Read luo 2 Weche mag Ndalo 12 Bible Online

2 Weche mag Ndalo 12 - luo bible

2 Weche mag Ndalo 12

¹Kane loch Rehoboam osegurore motegno, en, kaachiel gi jo-Israel duto, ne giweyo chik Ruoth Nyasaye.

²Emomiyo e higa mar abich mar lochne, Shishak ruodh Misri, nomonjo Jerusalem

³gi geche alufu achiel gi mia ariyo kod joidh farese alufu piero auchiel. Jo-Libia gi jo-Suk kod jo-Kush ma nobiro kode koa Misri ne ng’eny ma ok kwan.

⁴Nokawo miech Juda mochiel gi ohinga nyaka nochopo Jerusalem.

⁵Eka Shemeya janabi nodhi ir Rehoboam gi jodong Juda mane oseringo odhi Jerusalem nikech biro mar Shishak. Nowachonigi niya, “Ruoth Nyasaye owacho kama: ‘Aweyou e lwet Shishak, nikech un bende useweya.’ ”

⁶Eka ruoth gi jodong Israel nobolore kawacho niya, “Ruoth Nyasaye ni kare.”

⁷Kane Ruoth Nyasaye oneno ka gibolore kamano, nonyiso Shemaya niya, “Gisebolore omiyo ok natiekgi, to abiro resogi bang’ ndalo manok, kendo ok nato mirimba kuom Jerusalem gi lwet Shishak.

⁸Kata kamano ginibed e bwo lochne, mondo ging’e ni tiyona opogore gi tiyo ni ruodhi mag pinyni!”

⁹ Shishak nomonjo Jerusalem, mokawo mwandu duto mag od Ruoth Nyasaye gi mag od ruoth. Bende nokawo kuodi mag dhahabu mane Solomon oloso,

¹⁰mi ruoth Rehoboam noloso kuodi mag mula kar mago, momiyo jotend jorit ranga dala ruoth.

¹¹Kane ruoth dhi e Od Ruoth Nyasaye, jorit ne ting’o kuodigo, eka bange ne gidwokogi ka od jorit.

¹²Kane Rehoboam osebolore kamano, mirimb Ruoth Nyasaye nodok chien, mi ne ok otieke. To bende weche ne dhi maber e Juda.

¹³Ruoth Rehoboam norito piny kodak Jerusalem, kendo lochne nomedo gurore. Ne en jahigni piero ang’wen gachiel kane odoko ruoth, kendo norito piny kuom higni apar gabiriyo, kodak Jerusalem, dala mane Ruoth Nyasaye oyiero kuom dhout Israel duto mondo nyinge obedie. Min mare ne nyinge Naama, nyar Amon.

¹⁴Timbe Rehoboam ne richo, nikech ne ok oketo chunye kuom Ruoth Nyasaye.

¹⁵Weche duto mag Rehoboam a chakruokgi nyaka gikogi ondiki e Kitap Weche mag Ndalo mag Shemaya janabi gi Kitap Iddo janen. Ne nitie lweny e kind Rehoboam gi Jeroboam ndalo duto.

¹⁶Rehoboam notho, moyiki but kwerene e dala Daudi, Abija wuode nodoko ruoth kare.