Read luo 2 Weche mag Ndalo 11 Bible Online

2 Weche mag Ndalo 11 - luo bible

2 Weche mag Ndalo 11

¹Kane Rehoboam ochopo Jerusalem, nochoko jolweny moyier alufu mia achiel gi piero aboro (180,000) kuom jo-Juda gi jo-Benjamin. Ne gidhi kedo gi jo-Israel, mondo gidwok loch ni Rehoboam.

²To wach Ruoth Nyasaye nobiro ni Shemeya ng’at Nyasaye niya,

³“Wuo gi Rehoboam wuod Solomon, ruodh Juda, kod jo-Israel duto mae Juda gi Benjamin,

⁴kiwachonigi ni Ruoth Nyasaye owacho kama: ‘Kik udhi uked gi oweteu, to ng’ato ka ng’ato mondo odog dala, nikech gima timoreni oa kuoma.’ ” Ne giwinjo wach Ruoth Nyasaye, mi ne ok gidhi kedo gi Jeroboam.

⁵Rehoboam nodak Jerusalem, kendo nogero mier mag siro lweny e Juda.

⁶Nogero Bethlehem, Etam, Tekoa,

⁷Bethzur, Soko, Adulam,

⁸Gath, Maresha, Zif,

⁹Adoraim, Lakish, Azeka,

¹⁰Zora, Aijalon, kod Hebron. Gin miech Juda gi Benjamin mochiel gi ohinga.

¹¹Nochielogi matek ahinya, moketoe jotend jolweny, kendo okanoe chiemo gi mo kod divai.

¹²Nokano kuodi gi tonge e miergo duto, kendo nolosogi motegno ahinya. Kamano e kaka norito Juda gi Benjamin.

¹³Jodolo gi jo-Lawi duto ma nodak kuom jo-Israel noduogo ir Rehoboam ka gia kuonde duto mane gidakie.

¹⁴Jo-Lawi noweyo lopgi gi mwandugi, mi gidhi Juda gi Jerusalem, nikech Jeroboam gi yawuote noriembogi e tich dolo mar Ruoth Nyasaye.

¹⁵ Jeroboam noketo jodolone owuon e hembko mane ni kuonde moting’ore, kendo mondo odol ni kido mochue mag nyiseche manono kod nyiroye ma noseloso.

¹⁶Ji moko kuom dhoudi duto mag Israel ma noketo chunygi kuom lamo Ruoth Nyasaye ma Nyasach Israel ne luwo jodolo gi jo-Lawigo, kendo ne gidhi Jerusalem mondo gitim misango ni Ruoth Nyasaye ma Nyasach kweregi.

¹⁷Kamano ne gitego piny Juda, kendo kuom higni adek, ne gimiyo loch Rehoboam wuod Solomon obedo motegno, nimar kuom higni adekgo ne giwuotho e yor Daudi gi Solomon.

¹⁸Rehoboam nokendo Mahalath, nyar Jerimoth, wuod Daudi, ma min mare ne Abihail nyar Eliab, wuod Jesse,

¹⁹ma nonywolone yawuowi ma nyinggi Jeush gi Shemaria kod Zaham.

²⁰Bang’ Mahalath Rehoboam nokendo Maaka nyar Abishalom ma nonywolone Abija gi Atai gi Ziza kod Shelomith.

²¹Rehoboam nohero Maaka, nyar Abishalom, moloyo monde duto. Nokendo mon apar gaboro gi nyiri piero auchiel.

²²Rehoboam noketo Abija, wuod chiege ma Maaka, jatend owetene, nimar nodwaro mondo obed ruoth bang’ thone.

²³Notiyo gi rieko, moketo yawuote moko e mier mochiel gi ohinga e gwenge duto mag Juda gi Benjamin. Nopogonigi mwandu mang’eny kendo nokendonigi.