Read luo 2 Weche mag Ndalo 10 Bible Online

2 Weche mag Ndalo 10 - luo bible

2 Weche mag Ndalo 10

¹Rehoboam nodhi Shekem nikech jo-Israel duto nosechokore kuno mondo okete ruoth.

²To kane Jeroboam wuod Nebat owinjo wachno, noduogo koa Misri, nikech ne pod en Misri kuma nodhiye koringo ruoth Solomon.

³Ne giorone wach mondo obi Shekem. Nobiro gi jo-Israel duto mi ne giwacho ni Rehoboam niya,,

⁴“Wuoru nomiyowa ting’ mapek; omiyo in koro ng’ad ting’ mapek ma noketo kuomwa, eka wanatini.”

⁵Nodwokogi niya, “Dhiuru to uduog bang’ ndalo adek.” Mi ne gia.

⁶Ruoth Rehoboam noporo wach gi jodongo ma yandi ng’ado rieko ni Solomon wuon mare ka pod ngima, kowachonigi niya, “Nyisauru gima dadwok jogo.”

⁷Ne gidwoke niya, “Kiyie bedo mang’won ni jogi kilombogi kendo iwuoyo kodgi maber, eka gibiro bedo jotichni ndalo duto.”

⁸To Rehoboam nodagi rieko ma jodongo nong’adone. Noporo wach gi yawuowi ma mbesene ma ne ni kode,

⁹kopenjogi niya, “Ere kaka dadwok jogi mosekwaya mondo ang’ad ting’ mapek ma wuora noketo kuomgi?”

¹⁰Ne gidwoke niya, “Dwok joma okwayi mondo ing’adnigi ting’ mapek ma wuoru nomiyogi kiwachonigi kama, ‘Lith lweta matung’ duong’ moloyo nungo wuora.

¹¹Wuora ero nomiyou ting’ mapek, an to abiro medou moloyo. Wuora nochwadou gi del, an to abiro chwadou gi thomoni.’ ”

¹²Chieng’ mar adek, Jeroboam kod oganda duto nobiro ir ruoth Rehoboam kaka nochikogi mondo gidog ire.

¹³Ruoth nodwokogi kager. Noweyo rieko mane jodongo ong’adone,

¹⁴to noluwo rieko mbesene, kowacho niya, “Wuora nomiyou ting’ mapek, to an abiro medou moloyo. Wuora nochwadou gi del, to an abiro chwadou gi thomoni.”

¹⁵Kamano ruoth ne ok odewo ji. To Nyasaye ema nomiyo gigo otimore kamano, mondo ochop singruokne mane omiyo Ahija ja-Shilo owacho ni Jeroboam wuod Nebat.

¹⁶ Kane jo-Israel oneno ni Ruoth ok odewogi, ne gidwoke niya, “Waonge wat gi Daudi! Ok wan libamba achiel gi wuod Jesse! Wadoguru dala, wan jo-Israel duto! Un, oganda Daudi, koro rituru mana dhoodu kendu!”

¹⁷Kamano jo-Israel duto nodok miechgi.

¹⁸Ruoth Rehoboam nooro Adoram mane jarit joma ichuno mondo oti gi thwon, to jo-Israel duto nogoye gi kite nyaka otho. Kuom mano ruoth Rehoboam noidho geche piyopiyo, moringo nyaka Jerusalem mondo otony.

¹⁹Chakre chieng’no, jo-Israel osebet ka dagi loch dhood Daudi nyaka chil kawuono, mak mana jo-Israel mane odak e dier jo-Juda kende ema nobet e bwo loch Rehoboam.