo jotend ogend lweny madongo gi matindo, kod jong’ad bura, gi jotelo duto mag Israel ma jodong gwenge.

³Eka Solomon gi ji duto ma nochokore kode ne jodhi e hembko mane ni Gibeon, ni mar Hemb Romo mane Nyasaye romoe gi joge, mane Musa jatich Ruoth Nyasaye oloso e thim, ne ni kanyo,

⁴ Daudi nosegolo Sanduk mar Nyasaye Kiriath-jearim motero Jerusalem, nimar nosegurone hema kuno.

⁵ To kendo-mar-misango mar mula mane Bezalel wuod Uri ma wuod Hur oloso ne ni Gibeon e nyim Hema mar Ruoth Nyasaye. Solomon kod oganda duto nolamo Ruoth Nyasaye kanyo.

⁶Solomon noidho mochung’ e bath kendo-mar-misango mar mula mane nie nyim Hemb Romo, motimoe misengni miwang’o pep alufu achiel e nyim Ruoth Nyasaye.

⁷Gotieno nogo Nyasaye nofwenyore ni Solomon mowachone niya, “Kwa gima idwaro mondo amiyi.”

⁸Solomon nodwoko Nyasaye niya, “Ninyiso ni ihero Daudi wuora gi hera mosiko, kuom ket ma iketago ruoth kare.

⁹ A Ruoth Nyasaye, iseketa ruodh oganda ma ji thothie ka kwoyo, koro yie ichop singruok mane isingorigo ni Daudi wuora.

¹⁰Yie imiya rieko mondo ang’e kaka datel ni ogandani, nimar ere ng’amam dinyal rito jogi mang’enygi?”

¹¹Eka Nyasaye nodwoko Solomon niya, “Nikech chunyi chalo kamano kendo ok ikwayo mwandu kata fedha, kata pak, kata tho wasiki, kata kwayo ni mondo idag aming’a, to isekwayo mana rieko mar ng’eyo kaka ditel ni oganda maseketi ruodhgi,

¹²ero amiyi rieko kod ng’eyo. To bende abiro medi fedha, gi mwandu, kod pak moloyo ruodhi duto mosekuongoni kata ma nowuog bang’i.”

¹³Eka Solomon noa e nyim Hemb Romo, kolor a hembko mane ni Gibeon, modhi Jerusalem, kuma noritoe piny Israel.

¹⁴ Solomon nochako dwaro geche mag lweny gi farese, nyaka nobedo gi geche alufu achiel gi mia ang’wen, gi farese alufu apar gariyo. Moko kuomgi noketo e mier mag geche to moko ne en go Jerusalem.

¹⁵Nomiyo fedha gi dhahabu obedo mang’eny Jerusalem ka kuoyo, kendo nomiyo yiend sida odoko mang’eny ka ng’owo mae pap.

¹⁶ Solomon ne omo farese Misri gi Koah. Jo-ohande ne omogi kuno gi nengo moketi:

¹⁷gari achiel ne ging’iewo Misri gi kilo abiriyo mag fedha, to faras achiel gi kilo ariyo. Johalago ne terogi ne ruodhi mag jo-Hiti gi mag jo-Aram.